Х.ОЮУНБОЛД
АНУ,Их Британи болон Франц Сирийн цэргийн байгууламжуудад цохилт эхэлсэн. Тэгвэл Арабын нэгдсэн Эмират улсын Засгийн газар “Эдгээр орнуудын хийж байгаа ажиллагааг өчигдөр дэмжихээ илэрхийлсэн” гэж Эмиратын “WAM” агентлагаас мэдээлэв. Мөн Арабын нэгдсэн Эмират улс “Сирид үүссэн нөхцөл байдал дордож байгаад санаа их зовж байна гэдгээ илэрхийлсэн. Түүнчлэн энгийн иргэдэд химийн зэвсэг хэрэглэж байгааг буруутгажээ. Эмиратын Гадаад хэргийн яамныхан гаргасан мэдэгдэлдээ “Хориотой зэвсгийг устгахад чиглэсэн олон улсын бүх арга хэмжээг дэмжинэ” гэж онцолжээ. Мөн мэдэгдэлд дурдсанаар “Арабын нэгдсэн Эмират улсын Засгийн газар Сири дэх алан хядагчдын гарт химийн зэвсгийг орохоос урьдчилан сэргийлэх шаардлагатай” гэжээ. Харин АНУ-ын ерөнхийлөгч Дональд Трамп Франц болон Их Британид Сирийн Засгийн газрын цэргийн байгууламжийн эсрэг өчигдөр үүрээр хийсэн ажиллагаанд хамтарсны хүчээр энэ ажиллагаа хэрэгжсэнд талархаж байна” гэв. Үүнээс “илүү үр дүнд хүрэх боломжгүй. Үйл ажиллагаа амжилтай биелэгдлээ” гэж цахим хуудастаа жиргэжээ.
УЛС ТӨРИЙН ШИЙДВЭР ГАРГАХАД НӨЛӨӨЛНӨ
НҮБ-д ОХУ-ыг төлөөлж буй элчин сайд Василий Небензиа “АНУ, Франц болон их Британийн Сирид хийсэн халдлага нь тус улсын улс төрийн шийдвэр гаргах үйл явцад нөлөөлнө” хэмээн мэдэгджээ. Мөн тэрээр энэ халдлагад оролцсон орнуудыг бодлогогүй үйлдлээсээ татгалзана. Түүнчлэн Сирийн эсрэг чиглэсэн цэргийн үйл ажиллагаагаа зогсооно гэдэгт итгэж байгаагаа илэрхийлсэн байна. Харин АНУ-ын зэвсэгт хүчний нэгдсэн командлалаас мэдэгдсэнээр эдгээр гурван орон өнгөрсөн бямба гаригийн үүрээр Хомс болон Дамаск хотод явуулсан цэргийн ажиллагаа нь Сирийн нууц химийн зэвсэгтэй холбоотой гэлээ. Мөн Пентагон ОХУ болон Сири зохион байгуулалттайгаар өдөөн хатгасан үйлдэл гэж дүгнэсэн Дума хотод болсон химийн зэвсгийн халдлагын хариу гэв. Харин Бээжин “АНУ болон түүний холбоотнуудын Сирид үйлдсэн халдлагыг буруушааж байгаагаа илэрхийлсэн” байна.
Эх сурвалж: "Зууны мэдээ" сонин
