Жил бүр "Met Gala" нь загварын ертөнцөд огт хамааралгүй хүмүүсийн дунд ч халуун яриа өрнүүлдэг. Өнөөдөр манай гаригийн хамгийн чухал загварын арга хэмжээ бол даашинз, костюмын тухай биш, харин мөнгөөр ​​шинэ дүрэм тогтоодог тэрбумтнуудын тухай болж байна. Анна Винтурыг Жефф Безост "худалдагдсан" гэж буруутгаж байгаа бөгөөд харин алдартнууд огт өөр бодит байдалд амьдарч байгаа бололтой. Тэдний түүхээс харахад тэд Met Gala-д оролцох эсэргүүцлийн жагсаал, ивээн тэтгэгчдийн талаар биш, харин бариу корсет өмсөж ухаан алдахаас хэрхэн сэргийлэх, Метрополитен музейд хаана тамхи татах, хэдэн зуун мянган долларын үнэтэй тансаг даашинзтай яаж бие засах газар орох гэх мэт илүү энгийн асуудалд анхаарлаа хандуулж байна. Энэ оны хамгийн том үдэшлэгийн эсрэг талыг Lenta.ru нийтэлжээ.

Met Gala нь жил бүрийн тавдугаар сарын эхний даваа гарагт болдог. Хэдийгээр өвөрмөц ч энэ арга хэмжээ нь Нью-Йорк дахь Метрополитен урлагийн музейн дэргэдэх Хувцасны институтэд хандив цуглуулах гэсэн маш энгийн буяны зорилготой юм. 2014 оноос хойш тус хүрээлэнг Condé Nast-ийн контент хариуцсан захирал, Met Gala-ийн эзэгтэй Анна Винтурын нэрэмжит болгожээ.

Met Gala-гийн буяны үйл ажиллагаа нь сайн дурын үндсэн дээр заавал байх ёстой. Хувцаслалтын хүрээлэн нь ихэнх хөрөнгөө тасалбараас олдог бөгөөд үүнийг худалдаж авах бараг боломжгүй байдаг. Анна Винтур зочдын жагсаалтыг биечлэн удирддаг.

Винтураас урилга хүлээн авсан хүмүүс төлбөрөө төлөх шаардлагатай. Өмнө нь Met Gala урилга 5000 долларын үнэтэй байсан бол өнгөрсөн жил 75 000 ам.доллар болтлоо огцом өсч, 2026 онд түүхэндээ анх удаа урилга 100 000 ам.долларт хүрэв.

Энэ жилийн гала нь Хувцаслалтын хүрээлэнгийн хандив цуглуулах рекордыг эвдсэн. Хэвлэл мэдээллийн хэрэгслийн мэдээлснээр энэ арга хэмжээнд 400 орчим хүн уригдсан байна. Costume Institute 2026 Met Gala-д 42 сая долларын орлого олжээ.

Энэ жилийн Met Gala наадмын гол ивээн тэтгэгчээр 224 тэрбум долларын хөрөнгөтэй манай гарагийн дөрөв дэх баян хүн болох Амазоны үүсгэн байгуулагч Жефф Безос байсан.  Тэрээр эхнэр Лорен Санчес-Безосын хамт уг арга хэмжээний хүндэт даргаар ажилласан нь Met Gala-д ховор тохиолддог зүйл.  Өнгөрсөн жилийн Met Gala-г Амазон ивээн тэтгэж байсан бол одоо Безос болон түүний эхнэр өөрсдийгөө компани гэдгээрээ бус харин юуг ч худалдаж авч чадах маш чинээлэг, нөлөө бүхий нийгмийн хосууд хэмээн төлөөлж байна. Безос энэ жил 15 сая орчим доллар хандивласан гэсэн цуу яриа байдаг.

Загварын хүрээнийхэн шууд л Винтурыг Безост худалдагдсан тухай ярьж эхэлсэн бөгөөд Met Gala-г "тэрбумтнуудын цирк" гэж маш хурдан нэрлэсэн. Энэ дээр Матьер Фекалесийн саарал даашинзтай, долларын дэвсгэрттэй нүдний маск зүүж улаан хивсэн дээр гарч ирсэн Америкийн жүжигчин Сара Полсоны дүр нэлээд бэлгэдэлтэй харагдаж байна.

