Б.ОНОН
Пантийн Ганхуяг гэхээр “Аан, Дорноговийн Засаг дарга уу” гэх хүн олон таарах вий. Учир нь 2008-2012 оны хоорон дахь МАН-ын засаглалын үед аймагтаа ардчиллын далбааг мандуулж байсан цөөхөн даргын нэг бол П.Ганхуяг. Мөн Сайншандын аж үйлдвэрийн паркийн шавыг МАН-ынхантай хамтарч тавин, нэлээд ажлыг нь урагшлуулж чадсан тэрээр өнгөрсөн жилүүдэд энэ сэдвээр хэвлэл мэдээллийн хэрэгслээр багагүй дуугарч “олны танил” болсон хэрэг.
П.Ганхуяг 2012 оны Орон нутгийн сонгуульд аймгийнхаа АН-ыг удирдаж ороод бас л ялалт байгуулав. Мэдээж тэр ялалтынхаа дараа дахиад аймгийн Засаг даргад нэр дэвшиж, Ерөнхий сайд ч “чилээлгүйгээр” батламжилсан байдаг.
Түүний ажлын арга ихээхэн сонирхолтой. МАН-тай хамтраад ажиллаж байсныг нь харвал “хүний үгээр, номхондуу амьтан” ч юм шиг. Нутагтаа сэдэж эхлүүлээд, бас зүтгээд хэрэгжүүлж байгаа ажлуудыг нь ажвал зоримог, шийдэлтэй Засаг дарга байж харагддаг.
Өөрөөр хэлбэл, УИХ, Засгийн газрын шийдвэр бүхий “Сайншандын аж үйлдвэрийн парк”-ийн төслийн хүрээнд төмөр зам тавих ажлын бэлтгэлийг орон нутгийнхаа хүчээр аль хэдийнэ хангачихсан. Мөн хүн амын төвлөрлийг угтан хүнс, ус гээд олон асуудлыг өнгөрсөн дөрвөн жилд амжуулж чаджээ.
Үүнээс гадна иргэдээ хямд орон сууцаар хангах гэхдээ нутгийнхаа бизнесмэнүүдийг “гомдоон” байж төслөө хэрэгжүүлж дуусгасан байдаг. Үр дүнд нь шат шатны шүүх П.Ганхуяг даргыг буруутгасан. Одоо юу болж байгаа юм, бүү мэд.
Гэвч энэ нь түүний дипломат албанд олон жил зүтгэсэн “түс тас” школтой нь холбоотой болж таарсан.
Дорноговь аймагтаа АН-ыг жинхэнэ хавтгай, хоёр дахиа ингэж ялуулсан нь П.Ганхуягийн улстөрчийн хийгээд төрийн хар хүний чансааг илтгэсэн хэрэг хэмээн учир мэдэх улс ярих. Үнэн ч биз.
Тэрээр Дорноговийн унаган хүүхэд аж. 1959 онд Дорноговь аймгийн Хөвсгөл суманд төрсөн. 1975 онд Хөвсгөл сумын найман жилийн дунд сургууль, 1977 онд аймгийн 10 жилийн дунд сургууль гээд хүүхэд насаа Хөвсгөл сумаас Сайншандын хооронд л өнгөрөөжээ. Дараа нь1980 онд МУИС-ийн математикийн анги төгсөн, улмаар 1981 онд Япон улсын Токио хотын Гадаад хэлний Япон хэл, 1985 онд Япон улсын Шиншю Их сургуулийн нэхмэлийн инженер механикийн ангийг дүүргэж өнөөгийн улстөрчийн, төрийн хүний мөн чанараа олж авсан байдаг. Сүүлд буюу 1996 онд АНУ-ын Колородагийн Их сургууль, Эдийн засаг болон англи хэлний сургалт, 1998 онд Шинэ Зеланд улсын Виктори Их сургуулийн Англи хэл дипломатын сургалт, 2000-2002 онд Япон улсын Аояма Гакү-Ин Их сургууль, Улс төрийн шинжлэх ухааны магистрын зэрэг хамгаалсан ажээ.
Харин ажилласан байдлыг нь харвал 1985-1990 онд Ноос ноолуурын “Говь” үйлдвэрт инженер механик, ахлах мэргэжилтэн, гадаад харилцааны хэлтсийн дарга, 1990-1994 онд Монгол улсаас Япон улсад суугаа ЭСЯ-нд Худалдаа эдийн засгийн атташе, 1994-1996 онд ХҮЯ-ны Олон улсын худалдаа эдийн засгийн хамтын ажиллагааны газарт Японы асуудал хариуцсан ахлах мэргэжилтэн, 1996-1998 онд ГХЯ-ны ЭЗ-ийн хамтын ажиллагааны газрын орлогч дарга, 1998-2002 онд Монгол Улсаас Япон улсад суугаа ЭСЯ-нд Худалдаа эдийн засгийн зөвлөх, 2002-2004 онд СЭЗЯ-ны Эдийн засгийн хамтын ажиллагаа бодлого зохицуулалтын газрын Орлогч захирал, 2005-2008 онд “Ньюком” ХХК-нийн Ерөнхий менежерээр ажиллаж байгаад 2008 оны сонгуулийн дараагаас Дорноговь аймгийн Засаг даргаар ажиллаж эхэлжээ.
