Б.Мөнхбаяр: Шинэ зууны шинэчлэл “Бакалаврын 3.0” хөтөлбөрийг эхлүүлнэ

ZMS.MN

13 цаг

2 мин унших

Ц.МЯГМАРБАЯР

Санхүү эдийн засгийн их сургуулийн /СЭЗИС/ ректор, доктор профессор Б.Мөнхбаярыг урьж ярилцав.

-Танайх нэгэн зуун жилтэй чацуу Олон улсад хүлээн зөвшөөрөгдсөн магадлан итгэмжлэгдсэн Монгол Улсын анхны нэр хүндтэй сургуулиудын нэг. Олон улсад сайн жишигт үнэлэгдсэн хөтөлбөрүүдээрээ манлайлсан сургууль гэдэг. Эхлээд сургалтын хөтөлбөрийн шинэчлэлийн талаар яриагаа эхлэх үү?

-Бид сургалтын хөтөлбөрийн шинэчлэлийг тасралтгүй хийдэг. Сүүлийн үед бакалаврын боловсрол олгох сургалтын хөтөлбөртөө анхаарч нэлээд үнэ, цэнийг шингээсэн сайжруулалт хийсэн.

Энэ жил манай сургуулийн 101 дэх жил эхэлж байна. 1924 онд байгуулагдсан сургууль. Өнгөрсөн жил 100 жилийн ойгоо тэмдэглэн өнгөрүүлсэн. Анх Гаалийн сургууль нэртэй байгуулагдаж байсан сургууль нэгэн зуун жилд улс орныхоо хөгжилд ямар үнэ цэн үлдээсэн зүйл бүтээсэн юм. Үе үеийн төгсөгчдийн бүтээсэн үнэ цэнийг дүгнэж ойгоо тэмдэглэсэн. Энэ жилээс бид дараагийн зуун эхэлж байна гэдгээр дараагийн шинэ түвшинд гарч ажиллах зорилт дэвшүүлсэн. Энэ үүднээс “Бакалаврын 3.0” шинэ хөтөлбөрөө эхлүүлж байна. Орчин үеийн чиг хандлагад нийцүүлэн боловсролын тухай уламжлалт ойлголтыг бага зэрэг өөрчлөх зорилготой. Ер нь бакалаврын зэргийг яагаад заавал дөрвөн жил сургаж байж олгох ёстой гэж. Дөрвөн жил бол хүний амьдралд их хугацаа. Тиймээс хурдтай өөрчлөгдөж буй нийгэмд бакалаврын боловсролыг заавал дөрвөн жилд олгох нь тохиромжтой биш гэж үзсэн. Тиймээс боломжтой хэмжээнд хугацааг нь багасгах ёстой. Бид бүх хөтөлбөрөө гурван жилийн хугацаанд хэрэгжүүлье гэж зорьж байна. Өмнө бид гурван жилээр Ентерпренеур, Санхүүгийн манлайлал гэсэн хоёр онцлог хөтөлбөрийг “Бакалавр 2.0”-т хэрэгжүүлсэн. Энэ нь амжилттай хэрэгжиж байгаа учраас бүх хөтөлбөрөө гурван жил рүү шилжүүлэхээр болсон. Цаг хугацааны хувьд залуучуудад хэмнэлттэй гэсэн үг.

Дараагийн нэг зорилт нь манайх Олон улсын сургууль болох зорилгоор бодлогын стратегиа тодорхойлсон. Залуучууд улс орныхоо хөгжилд тодорхой үнэ цэнтэй хувь нэмрийг оруулж байх ёстой. Энэ үүднээс дэлхийн нийтийн зорилго чиг хандлагатай хөл нийлүүлэн алхах ёстой. Тиймээс дэлхийн нийтийн зорилгуудыг ойлгодог, хэл, соёлын ялгаатай улс орны хүмүүстэй ойлголцож, хүндэтгэх харилцдаг, хамтран ажиллах чадвартай түвшний хүмүүсийг бид бэлтгэх ёстой. Иймээс гурван жилд дөрвөн оронд зэрэг суралцах боломжийг бий болголоо. Тодруулбал, эхний жилдээ Монголдоо манай сургуульд суралцана. III улиралдаа БНХАУ улсад, IV улиралд Японд, V улиралд Солонгос улсад, VI улиралд сургуульдаа буцаж ирээд төгсөнө гэсэн системээр сургалтыг зохин байгуулахаар бэлтгэж байна. Тэгэхээр залуучуудын гадаад орнуудад сурах хүсэл эрмэлзсэнийг нэг дор биелүүлэх боломжтой. Манай хамтарч буй байгууллагууд нь дээрх орны нэр хүндтэй сургуулиуд. Ингэснээр гурван жилийн дараа энэ гурван орны сургуулиудын хөтөлбөрийг өөртөө шингээсэн СЭЗИС-ийн бакалаврын зэрэгтэйгээр төгсөх юм. Мөн нэг давуу тал нь эдгээр оронд суралцаж байхдаа тухай орны бизнесийн байгууллагуудад дадлага хийх боломжтой. Тус улсын бизнес, эдийн засгийн нөхцөл байдал, худалдаа, бизнесийн орчин зэргийг мэдэх туршлага хуримтлуулах боломжтой.