Х.ОЮУНБОЛД Аргентинын ерөнхий­лөгч Маурицио Макри тус улсад болсон “Их 20”-ийн уулзалтын үеэр хэвлэлийн хурал хийлгэжээ. Энэ үеэр Аргентин ОХУ-тай олон талт ажиллагаанд хувь нэмрээ оруулж хамтран ажиллах болсноо мэдэгдсэн байна. Тухайлбал, алан хядах үйл ажиллагаа, хар тамхи, авлигын эсрэг хамтран тэмцэнэ гэж уулзалтын дараа ерөнхийлөгч Владимир Путин оролцсон хурлын үеэр хэллээ. Мөн ерөнхийлөгч Маурицио Макри ерөнхийлөгч Владимир Путиныг урьсандаа их баяртай байгаагаа илэрхийлсэн байна. Тэрээр “Бид гурван жилийн хугацаанд гурав дахь удаагаа уулзлаа. Энэ нь өсөн нэмэгдэж байгаа хоёр орны хоорондын  харилцааг сонирхож байгааг харуулж байна. Иймээс бид талуудын худалдааны салбарын солилцоог улам бэхжүүлэхийн тулд шаардлагатай алхмуудыг  үргэлжлүүлэн хийнэ”  гэв. Үүнээс гадна ОХУ, Аргентин “Меркосур”, Евроазийн холбооны хооронд дараагийн улиралд хийх  худалдааны хэлэлцээрийг дэмжинэ гэж хэллээ. Түүнчлэн Маурицио Макри “Их 20”-ийн хурлын үеэр шинжлэх ухаан технологи, цөмийн эрчим хүч, сансар огторгуй, хөдөө аж ахуй, аюулгүй байдал, батлан хамгаалах салбарт хамтран ажиллах хоёр орны хамтын ажиллагааны хөтөлбөрт ахиц гарсан гэж мэдэгдэв. Үүнээс гадна талууд эрүүл мэнд, загасны аж ахуй, эрчим хүч, төмөр замын тээврийн салбарт хамтран ажиллах гэрээнд гарын үсэг зурсан гэв. Харин ерөнхийлөгч Владимир Путин “ОХУ, Аргентинын хамтын ажил­лагаа хоёр орны  бүх салбарт хамтын ажил­лагаагаа үргэлж­лүүлэн бэх­жүүлэхэд чиглэж байна” гэжээ. Тэрээр “Хоёр талын Засгийн газар, байгууллагын хоорон­дын олон гэрээнд гарын үсэг зурсан. Тухайлбал, хоёр орны харил­цааг бүх салбарт бэх­жүү­лэхийг сонирхож байгааг нотолсон худал­дааны гэрээнд гарын үсэг зурсан” гэж хэлсэн байна. Мөн талуудын хийсэн хэлэл­цээр ялангуяа, хоёр орны эдийн засгийн харилцааг өргөжүүлэхэд төвлөрсөн гэж мэдэгджээ.   Гаалийн татварыг нэмэгдҮҮлэхгҮй байхаар тохиролцов АНУ-ын ерөнхийлөгч Дональд Трамп, БНХАУ-ын ерөнхийлөгч Ши Жиньпин нар Аргентинд болсон  хурлын үеэр  ирэх оны  нэгдүгээр сарын 1-нээс хойш гаалийн бараандаа нэмэлт татвар ногдуулахгүй байхаар тохиролцсон гэж Хятадын “CGTN” телевиз мэдээлэв. Телевизийн мэдээлснээр дурдсан хугацаанаас хойш нэмэлт татвар ногдуулахгүйгээс гадна талууд хэлэлцээрээ үргэлжлүүлэх юм байна. Мөн хоёр орны зүгээс “Их 20”-ийн уулзалтад оролцож байгаагаа  ашиглаж хийсэн уулзалт  Бээжин, Вашингтоны  харилцааг сайжруулахад эерэгээр нөлөөлсөн гэж мэдэгджээ. Хоёр орны ерөнхийлөгч оролцсон оройн зоогийн дараа Цагаан ордны эдийн засгийн зөвлөх Ларри Кудлов сэтгүүлчдэд “Доналд Трамп, Ши Жиньпин нарын уулзалт сайн болсон” гэж ярьсан байна. Харин ерөнхийлөгч Ши Жиньпин хурал болохын өмнө хоёр том гүрний хоорондын харилцаанд хамтын ажиллагаа нь  хамгийн сайн сонголт болохыг онцолсон байна. Цагаан ордны хэвлэлийн төлөөлөгч Сара Сандерс тэдний уулзалтын үеэр хийсэн яриаг харьцуулсныхаа дараа энэ тохиролцоог хэрэгжүүлж худалдааны маргааныг шийдвэрлэхийн тулд хоёр орны тэргүүн нар 90 хоногийн хугацаа өгсөн гэж мэдээлэв.