П.Ганхуяг зүгээр л гэнэт гараад ирсэн улс төр сонирхогч биш аж. Японд Худалдааны атташегаар сууж байхдаа Монголдоо хөрөнгө оруулалт татах гэж тэндхийн байгууллагуудын босгыг элээж, үүдийг сахиж, ёстой л арван гурван мэхээ хэрэглэдэг байсан гэдэг. Ингэж байж эх орон руугаа элдэв хандив тусламж, хөрөнгө оруулалтыг татдаг байсан хэрэг л дээ. Гуйна, тайлбарлана, өрөвдүүлнэ... ер нь л элдэв аяг гаргаж байж ажлаа амжуулдаг байснаа тэр нэгэнтээ өгүүлсэн нь бий. Тухайн үед Монголын эдийн засаг бараг л мөлхөж байсан агаад хөрөнгө оруулалт, тусламж гэдэг амь тариа шиг хэрэгтэй зүйл байжээ.
Харин одоо бол байдал өөр өө. Гэсэн ч тэрээр Японтойгоо харилцаатай хэвээрээ л байгаа аж. Тодруулбал, Японы Шизүока мужтай аймгаа түншлүүлж, эдийн засгийн хамтын ажиллагаатай болсны зэрэгцээ аймгийнхаа хүүхдүүдийг япон боловсролд сургах талаар нэлээд ажил хийсэн. Улаанбаатарын сурагчдад ч олдоод байдаггүй боломж энэ аймгийн хүүхдүүдэд бий. Хүүхдүүд хэдэн арваараа баг болон ээлжээр Японд “ажилладаг” туршлагатай. Яваад ирсэн хүүхдүүд бусаддаа үлгэрлэхээс гадна өөрөө сурах, амьдрахдаа “хувьсгал” хийдгийг багш нар нь анзаарснаа хэлдэг. Бага юм шиг атлаа аймгийнхаа ирээдүйд оруулж буй маш том хөрөнгө оруулалт хэмээн мэргэжлийн хүмүүс дүгнэсэн нь бий. Ерөөс П.Ганхуяг өнөөдрийг бус маргаашийг харж ажилладаг дарга аж. Одоогоос жил гаруйн өмнө дөө, сурвалжлагч миний бие аймагт нь томилолтоор ажиллахдаа түүнээс асууж байсан юм. Таныг ажил авснаас хойш энэ аймгийн иргэдийн амьдрал хэр зэрэг сайжрав аа гэхэд “Аймгийн Засаг дарга иргэддээ таалагдах гээд баахан сургуулийн дээвэр, хана будаж, байшингуудыг гоё цонхтой болгох зэргээр өнгөний юм хийж болно л доо. Гэхдээ энэ бол Дорноговийн ирээдүй биш. Сайншандын аж үйлдвэрийн парк гэж том бүтээн байгуулалт байна. Хамрын хийд, Хан Баянзүрх уулаа түшиглэх аялал жуулчлалын арвин хөрөнгө оруулалт байна. Бас Дорноговийг малжуулах, фермийн аж ахуйг хөгжүүлэх зэрэг хөгжлийн гол ажлууд бий. Үүнийг л урагшлуулах гэж ажиллаж байна. Магадгүй, 2012 онд надад муу дүн тавиад явуулж болох юм. Гэхдээ хэдхэн жилийн дараа П.Ганхуяг гэдэг дарга чухам юуны төлөө зорьж ажиллаж байж вэ гэдгийг нутгийнхан маань ойлгох болно. Түүнээс биш сурвалжлагч гараад асуухад ажиллахгүй байна гэж шүүмжилж байгаа иргэндээ би гомдохгүй” гэж хариулж байсан юм. Гэсэн ч түүнд муу дүн тавиад явуулчихсангүй. Дахиад сонгов.
Одоо П.Ганхуягийн өмнө маш том ажил бий. Сайншандын аж үйлдвэрийн паркийн ажил хүссэн, хүсээгүй энэ хүнтэй холбогдож, энэ хүний гараар бүтээн байгуулалт нь өрнөнө. Дорноговийнхон ч үүнийг нь ойлгодог болж. Тиймээс л П.Ганхуягийн багийг “улираасан” хэрэг. Нэг үгээр хэлбэл, тэрээр удахгүй их бүтээн байгуулалт цогцлох шинэ Дорноговийн хуучин дарга болжээ.
