Э.БЭРЦЭЦЭГ
Өвчин хэлж ирдэггүй, хийсч ирдэг гэдэг. Өглөө зүгээр байсан хүн өдөр нь гэнэт дотор муухайрах, толгой эргэх, гэдэс өвдөх зовиур хүн бүрт харилцан адилгүй илэрдэг. Тийм болохоор бид энэ удаагийнхаа зөвлөгөөг жолооч нарт хүргэж байна. “Автомашин жолоодох үедээ өвчин намдаах, нойрсуулах, тайвшруулах эм битгий уугаарай. Өвчин намдаагч эм төв мэдрэлийн тогтолцоог дарангуйлах, нойр хүргэх, хөдөлгөөний баримжааг алдагдуулах үйлчлэлгээ үзүүлдэг” гэдгийг эмч нар анхааруулж байна. Хэрэв ийм эмийг машин барихаасаа өмнө уувал осол аваар гаргах магадлал өндөр гэдгийг эрдэмтэд тогтоосон байна. Тиймээс замд гарахаасаа өмнө ямар нэгэн эм уух шаардлага гарвал юуг анхаарах талаар зөвлөе.
Тайвшруулах эм уухаас зайлсхий
Ийм үйлчилгээтэй эмнээс болж зам тээврийн осол 2-5 дахин ихэсдэг гэсэн судалгааг Германы эрдэмтэд гаргасан байдаг. Европын орнуудад автозамын аваар ослын 10 хувь нь тайвшруулах эм уусан үедээ жолоо барьснаас үүдэлтэй болох нь тогтоогджээ. Тиймээс ямар нэг эмийг уухаасаа өмнө заавартай нь сайн танилц. Хэрэв эмийн заалт дээр тухайн эмийг хэрэглэсний дараа “тээврийн хэрэгсэл жолоодох, бусад өндөр анхаарал шаардсан ажил хөдөлмөр эрхлэхгүй байхыг анхаар” гэсэн байвал ууж болохгүй гэсэн үг.
Хэрэв эмийн зааварт уг эм нойрсуулах, тайвшруулах, бухимдал тайлах зэрэг үйлчлэлтэй гэж дурьдсан байвал, түүнийг уусан үедээ жолооны ард суухгүй байсан нь дээр.
Өвчин намдаах эм уусны дараа жолоо барих хэрэггүй
Ядаргааны эсрэг болон өвчин намдаах эм уусны дараа биед ямар нэг нойр хүрэх, нозоорох байдал мэдрэгдвэл жолоо барихаа хойшлуулах нь зүйтэй. Яагаад гэвэл тухайн эм өөр ямар үйлчлэл үзүүлж болохыг харзнах шаардлагатай гэсэн үг. Ер нь тайвшруулах янз бүрийн эм нь анхаарал төвлөрлийг сулруулж, хөдөлгөөний баримжааг алдагдуулах магадлал ихтэй байдаг аж.
