Засгийн газрын 2012-2016 оны үйл ажиллагааны хөтөлбөрт хүүхэд, залуучуудад хандсан олон зорилт тусгасан билээ. Хүн амын хөгжил, нийгмийн хамгааллын сайдын тушаалаар хүүхэд залуучуудыг хөгжүүлэх, хүүхдийн хөгжлийг хангах зориулалтаар барьсан барилга, байгууламжийн өнөөгийн байдлыг судалсан байна.  Энэ ажлын хүрээнд бий болгосон хөрөнгийн ашиглалтын өнөөгийн байдлын талаар нэгдсэн мэдээлэл бэлтгэх, дүн шинжилгээ хийх ажлын хэсгийг  ХАХНХ-ын дэд сайдаар ахлуулан байгуулсан аж. Энэ талаар дэд сайд Э.Тамираас тодрууллаа.

-Хүүхэд залуусын хөгж­­лийн зо­риулалтаар барьсан бай­гууламж манай улсын хэмжээнд хэд байна вэ?

-Хүүхдийн хөгжлийг хангах зориулалтаар барь­сан нийт 151 байгууллага байна. Үүнээс 72 нь тө­рийн өмчид, 75 нь хувийн болон олон улсын бай­гууллагын өмчид дөрөв нь төр, хувийн хэвшлийн хам­тарсан холимог өмчид бүртгэлтэй байна. Дийлэнх нь 1990-ээд оны үеийн барил­гууд.

-Энэ асуудлын хүрээнд мэдээлэл бэлтгэхэд хүнд­рэл тулгарсан уу?

-Эдгээр байгуулам­жийг бүртгэх үйл ажил­лагаа улсын хэмжээнд явагдаж байгаагүй юм билээ. Тиймээс нэгдсэн мэдээллийн сан байхгүй, холбогдох байгуул­лагуу­дын мэдээлэл зөрүүтэй байсан. Газрын эзэмшил, хувьчлагдсан, хувьчлалын талаарх мэдээллийн сан хангалтгүй. Мэдээлэл цуг­луулахад хүрдрэлтэй байлаа.

 -Хүүхдийн байгууллага гэсэн нэрээр өөр албан байгууллага үйл ажил­лагаагаа явуулж байгаа тохиолдод л илэрсэн үү?

-Зориулалтын бусаар ашиглаж буй 14 томоохон барилга илэр­сэн. Эдгээ­рийн зургаа нь тө­рийн өмчид, зургаа нь хувийн өмчид, хоёр нь холимог өмчид харьяалагдаж бай­на. Жи­шээл­бэл  Хүүхэд, залуу­чуу­дын театрт зориу­лал­тын бусаар “Хаан банк” үйл ажиллагаагаа явуул­даг. Хүүхдийн “Бам­ба­рууш” кафед томчуудад зориулсан ресторан байр­лаж байгаа. Хүүхэд за­луусын соёлын төвд “Улаан­баатар чуулга” эзэн суучихсан. Хүүхдэд зо­риулсан арга хэмжээ зо­хион байгуулах гэхээр түрээс нэхдэг. Тэнд хүүх­дэд зориулсан юу ч алга. Энэ мэт олон байгууллага зүй бусаар ашиглаж бай­гаа тохиолдлууд илэрсэн.

-Эдгээр байгуулла­гуудад ямар арга хэмжээ авах вэ?

-Нурааж болох, болох­гүй олон байгууллага бай­на. Энэ асуудлыг нө­хөн төлбөрийн аргаар шийдэх боломж байна. Бид хүүхэд залууст зо­риул­сан олон байгууламж барина гэж төлөвлөөд байна. Тодорхой хэм­жээ­ний санхүүжилтийг эдгээр албан газруудаас гаргуулж болох юм. Бидний эх­лүүл­сэн ажил дөнгөж эхний шатандаа явж байна.

-Дараагийн алхам юу байх бол?

-Эхний ээлжинд өм­чийн болон менежмен­тийн хувьчлалаар хувьчилсан байгууллагуудыг тогтоох, нарийвчлан шалгах, гэ­рээ­ний дагуу үйл ажил­лагаа явуулж буй эсэхийг албан ёсоор хянах хэрэг­тэй.