Винтур, Безос хоёрын харилцааг нууцлаг, нэр хүндтэй загварын ертөнцөд хүртэл мөнгө хэрхэн нөлөөлж байдгийг харуулах нь улам бүр нэмэгдсээр байна. Винтурын тэрбумтны гэр бүлд талтай байгаа нь Met Gala-ийн өмнөхөн Vogue-д Лорен Санчезын тухай гэрэлт нийтэлж, түүний хуримын зургийг дижитал нүүрэндээ нийтлэхэд илт болсон. Хэвлэлийн түүхэнд Ким Кардашиан, Мелания Трамп нар хоёрхон сүйт бүсгүйд ийм давуу эрх олгосон байдаг.

Винтур ч бас Безосын улс төрийн үзэл бодлыг нүдээ аниад өнгөрөөсөн бололтой. Тэрбумтан нь Дональд Трампын санд нэг сая доллар хандивлаж, тангараг өргөх ёслолд нь оролцсон байна. Харин Винтур бол Ардчилсан намын томоохон хандивлагч бөгөөд олон жилийн турш Трампыг олон нийтэд эсэргүүцэж ирсэн бөгөөд түүнийг дахиж хэзээ ч Met Gala-д урихгүй гэдгээ мэдэгдсэн.

Өмнө нь Америкийн Ерөнхийлөгч энэ арга хэмжээнд байнга зочноор оролцдог байсан бөгөөд 2004 онд Met Gala-гийн улаан хивсэн дээр Меланид гэрлэх санал хүртэл тавьж байсан. Гэвч мөнгөө төлсөн нь дуугаа сонгодог. Сэтгүүлч Роб Шүүтер дотоод мэдээллээс иш татан Безосыг Винтурын ажилыг зааж эхэлсэн гэж мэдэгдээд, жүжигчин Жастин Теруг зочдын жагсаалтад оруулахгүй байхыг ч баталгаажуулсан. Жастин Теру "Чөтгөр Прада өмсдөг-2" киноны дүр болох Амазоны үүсгэн байгуулагчтай илт төстэй Бенжи Барнсийг санагдуулдаг.

Тэрбумтан Met Gala-д идэвхтэй оролцсон нь Нью-Йоркийн гудамжинд эсэргүүцлийн жагсаалыг өрнүүлсэн. "Бүгд Элоныг үзэн яддаг" бүлгийн идэвхтнүүд Безосын Манхэттэн дэх байшингийн нүүрэн талд томоохон бойкот зарлаж, музейд 300 орчим лонхтой хиймэл шээсийг үлдээсэн зэрэг хэд хэдэн олны анхаарлыг татсан арга хэмжээ зохиосон.

Зарим од буяны арга хэмжээнд ирэхгүйгээр шийдсэн бөгөөд ингэснээр Безосын эсрэг албан бус бойкотыг дэмжив. Супермодель Белла Хадид, дуучин Оливиа Родриго, жүжигчин Зендаяа, Нью-Йорк хотын захирагч Зохран Мамдани нар ямар ч тайлбаргүйгээр арга хэмжээнд оролцоогүй.

Шүүмжлэлийн давлагаан дунд Жефф Безос улаан хивсний дээгүүр алхаж зүрхэлсэнгүй. Тэрээр үдшийн үндсэн хэсгийн дараа л хаалттай арга хэмжээнд ирсэн гэж мэдэгдсэн. Гэсэн хэдий ч түүний эхнэр Лорен Санчес-Безос эсэргүүцлээс айлгүй, Метрополитен музейн цуглуулгын хамгийн алдартай зургуудын нэг болох Америкийн зураач Жон Саржентийн "Х хатагтайн хөрөг" зургийг иш татсан Скиапареллигийн хар хөх өнгийн даашинзтай гарч ирэв.

Нэрээ нууцалсан эх сурвалжууд Винтур Безосыг "үдшийн гол муу санаатан" болгохоор төлөвлөөгүй гэж мэдэгджээ. Тэр нэмэлт дуулиан биш харин арга хэмжээндээ сайн ивээн тэтгэгчийг л хүссэн. Гэвч үзэгчид түүний үйлдлийг буруушаасаар л байв. Гэсэн хэдий ч тэд Met Gala-г дагахаа больсонгүй.

“Одоо Безос, Санчес нар Met Gala-д дээд байр эзэлсэн тул Анна Винтур аль нэг талыг сонгохоос өөр сонголтгүй байсан бөгөөд тэрээр хамгийн том чек бичдэг хүнийг сонгосон гэж хүмүүс ярьж байна” Rob Shooter- Сэтгүүлч

Met Gala-г зохион байгуулагчид эсэргүүцлийн жагсаал, бойкотуудад бэлтгэгдсэн байсан бөгөөд энэ нь тэдний хувьд ердийн үзэгдэл юм. Идэвхтнүүд ихэвчлэн Met Gala-ийн өмнөхөн нийгмийн чухал асуудлуудыг онцолж өгдөг. Энэ жилийн гол асуудал нь капитализм ба баячуудын тансаглал байсан бол 2024 оны ёслол Палестиныг хамгаалсан эсэргүүцлийн жагсаалаар нээгдэж байв.

