Х. ОЮУНБОЛД
Зургадугаар сард ОХУ-д болох энэ удаагийн ДАШТ эхэлнэ. Энэ үеэр тэмцээн болох хотуудын тухай болон тэмцээнтэй холбоотой мэдээллийг хүргэе.
ДООД НОВГОРОД
Доод Новгород хот нь Европын хамгийн том Волга голын эрэгт байдаг. Олон улсын нисэх онгоцны буудал Стригино нь дотоодын болон гадаадын нислэг хүлээн авдаг. Тэндээс өндөр хурдны галт тэргээр гурван цаг гаруй явж Москвад очиж болно. Мөн ДАШТ болох Казань, Самара хот руу найман цагийн дотор очих боломжтой. Түүнчлэн усан онгоцоор Москва хүрч болно. Доод Новгород нь ОХУ-ын тав дахь том хот бөгөөд. 800 жилийн өмнө үүссэн эртний түүхтэй аж. Тухайлбал, Кремль, эртний сүм хийд болон зохиолч Максим Горькийн гэр музей зэрэг сонирхолтой газрууд олон бий. Харин хоол ундны хувьд загасаар хийсэн төрөл бүрийн хоолыг, барьсан талхтай идэж болох аж.
СОЧИ
Өвлийн олимп 2014 Сочи хотод болж байсан. Тэгвэл энэ удаад ДАШТ болох гэж байна. Энэ үеэр Сочид Москва, Санкт-Петербург, Доны Ростов, Самара,Екатеринбург болон өөр бусад хотоос онгоцоор очиж болно. Мөн галт тэргээр зорчих боломжтой ч Москвагаас 25, Санк-Петербург хотоос 40 гаруй цаг явах ажээ. ОХУ-ын зуны нийслэл гэгддэг энэ хот нь Хар тэнгисийн эрэгт, Кавказын уулсаар хүрээлэгдсэн. Сочид очсоноор байгалийн болон түүхэн дурсгалт газрыг үзэх боломжтой. Далайн усанд орж, наранд биеэ шарж, уулаар алхах эсвэл Рица нуурт очиж болно. Хэрэв хотын түүхтэй танилцахыг хүсвэл үзэх музей, хөшөө дурсгал олонтой. Мөн энэ хотын хоолны газрууд хамгийн анхаарал татдаг. Тэнд Гүрж үндэстний халуун ногоотой шөл, солянка, кинкали хэмээх банш, гэрийн аргаар бэлтгэсэн бяслаг, орон нутгийн дарс болон өөр бусад хоол, ундааг зооглож болно.
КАЛИНИНГРАД
Калининград нь Балтийн тэнгисийн эрэгт, Польш болон Литвийн хооронд байдаг учраас ОХУ-тай газраар холбогддоггүй. Тэнд Европ, ОХУ, Берлин, Варшав, Рига, Копенгаген, Прага болон Санкт-Петербургээс онгоцоор очиж болно. Харин Москвагаас галт тэргээр явахад очиход 22 цаг зарцуулдаг байна. Мөн Калининград руу хөрш орнуудаас автобусаар явж болно. Энэ хотын барилгад гот маягийн барилгын шинж давамгайлсан байдаг. Зочилж үзэж болох газруудын тоонд Калининградын сүм, орон нутгийн Амбар музей, Фридрихбург цайз болон хотын төвд байдаг том хаалганууд ордог аж. Энэ хотын хоол нь герман маягийн хоолны шинжийг агуулсан байдаг.Иймээс герман, польш болон литва үндэсний олон хоолыг идэх боломжтой.Мөн орос үндэстний борш, шарвин зэрэг хоолыг амтархаж идэж болно.
