З.ЦЭЦЭГ
"MWS Cloud" компанийн мэдээллийн аюулгүй байдлын тэргүүлэх мэргэжилтэн Илона Кокова "РИА Новости" агентлагт мэдээлснээр, өөрийнхөө тухай мэдээллийг интернетээс бүрмөсөн устгах боломжгүй юм. Учир нь дижитал ул мөр гэдэг нь зөвхөн тухайн хүний өөрийнх нь цахим хаягуудаас гадна бусад хүмүүсийн олон нийтийн сүлжээн дэх дурдалт зэргээс бүрддэг байна.
"Интернетээс бүрмөсөн алга болох боломжгүй. Дижитал ул мөр нь нэг дор үүсдэг зүйл биш бөгөөд энэ нь өдөр тутмын олон төрлийн цахим үйлдлүүдийн үр дүнд хуримтлагдаж, бүрэлдэн бий болдог. Та өөрийнхөө тухай ямар мэдээлэл байгааг яг одоо шалгаж үзэх боломжтой" гэж тэрээр хэлэв.
Мэргэжилтний хэлснээр, ямар мэдээлэл ил гарч ирэхийг харахын тулд хайлтын системд бүтэн нэр, хэрэглэгчийн нэр эсвэл утасны дугаараа оруулж үзэх боломжтой. Түүний үзэж буйгаар зөвхөн хуучин хаяг, нийтлэлүүд төдийгүй бусад хүмүүсийн таны тухай дурдсан зүйлсэд ч анхаарал хандуулах хэрэгтэй. Мөн зургаар хайлт хийж үзэх нь зүйтэй бөгөөд ингэснээр заримдаа хуучин, мартагдсан нийтлэлүүд илрэх боломжтой байдаг.
"Та өөрийнхөө тухай мэдээлэл хайхдаа хиймэл оюун ухааны үйлчилгээг ашиглаж болно. Эдгээр нь хувийн нууц мэдээллийг илрүүлэхгүй ч, хуучин дурдагдсан байдал, нийтлэл, ажлын түүх зэрэг олон нийтэд аль хэдийн нээлттэй байгаа мэдээллийг нэгтгэн харуулахад тусалдаг" гэж тэрээр хэлэв.
Мөн тус мэргэжилтэн удаан хугацаанд ашиглаагүй хуучин хаягуудаа эргэн санахыг зөвлөж байна. Хэрэв тухайн профайл шаардлагагүй болсон бол эхлээд түүн дээрх илүүдэл мэдээлэл, нийтлэл, зургуудыг устгаад, дараа нь хаягийг бүхэлд нь устгахыг Кокова санал болгож байна.
