Зэвсэгт хүчний шил­дэг удирдагчтай 186 дугаар ангийг зорилоо.  Өнгөрсөн онд тус ан­гийн гар­гасан амжилт, хийсэн аж­лыг үнэлж салбарын яам­наас ангийн захирагчийг ийнхүү өргөмжилсөн аж. 186 дугаар анги анх 1934 оны Дорнод аймгийн Ма­тад суманд багуулагдсан түүхтэй. Ангийн хамт олон 1939 оны Халхын голын дайн, 1945 оны Чөлөөлөх дайнд оролцож байсан ахмад дайчдаараа бахар­хана. Мөн энэ ангиас төрсөн Монгол Улсын дөрвөн баатар тэдний бас нэгэн бахархал аж. 1979 онд ардын армийг өргөтгөхөд тус ангийг Эрдэнэт хотод байгуулж, Ардын их хурлын тэргүүлэгчдийн зарилгаар Байлдааны гавъяаны улаан тугийн одонг шилжүүлэн өгчээ. Харин 2002 онд энэ ангийг  Засгийн газрын тогтоо­лоор Монгол Улсын мар­шил Г.Дэмидийн нэрэм­жит болгосон аж. Тус анги нийгмийн нөхцөл байдал, хөгжилтэй уялдуулан бүтэц зохион байгуулалтаа өөрчлөн шинэчилснийг Артилерийн дарга, дэд хурандаа Г.Нэмэхбаяр онцолсон.

186 дугаар анги Мото буудлагын тусгай хороо­ны бүтэцтэйгээр ажиллаж байгаа аж. Мөн сургалт, бэлтгэлийг байлдагч, ахлагч, офицеруудынхаа дунд тогтмол зохион байгуулж буй нь бүтцийн шинэчлэлийн хүрээнд хийсэн ажлуудын нэг. Мото буудлагын тусгай хороо байлдагч, ахлагч, офицеруудыг үүрэг даал­гаврыг гүйцэтгэх бэлэн байдалд бэлтгэдгээрээ онцлог. Тухайлбал, яам, онцгой байдлын байгууллагууд цаг үеийн байдалтай холбогдуулан  цасанд хаагдсан зам, даваа, гүүрийг нээх зэрэг өгсөн үүрэг даалгаврыг гүйцэтгэхэд бэлэн байдалд ажилладаг байна. Ангийн гол салбарт гэрээт цэргүүд алба хаадаг. Байлдааны мото буудлагын хороо, хугацаат цэргийн сур­гууль, байлдааны мото бууд­лагын бательон, эм­нэлэг ариутгал, инжене­рийн бүлгүүд, зэвсэг техникийн агуулах ордог байна. Тус ангийн удирдлагууд өнгөрсөн онд хийсэн, гүйцэтгэсэн ажлуудаасаа сонирхуул­сан. “Өнгөрсөн онд сур­галт бэлтгэлд гол анхаарлаа хандуулсан. ОХУ-д болсон байлдааны буудлагатай тусгай так­тик­тай хээрийн сургалтыг амжилттай зохион бай­гуулсан. Энэ жилийг яам­наас бүх шатны штабын бэлтгэлийг хангах жил болгон зарласан. Үүний хүрээнд хэсэгчил­сэн болон нэгдсэн дад­лага, командтай сургуу­лилтыг явуулах ажлыг бүх шатанд хангах бодлого барьж байгаа. Манай ан­гийн хувьд энэ бодлогын хү­рээнд штабын дадлагад офицеруудыг бүрэн хам­руулж, гүйцэтгэх үүргийг нь улам тодорхой мэдрүүлэх, байлдааны үед офицер хүн бичиг хэргийг хэрхэн хөтлөх чадварт сургахад анхаарлаа хан­дуулж байна. Мөн энхийг дэмжих ажилд манай анги өргөн бүрэлдэхүүнтэй оролцсон” хэмээн ангийн захирагчийн орлогч, дэд хурандаа М.Болдбаатар хэллээ.

ЦЭРГҮҮД ҮСЭГЛЭЛИЙН БАЯР ТЭМДЭГЛЭДЭГ ҮЕ АРД ХОЦОРСОН

Тус анги голдуу Хөвс­гөл, Ар­хангай, нийслэлээс цэрэг татдаг. Цэргүүд халагдахдаа мэд­лэг­тэй, боловсорч буцаж байгааг ангийн офицерууд он­цолж байлаа. Алба хааж байгаа цэргүүдийн 90 хувь нь бүрэн дунд боловс­ролтой аж. Мөн алба хааж буй цэргүүд дунд, дээд боловсротой, гадаадад мэр­­гэжил эзэмшсэн залуус ч байна. Японд Инженерийн их сургуульд мэргэжил эзэмш­сэн н.Мөн­гөнбор са­лааны­хандаа мэргэж­лийн­хээ онцлогоос зааж сургаж байгааг ахлагч нар хэлж байв. Мөн дээхнэ үед цэргүүд уншиж, бичиж сураад үсэглэлийн баяр тэмдэглээд халагддаг цаг ард хоцорсныг онцолсон. 186 дугаар ангийн байлдагчид өдрийн ихэнх цагийг хичээл, сур­галтад зарцуулдаг байна. Хугацаат цэргийн алба хаагчид өдөрт дөрвөн удаа хичээллэдэг аж. Ан­гийн нийт офице­руудын 95 хувь нь дээд боловс­ролтой гэнэ.

ЦЭВЭР УС, БОРЦ, ААРУУЛ ЦҮНХЛЭЭД ЭНХИЙГ САХИУЛАХААР ЯВЖ БАЙЛАА

186 дугаар ангиас эн­хийг сахиулах албанд 360 гаруй албан хаагч үүрэг гүйцэтгэжээ. Одоо тус ангийн 80 гаруй ахлагч, офицер энхийг сахиулах албанд мордох бэлтгэлээ базааж байна. Биднийг тус ангид очих үеэр энхийг сахиулах үүрэг гүйцэт­гэж байсан ахлагч, офи­церууд дэл­хийн халуун цэгт ажил­лаж байсан үеэ дурссан юм. Одоогоос арван жи­лийн өмнө энхийг сахиулахаар явж байсан үеийг бодоход манай цэргүүд одоо энэ албанд туршлагатай болжээ. 2003 онд манай улс анх удаа дэлхийн халуун цэг рүү агаарын тээвэрлэлт  хий­жээ. Байл­дааны хэрэгсэл, цэвэр ус, борц, ааруул ачсан цэргийн нисэх тэрэг Иракийг зорьсон байна. Энхийг сахиулах энэ багт 186 дугаар ан­гийн Арын албаны дарга дэд хурандаа Ж.Чог­сомжав явсан аж. 58-60 хэм хүрч халдаг Иракт ус хамгийн их хэрэг болно хэмээн тооцоолсон дайчид тухайн үед долоон тонн цэвэр ус авч явсныг тэрээр дурсав. Тэд ааруул, борц авч явахаа ч мар­таагүй гэнэ. Гэвч тэн­дэхийн цэргийн хангалт тэдний хилийн чанадаас ачиж ирсэн цэвэр усны үр шимийг амсуулаагүй гэдэг.