ТООЦООНЫ ТӨЛБӨРӨӨ ЦАХИМ МӨНГӨӨР ХИЙХ БОЛОМЖТОЙ
ДАШТ болоход цөөхөн сар үлдээд байна. Тиймээс ОХУ-д тэмцээн үзэхээр очих хүмүүс цахим хуудсаар дамжуулан тоглолтын тасалбар, буудлын захиалгыг өгч эхлээд байна. Харин Калининградад болох тэмцээнийг үзэх хүмүүст тус хотын зочид буудлын өрөөний тооцоогоо цахим мөнгөөр төлөх болжээ. Малина зочид буудлын эрхлэгч Анна Субботина цахим мөнгө сонирхол татаж байна. Төлбөр тооцондоо ашигладаг болох учир тэмцээн үзэхээр ирэх зочдод тооцоогоо шинэ технологийн тусламжтайгаар хийх боломж олгохоор шийдсэн. Бусад зочид буудлууд манай жишгийг дагана гэж итгэж байна гэв. Харин өөр зочид буудал одоогоор цахим мөнгөөр тооцоо хийх шийдвэр гаргаагүй байна гэж “Free-Kassa” онлайн худалдааны дэлгүүрийн захирал Виталий Лавров ярилаа. Тэрээр цахим мөнгөөр тооцоо хийх нь их сонирхолтой туршлага гэв.
Мөн бидэнд зочид буудлуудтай цахим мөнгөөр тооцоо хийх талаар хамтран ажилласан туршлага байхгүй гэв. Үүнээс гадна Петербургийн нийгмийн арилжааны банктай хамтран ажиллаж байгаа нь Санкт-Петербург хотод ийм хэлбэрээр тооцоо хийх боломж байгааг харуулж байна гэж онцлов. ОХУ-ын цахим мөнгөний “ICO” компани өнгөрсөн сард хийсэн цахим хөрөнгийн санхүүгийн тухай шинэ төсөлдөө энэ талаар зохицуулалт оруулсан байна. Мөн Эдийн засгийн хөгжлийн яам, Харилцаа холбооны яам, Хууль зүйн яам, ОХУ-ын Төв банк, болон өөр бусад банкнуудаас цахим мөнгө хэрэглэгчдийн дагаж мөрдөх журмыг зөөлрүүлэхийг хүсчээ. Гэвч үүнийг нь Санхүүгийн яам дэмжээгүй ч өнгөрсөн долоо хоногт цахим мөнгийг цаасан мөнгөн тэмдэгтийн оронд хэрэглэж болно гэж тодорхойлсон байна.
ТЭМЦЭЭН БОЛОХ ХОТ ХООРОНД ҮНЭГҮЙ ЗОРЧИНО
Тэмцээн болох хот хооронд зорчих боломжийг хангах зорилгоор 500 гаруй галт тэрэгнээс бүрдсэн тусгай нэмэлт цуваа гаргахаар болжээ. Энэхүү галт тэргээр “Fan id” картаа үзүүлээд зорчих юм байна.
Тусгай үнэгүй галт тэргээр зорчихын тулд
1.ФИФА-гийн цахим сайтнаас тоглолтын тасалбар худалдаж авах
- “Fan id” карт захиалах, хүлээж авснаа баталгаажуулах
- Үнэгүй тээврийн цахим хуудас:tickets.transport2018.com-д бүртгүүлэх
- Галт тэрэгний явах чиглэл болон суудлаа сонгох хэрэгтэй.
Тоглолтын тасалбар худалдаж авсан хугацааны дагуу явах чиглэл болон галт тэрэгний суудлын сонголт хийхийг автоматаар санал болгоно.
Бүртгүүлэх болон галт тэрэгний явах чиглэл, суудлыг сонгосны дараа зорчигч цахим хаягаар ирсэн галт тэрэгний хөдлөх замыг заасан цахим захидал хүлээн авна. Энэ захидалд таны үнэгүй хийх аялалыг баталгаажуулсан болон аялахад шаардлагатай бүх мэдээллийг багтаасан байх аж.
Үнэгүй тээврийн хэрэгслийн цахим хуудаст бүртгүүлэхийн тулд дараах мэдээллийг бөглөсөн байх шаардлагатай:
- “Fan id” картны дугаарыг бүртгүүлэх
- Хувийн мэдээлэл- овог нэр, төрсөн он сар өдөр,хүйс,үндэс угсаа, үнэмлэхний регистерийн дугаар
- Цахим хаяг
- Холбоо барих утасны дугаар
ДАШТ болох өдрийн хотын цэнгэлдэх хүрээлэн, олон улсын нисэх буудлын хооронд явах тээврийн үйлчилгээ үнэгүй. Мөн олон нийтийн тээврийн унаа, автобусаар чөлөөтэй аялах үнэ төлбөргүй аялалыг зохион байгуулна.
Эх сурвалж: "Зууны мэдээ" сонин
