Н.МӨНХЖИН
Венесуэлийн Ерөнхийлөгчийн үүрэг гүйцэтгэгч Николас Мадуро дөрөвдүгээр сарын 14-нд болох төрийн тэргүүний сонгуульд нэрээ дэвшүүллээ. Төрийн өндөр албан тушаалд олон жил ажилласан туршлага, Уго Чавесийн гэрээслэл, нийгмийн дэмжлэгийг тооцвол тэрээр Ерөнхийлөгчөөр сонгогдох магадлал ихтэй байна.
Өндөр, бадируун биетэй, ажилчин ангиас гаралтай жинхэнэ венесуэль эр Николас Мадуро сөрөг хүчний цорын ганц нэр дэвшигч, Польшийн еврейн хүү, чөргөр, боловсролтой сэхээтэн Энрике Каприлестэй халз тулахаар боллоо. Каприлесийг бэлгийн жам бус чиг хандлагатай хэмээн үндэслэлгүй шүүмжлэх хүмүүс ч байдаг. “Мадуро бол найрсаг, өрөвч сэтгэлтэй, жинхэнэ ард түмний хүү” хэмээн Каракас дахь Эквадорын Элчин сайд Рамон Торрес өгүүлж байна. Мадурогийн сонгуулийн кампанит ажил нэлээд эрт эхэлжээ. Уго Чавес өнгөрсөн арванхоёрдугаар сард Куба руу эмчилгээнд явахдаа түүнийг орлогчоороо томилсон билээ. Эдүгээ Венесуэлийн гудамж Боливариан хувьсгалын улаан өнгөөр туяарч байна. Зурагт хуудас, бейсболын бөмбөг, цамцан дээр “Soy un chavista Maduro” буюу “Би эрийн цээнд хүрсэн чавист (Чавесийн талыг баримтлагч)” хэмээх уриа бичээстэй. (maduro нь испаниар нас биед, эрийн цээнд хүрсэн гэсэн үг).
Николас Мадуро Морос 1962 оны арваннэгдүгээр сарын 23-нд Каракаст төржээ. Дунд сургуульд байхдаа рок хөгжим сонирхож, сургуулийн хамтлагт басс-гитар тоглодог байв. Мөн энэ үеэр “Социалист нэгдэл” хэмээх зүүний үзэлтэй залуусын байгууллагад элсч улс төрийн замналаа эхэлсэн байна. 1980-аад оны дундуур Гаванад очиж Кубын Коммунист намын идэвхтнүүдийг бэлтгэдэг сургуульд суралцлаа. Каракаст буцаж ирсэн Мадуро Венесуэлийн улсын их сургуульд менежментийн чиглэлээр хоёр жил суралцахдаа сургуулийнхаа маоист дугуйлангийн даргаар томилогдож байсан аж. Тэрээр менежментийн чиглэлээр ажилласангүй, харин метроны машинист болж, тэнд Каракас хотын ажилчдын Үйлдвэрчний эвлэлийг байгуулжээ.
1990-ээд оны эхээр 1982 онд Уго Чавесийн санаачлан байгуулсан “Боливариан хувьсгалын хөдөлгөөн 200” (MBR 200) бүлэгт нэгдлээ. Тус бүлгийн офицерууд төрийн эргэлт хийж Засгийн газрын неолиберал чиг хандлагыг социалист бодлогоор солих зорилт тавьжээ. Гэвч 1992 онд тэдний цэргийн эргэлт хийх оролдлого бүтэлгүйтэж Уго Чавес шоронд оров. Н.Мадуро эхнэр Силиа Флоресийн хамтаар ирээдүйн командлагчийг шоронгоос суллуулах кампанит ажлыг удирдаж байлаа. Чавес өршөөгдөж эрх чөлөөтэй болсныхоо дараа Мадурог “MBR 200”-ийн удирдлагад оруулж тэдний нөхөрлөл зузаарчээ.
1997 онд Чавес, Мадуро хоёр Каракасын ядуусыг нэгтгэсэн “Тавдугаар бүгд найрамдах улсын хөдөлгөөн” нам байгуулж жилийн дараа бусад зүүний намтай эвсэж парламентын сонгуульд ялалт байгууллаа. 1999 оны Ерөнхийлөгчийн сонгуульд ялалт байгуулсан Уго Чавес Н.Мадурог хууль сахиулах, гүйцэтгэх байгууллагын хамгийн өндөр албан тушаалд томилох болжээ.
Уго Чавес Гаванад хамгийн сүүлчийн хүнд мэс засалд орсны дараа түүний дэргэд очсон цорын ганц хамтран зүтгэгч нь Николас Мадуро байсан юм. Зарим нь түүнийг Чавесийн сүүдэр гэдэг байсан бол, тэрээр өөрөө командлагчийг “Тэр бол миний улс төрийн эцэг” гэдэг байв. Мадуро эдүгээ таалал төгссөн Ерөнхийлөгчтэй ойр дотно нөхөрлөж байсны зэрэгцээ төрийн өндөр алба болон парламентад ажилласан ихээхэн туршлагатай. Түүний гэргий Силиа Флорес өнөөдөр Венесуэлийн ерөнхий прокурорын албыг хашиж байна. Н.Мадуро өмнөх дэд ерөнхийлөгч Элиас Хауа шиг хэтэрхий радикал биш бөгөөд У.Чавесийн эдийн засгийн бодлогод гаргасан зарим алдааг засахад энэ чанар нь хэрэгтэй хэмээн ажиглагчид үзэж байгаа юм. 2000 онд Мадуро парламентад сонгогдож, 2005 онд дахин сонгогдохдоо спикерээр томилогджээ. 2006 онд Гадаад хэргийн сайд, 2012 онд улс орны дэд ерөнхийлөгч боллоо.
Н.Мадуро нийгмийн сайн сайхныг түлхүү анхаарсан Чавесийн бодлогыг үргэлжлүүлнэ хэмээн амлаж байна. Тэрээр гудамжны гэмт хэрэг, авлигатай тэмцэх төрийн байгууллагыг бий болгоно гэжээ. Мадуро ард түмний дэмжлэгтэйгээр сонгуульд ялах магадлалтай ч тэр эрх мэдэлд удаан тогтож чадах уу хэмээн мэтгэлцэж байна. Тэрээр дээд боловсролгүй нь нэг сул тал нь болж байгаа аж. Гэвч их, дээд сургууль төгсөөгүй, ажилчин Луис Инасио Лула да Сильва (Бразил), Лех Валенса(Польш) нар Ерөнхийлөгч болж байсан түүхтэй. Лула да Сильва, Лех Валенса нар үйлдвэрчний эвлэлд олон жил ажилласан, зохион байгуулах асар өндөр чадвартай, ард түмний хайрыг татсан удирдагчид байсан билээ.
Николас Мадурог хүмүүсийг сонсож, гаргасан шийдвэрээ дүгнэж цэгнэж чаддаг хэмээн үнэлдэг. Тэрээр Гадаад хэргийн сайд байхдаа У.Чавесийн ширүүн, цочмог мэдэгдлийг зөөлрүүлж, эвийг нь олдог, дипломат чанараа харуулсан билээ. Мадурод нь Уго Чавес, Че Гевара, эсвэл Фидель Кастро шиг хувьсгалч зан, чанар байхгүй, хувьсгалчдын эрин үе ийнхүү өнгөрлөө хэмээн хэвлэлүүд бичиж байна. Харин хувьсал хийх тал дээр Н.Мадуро хэнээс ч дутахгүй бололтой.
