Х. Оюунболд
ОХУ, Франц болон Японы ерөнхийлөгч нар ирэх сарын 24,26-нд Санкт-Петербург хотод болох Олон улсын эдийн засгийн чуулганы нэгдсэн хуралд оролцох юм байна. Энэ арга хэмжээг зохион байгуулагч “Roscongress” нийгэмлэг гаргасан мэдэгдэлдээ “Чуулганы хамгийн чухал үйл явдал нь ОХУ-ын ерөнхийлөгч Владимир Путин, Францын ерөнхийлөгч Эммануэл Макрон болон Японы ерөнхий сайд Шинзо Абэ нар оролцох гэж байгаа явдал юм” гэжээ. Мөн цахим хуудастаа ирэх сард болох хөтөлбөрт багтсан арга хэмжээний үеэр дөрвөн сэдвээр 90 гаруй үйл явдал болох талаар нийтэлсэн байна. Тухайлбал, “Өөрчлөлтийн цаг үеийн дэлхийн эдийн засаг”, “ОХУ өсөн нэмэгдэж байгаа хүчин чадлаа ашиглана”, “Эдийн засгийн хүний нөөцийн тоон систем” болон “Манлайллын төлөөх технологи” зэрэг сэдвээр хэлэлцээр өрнүүлнэ. Олон улсын энэ арга хэмжээний гол сэдэв нь “ Итгэлцлийн эдийн засгийг бий болгох” аж. Үүнээс гадна чуулганы хүрээнд их 20-ийн орнуудын бизнесийн салбарын талаар зөвлөлдөх чуулганыг хийнэ. Дэлхийн бизнесийн салбарын шилдгүүд, олон улсын байгууллагын тэргүүнүүд оролцох чуулганыг Аргентины төлөөлөгчид даргална. “Олон улсын эдийн засгийн чуулганы нэгдсэн хурал 2018”-д АНУ, Франц, Япон, Энэтхэг, Итали, Финлянд болон бусад орны бизнесийн төлөөлөгч оролцоно.
Эх сурвалж: "Зууны мэдээ" сонин
