“Зууны мэдээ” сонин энэ удаагийн “Үзэл бодлын чөлөөт талбар” буландаа “Туулын хурдны зам”-ын бүтээн байгуулалтын асуудлыг хөндөж байна. Энэхүү бүтээн байгуулалтын гүүрэн байгууламжийн ихэнх тулгуур нь Туул голын татамд байрлах учраас газрын доорх ус, голын урсац, үерийн эрсдэл, усны чанарт үзүүлэх нөлөөллийг нарийвчилсан загварчлалаар бүрэн тооцох шаардлагатай гэж Усны нөөцийн зөвлөлөөс үзсэн байдаг. Түүнчлэн иргэд, олон нийтийн зүгээс Туул голын экосистемд үзүүлэх нөлөө, эдийн засгийн үр ашиг, түгжрэлийг бууруулах тооцоо, санхүүжилтийн ил тод байдал зэрэг асуудлаар хотын удирдлагуудад шаардлага тавьж, байр сууриа илэрхийлсээр байна.
БОУАӨ-ийн сайд Б.Батбаатар: Энэ асуудалд хуулийн хүрээнд шинжлэх ухаанчаар хандах ёстой
-БОУАӨ-ийн сайдын хувьд Туулын хурдны замтай холбоотой асуудал дээр хоёр зүйлийг голлон анхаарч байгаа. Нэгдүгээрт, хуулиас давсан ямар нэг үйлдэл, тушаал шийдвэр гарсан байх ёсгүй. Хоёрдугаарт, шинжлэх ухаанчаар хандах ёстой. Мэргэжлийн боловсон хүчин, эрдэмтэд, судалгааны байгууллагууд болон албан хаагчдын гаргаж байгаа дүгнэлтээр асуудалд хандах ёстой. Энэ хүрээндээ Усны газар болон харьяа газрууд, эрдэмтэн судлаачдыг хамруулан хууль эрх зүйн хүрээнд нь дүгнэлт гаргаж Туулын хурдны замтай холбоотой асуудлуудад эцсийн байр суурийг илэрхийлэх нь зүйтэй гэх нөхцөлтэйгөөр ажиллаж байна. Түүнээс биш улс төрийн сэдлээр асуудалд хандаж, үг дуугарах нь буруу.
Эх сурвалж: “Зууны мэдээ” сонин
2026 ОНЫ ГУРАВДУГААР САРЫН 31. МЯГМАР ГАРАГ. № 60 (7802)
Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.
Үнэн мэдээллийг хамтдаа хамгаалцгаая.
Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn
