С.УЯНГА
Аугаа их Эх орны дайны Ялалтын 76 жилийн ой өчигдөр тохиолоо. ОХУ-ын Буриад улсын нийслэл Улаан-Үд хотын төв талбайд ялалтын баярын парад сүр жавхлантайгаар эхэлж, ОХУ-ын төрийн далбаа болон байлдааны тугийн салааны араас, бүх жагсаалын тэргүүнд эгнээнд монгол цэргүүд алхлаа. Түүхт ойг тохиолдуулан Зэвсэгт хүчний Тусгай хүчний цэргийн штабын дарга, бригадын генерал Л.Гансэлэмээр ахлуулсан Монгол Улсын Зэвсэгт хүчний цэргийн 75 алба хаагч Улаан-Үд хотод нэгдсэн бэлтгэлдээ ороод байсан юм. Баярын цэргийн парадад Агаарын довтолгооноос хамгаалах хүчин, хууль сахиулах байгууллагууд, цэрэг-эх орончдын хөдөлгөөнүүдийн 1500 гаруй хүн, 50 гаруй нэгж техник хэрэгсэлтэйгээр оролцож байгаа аж. Парад олон зориулалттай Су-30СМ сөнөөгч онгоцууд болон Су-25 «Грач» дайрагч онгоцуудын үзүүлэх нислэгээр үргэлжиллээ. Монгол Улсын Зэвсэгт хүчин 2015 болон 2020 онуудад Ялалтын баярын 70, 75 жилийн ойн цэргийн ёслолын жагсаалд оролцож байсан юм.
Харин манай улсад аугаа их Эх орны дайны ялалтын 76 жилийн ойн өдөр Батлан хамгаалах асуудал эрхэлсэн төрийн захиргааны төв байгууллагын 110, Монгол Улсад орчин цагийн Зэвсэгт хүчин үүсэн байгуулагдсаны түүхт 100 жилийн ойн баяр давхар тохиолоо. Ялалтын баярын өдөр Зэвсэгт хүчний сургалтын нэгдсэн төвд зохион байгуулагдсан ёслолын арга хэмжээнд Ерөнхийлөгч, Зэвсэгт хүчний Ерөнхий командлагч Х.Баттулга оролцож, Монгол Улсын Зэвсэгт хүчний нийт бие бүрэлдэхүүнд түүхт 100 жилийн ойн баярын мэнд дэвшүүлж, төрийн дээд одон медалиар шагнасан юм.
Баярын хурлыг нээж Батлан хамгаалахын сайд Г.Сайханбаяр “Монгол Улсын эрт, эдүгээ, ирээдүй гурван цагийн хэлхээс монгол цэргийн түүхтэй салшгүй холбоотой. Манай алба хаагчид өнгөрсөн зуунаас эдүгээг хүртэлх хугацаанд эх орноо батлан хамгаалах нэн хариуцлагатай бөгөөд нэр хүндтэй үүргийг амжилттай гүйцэтгэж, эх орныхоо нэр хүндийг олон улсын тавцанд өндөрт өргөж, эх дэлхийн энх тайван, амар амгаланг тогтоох үйлсэд эр зориг, тэсвэр тэвчээр, мэргэжлийн ур чадвараа илтгэж байна. Ингэснээр Монгол цэргийн мэргэжлийн ур чадвар, авхаалж самбаа, тэсвэр хатуужил, сахилга зохион байгуулалт өсөн нэмэгдэж, олон улсын түвшинд Монгол цэрэг- дэлхийн цэрэг болж үнэлэгдэж байна” хэмээн тодотгосон юм.
Үүний дараа Зэвсэгт хүчний Жанжин штабын дарга, хошууч генерал Д.Ганзориг “Орчин цагийн Зэвсэгт хүчин 100 жил” илтгэл тавьж, Монгол Улсын Ерөнхийлөгч цэргийн алба хаагч, ажилтан албан хаагч, ахмад дайчдын төлөөлөлд төрийн дээд одон медаль гардуулж, баяр хүргэлээ.
Энэхүү арга хэмжээнд БНӨСУ, ИБНАУ-д үүрэг гүйцэтгэж байгаа энхийг сахиулагч, төмөр замын бүтээн байгуулалтад оролцож буй барилгачин дайчид болон Төрлийн цэргийн командлалуудын удирдлагууд цахимаар оролцлоо.
Эх сурвалж: “Зууны мэдээ” сонин
2021.5.10 ДАВАА № 93, 94 (6570, 6571)
