Н.МӨНХЖИН

НҮБ-ын Аюулгүйн зөв­лөл Нью-Йорк дахь төв байрандаа яаралтай ху­рал­даан хийж ээлжит цө­мийн туршилтаа амжилт­тай хийснээ зарласан Хойд Солонгосын асууд­лыг хэлэлцэв. Пхеньяны үйлдэл нь олон улсын аюулгүй байдал, энх тай­ванд илт аюул заналхийлэл болж байна гэсэн дүгнэл­тэд хүрч, Аюулгүйн зөвлөл нэн даруй хариу арга хэм­жээ авахаа мэдэгдлээ.

“Манай цөмийн тур­шилт олон улсын эрх зүйд харшлаагүй, өөрсдийгөө хамгаалах шударга алхам болсон” хэмээн Хойд Со­лон­госын тал мэдэгдэж байна. Хойд Солонгосын Гадаад хэргийн яамны мэдэгдэлд “Эхлээд бидэнд цөмийн туршилт явуулах шаардлага, төлөвлөгөө ч байгаагүй. Бидний цөмийн хүчин чадал аль хэдийнэ өндөр төвшинд хүрч, ма­най гаригийн аль ч цэгээс ирэх түрэмгийллийн го­ломтод оновчтой цохилт өгөх хангалттай хүчтэй болсон” хэмээн онцолжээ.

Пхеньяны дэглэм өөрс­дийгөө хамгаалах та­лаар ярихдаа энэ оны нэг­дүгээр сард Аюулгүйн зөв­лөлөөс гаргасан тогтоолыг дурдсан байна. Тэр үед хойдууд хиймэл дагуул сан­сарт хөөргөсөн ч үүнийг далимдуулж бал­лис­тик пуужин турш­сан хэмээн АНУ, Япон, Өмнөд Солонгос үзсэн билээ. Улмаар хариу арга хэм­жээний хүрээнд Хойд Солонгосын Сансрын тех­нологийн хороо болон Төрийн уул уурхайн кор­порацийн активийг барь­цаалж, Пхеньяны өндөр тушаалын цэргийн түш­мэдийн дансыг царцаасан юм. Энэ удаад ч санхүү­гийн хориг арга хэмжээ авна хэмээн АНУ-аас НҮБ-д суугаа байнгын төлөөлөгч Сьюзан Райс мэдэгдлээ.

НҮБ-ын Аюулгүйн зөв­лөл ямар нэг хариу арга хэмжээ, хориг арга хэм­жээ авбал цөмийн тур­шил­таа үргэлжлүүлнэ хэ­мээн Хойд Солонгосын эрх баригчид өчигдөр мэ­дэг­дэв. Тус улсын Гадаад хэргийн яам ээлжит пуу­жин хөөргөлт, газар доорх цөмийн туршилт хийхээр төлөвлөж буйгаа зарлалаа.

Хойд Солонгос 2005 онд цөмийн гүрэн болсноо зарласан юм. 2006, 2009 онд тус улс олон улсын хамтын нийгэмлэгийн хүч­тэй эсэргүүцэлтэй тул­гарсан ч цөмийн туршил­тууд хийсэн билээ. Хам­гийн сүүлчийн цөмийн туршилт гурав хоногийн өмнө буюу сарны тооллын шинэ жилийн эхний өдөр орон нутгийн 06:57 цагт нийслэл Пхеньян хотоос зүүн хойд зүгт 379 км-т орших Сонжинбэгам дахь цөмийн полигонд болсон байна. Газар дор хийсэн цөмийн туршилтын хүчин чадал нь ойролцоогоор долоон килотонн байжээ.