Х.Оюунболд
ОХУ-ын ерөнхийлөгч Владимир Путин энэ удаагийн сонгуульд бие даан өрсөлдөж байгаа. Тэрээр сонгуулийн санал хураалтаар 76,41 хувийн санал буюу санал хураалтын тооллогоор 90 хувийн саналыг авчээ. Ингэснээр 2024 он хүртэл Ерөнхийлөгчөөр ажиллах нь тодорхой болж байна. Хэдийгээр санал хураалтын тооллогыг эцсийн байдлаар гараагүй ч түүний энэ удаагийн сонгуулиар авсан санал үүний өмнөх сонгуулиар авсан санал хураалтаас илүү байгаа юм. Мөн 2004 онд өрсөлдсөн ерөнхийлөгчийн сонгуулиар авсан хамгийн өндөр санал хураалтын дүн 71,31 хувиас ч илүү санал аваад байна. Ерөнхийлөгч Владимир Путин одоо хашиж байгаа албан тушаалаа өмнө хоёр удаа дараалан хашиж байсан. Тухайлбал, 2000-2008 хүртэл ерөнхийлөгчөөр хоёр удаа улиран сонгогдсон билээ. Гэвч тус улсын Үндсэн хуульд зааснаар гурав дахь удаагаа улиран сонгогдох эрхгүй учраас түүний дотны хүн Димитрий Медведев (Ерөнхийлөгч) болсон. Харин Владимир Путин түүний Засгийн газрын ерөнхий сайдаар сонгогдож ажилласан юм. Үүний дараа тэрээр 2012 онд дахин ерөнхийлөгчөөр сонгогдсон байна. Ерөнхийлөгч Владимир Путин 65 настай. Тэрээр түүнийг дэмжиж саналаа өгсөн болон дахин ерөнхийлөгчөөр сонгосон хүмүүст баярласнаа илэрхийлсэн байна. Владимир Путин хэлэхдээ “Намайг дэмжсэнд их баярлалаа.Та нар бол манай баг.Би бол танай багийн гишүүн. Мөн миний төлөө саналаа өгсөн бүх хүн өнөөдөр манай үндэсний шигшээ багийг бүрдүүлж байна” гэжээ. Түүнчлэн “Тэрээр сонгуулийн санал хураалтын энэ дүн нь түүнийг хүнд хэцүү нөхцөл байдалд сүүлийн жилүүдэд хийж ирсэн бүх ажлыг хүлээн үнэлж байгаагаас гадна ирээдүйн итгэл найдвар гэж үзэж байгаа хэрэг гэв. “Биднийг амжилт хүлээж” байна. Харин бид багтаа бусад нэр дэвшигчдэд саналаа өгсөн хүмүүсийг татах нь их чухал. Бид урагшлахын тулд нэгдмэл байх хэрэгтэй. Тэгэхийн тулд бид энэ орны иргэн бүрийн дэмжлэг туслалцааг авах ёстой” гэж ярьжээ. Харин ОХУ-д нэгдээд дөрвөн жил болж байгаа Крымийн хойгийн болон Севастополь хотын иргэдийн анх удаа сонгуулийн санал хураалтад оролцсон байна. Сонгуулийн комисс Крымийн хойгийн иргэдийн 60 хувь саналаа өгсөн хэмээжээ. Харин түүнийг ийнхүү ОХУ-ын ерөнхийлөгчөөр илүү давуу саналаар ялалт байгуулан сонгогдож байгаад бусад орны төрийн тэргүүн, ерөнхийлөгчид баяр хүргэсэн гэж “ВВС” агентлаг мэдээлсэн байна. Тухайлбал, Венесуэлийн Гадаад хэргийн яам ерөнхийлөгч Николас Мадурогийн өмнөөс гаргасан мэдэгдэлдээ ерөнхийлөгч Владимир Путинд баяр хүргэж байгаагаа дурджээ. Мөн өөрийн мэргэн оюун ухаан, хүч чадал, авьяас чадвараараа даван туулах шинэ сорилттой тулгарсан түүнд сайн сайхан бүхнийг болон эв нэгдлийг хүсэн ерөөж байгаагаа илэрхийлсэн байна. Үүнээс гадна Боливийн ерөнхийлөгч Эво Моралес “Твиттер цахим хуудастаа ах дүү орны ерөнхийлөгч Владимир Путинд сонгуульд ялсанд нь баяр хүргэе” хэмээн мэндчилжээ. Тэрээр “ОХУ бусад орны нэр төрийг хүндэтгэн үздэг. Мөн геополитикийн тэнцвэртэй байдлыг хангахаас гадна империализмийн оюулаас дэлхийг хамгаалдаг” гэж жиргэсэн байна. БНХАУ-ын ерөнхийлөгч Си Жиньпин түүнийг ялалт байгуулсанд нь баяр хүргэсэн цахилгаан мэдээ илгээсэн гэж “Синьхуа” агентлаг мэдээллээ.
Эх сурвалж: "Зууны мэдээ" сонин