Идэвхтнүүд музейн гадаа мөнгө, тэгш бус байдлын талаар мэтгэлцэж байхад Met Gala зочид илүү энгийн асуудлуудтай тулгардаг. Гала+д оролцогчид улаан хивсэн дээр гялалзахын тулд ундаа, уснаас татгалзаж, угаалгын өрөө орохоос зайлсхийдэг.

Их Британийн жүжигчин Оливиа Колманы стилист Миранда Алмонд олон одод Met Gala-д оролцохын өмнө идэж, уухыг хориглодог, учир нь тэдний хувцсыг нэгээс олон удаа тайлах зориулалттай биш гэдгийг хүлээн зөвшөөрсөн байна. Энэ шалтгааны улмаас олон оролцогчид улаан хивсэн дээгүүр алхах хүртлээ юм уудаггүй байна.

Америкийн загвар өмсөгч Белла Хадид ч мөн адил "Second-skin" эффекттэй Alexander Wang комбинезон өмссөнөөс болж Met Gala дээр ийм асуудалтай тулгарсан. Костюм нь цахилгаангүй, товчгүй, бэхэлгээгүй байсан. Даавууг загвар өмсөгчдийн биед шууд тааруулж, дараа нь төгс тохирохын тулд өмсгөж байгаад хэсэгчлэн оёжээ.

Хадид өөрөө дурссанчлан тэр орой бие засах газар руу орж чадаагүй, учир нь түүний комбинезон нь шууд утгаараа бие дээр "оёсон" байв. Гэсэн хэдий ч тэрээр өөрт нь маш эвтэйхэн байсан гэжээ. Бусад нь даашинзтай алхаж ч чадахгүй байхад, би бараг улаан хивсэн дээр гүйхэд бэлэн байсан гэж хошигножээ.

Америкийн дуучин Кэти Перри ч мөн ийм асуудалтай тулгарч байсан. 2017 оны Met Gala үдэшлэгт тэр үдшийн хамтран зохион байгуулагчдын нэг байсан бөгөөд Майсон Маргиелагийн асар том, олон давхар хормойтой даашинзтай, нүүрэндээ гивлүүртэй ирсэн.

Энэ хувцаснаас болж бие засах газар орох нь жинхэнэ ажил болдог гэдгийг олон од хүлээн зөвшөөрсөн.

Метрополитаны урлагийн музейн ариун цэврийн өрөө нь Met Gala-ын үеэр үргэлж онцгой газар байдаг. Энд л эрхэм зочид эцэст нь амрах боломжтой болдог. Тэнд папарацци, сурвалжлагч, шүтэн бишрэгчид байдаггүй.

Шоу бизнесийн одод сургуулийн сурагчид шиг тамхи татахаар музейн ариун цэврийн өрөөнд нуугддаг. Хамгийн хачирхалтай нь улаан хивсэн дээр биш харин ариун цэврийн өрөөнд энэ үдшийн хамгийн гайхалтай гэрэл зургуудыг авдаг. Энэ нь музейд зочдыг утсаа авч, зураг авахуулахыг хориглосон хатуу дүрэмтэй холбоотой юм. Үүний үр дүнд жилээс жилд одууд энгийн сельфи хийхээр бие засах газар руу зугтдаг. Эдгээр "хууль бус" утасны зураг авалт нь улаан хивсний төгс өнгөлсөн зургаас илүү алдартай болдог.

Олны танил хүмүүсийн өдөр тутмын асуудал, ивээн тэтгэгчийн маргаан, эсэргүүцлийн жагсаал зэрэг нь одоо Met Gala-д зориулан бүтээсэн загвар, хувцаслалтаас хамаагүй илүү яригдаж байгаа бололтой. Энэ байдлаас харахад арга хэмжээ бодит байдлаас бүрэн тасарсан элитүүдийн хаалттай үдэшлэг шиг болж байна.

Онлайнаар Met Gala-ийн талаар хамгийн их тархсан сэтгэгдлүүдийн нэг бол "Энэ мөнгөөр ​​бид хэрэгцээтэй байгаа олон зуун хүнийг хооллож, хувцаслаж болох байсан" гэжээ.

Орчуулсан З.Цэцэг

Эх сурвалж: zms.mn