Б.ЗАЯА
Монгол Улсын гуравдахь Ерөнхийлөгч, МАХН-ын дарга Н.Энхбаярт эрүүл мэндийн шалтгаанаар ялаас чөлөөлөгдөх эсэх магадлан шинжилгээг эмч нар хийжээ.
Энэ талаар өчигдөр Эрүүл мэндийн сайд Н.Удвал мэдээлэв.
МАХН-ын дарга Н.Энхбаяр Шүүхийн шийдвэр гүйцэтгэх ерөнхий газар, Улсын Ерөнхий прокурорын газар болон Эрүүл мэндийн яаманд эрүүл мэндийн шалтгаанаар ялаас чөлөөлүүлэх хүсэлтээ гаргаад байсан юм. Одоогоор өвчтөний биеийн байдал тааруухан байгаа аж. Хоол идэхээ больж, шингэн зүйл ууж эхэлжээ. Ингэснээр биеийн байдал улам дордож, элэгний үйл ажиллагаа дутагдалд орж байгааг салбарын сайд дуулгалаа. Түүнчлэн өлсгөлөнгөөс үүдсэн эрхтэн системийн өвчлөл хэвээрээ, цул эрхтнүүд өвчлөлтэй байсан бол одоо хөндий эрхтэн муудаж эхэлсэн байна. Тиймээс холбогдох байгууллагууд хүсэлтийг анхааралдаа авч, эцсийн магадлах шинжилгээг хийлгэж байгаа гэв.
Шинжилгээний багт 401 дүгээр ангийн нэгдсэн эмнэлгээс хоёр шинжээч эмч, Улсын нэгдүгээр төв эмнэлгийн бөөр, мэдрэлийн нарийн мэргэжлийн эмч нар багтжээ. Тэд МАХН-ын дарга Н.Энхбаярын эрүүл мэндийн байдлыг талаар эцэслэн дүгнэж, ялаас чөлөөлөх эсэх шийдвэрийг гаргах юм байна. Энэ талаар Эрүүл мэндийн сайд Н.Удвал “Хэрэв шинжээчдийн дүгнэлтээр ялаас чөлөөлөх үндэслэлтэй гэж үзвэл прокурорт шилжүүлнэ. Хуулийн байгууллага хянаж үзсэнээр шүүх хурал хийж ялаас чөлөөлөгдөх шийдвэрийг эцэслэн гаргана” гэв. Ялаас чөлөөлөх эсэх шинжилгээ хийхийг Засгийн газраас шийдвэрлэснийг ч тэрээр хэллээ. МАХН-ын дарга Н.Энхбаяр Засгийн газарт хаяглаж, хүсэлт гаргасан учраас хүн ардын эрүүл мэндийг хариуцаж буй салбарын төв байгууллага болох Эрүүл мэндийн яамнаас эрүүл мэндийн шалтгаанаар ялаас чөлөөлөхөд шаардагдах бүх шинжилгээ, онош тодруулах, эрүүл мэндийн дүгнэлт гаргахад нарийн мэргэжлийн эмч нараар үйлчлэх үүргийг гүйцэтгэсэн гэлээ. Монгол Улсын гуравдахь Ерөнхийлөгч, МАХН-ын дарга Н.Энхбаяр өнгөрсөн долоо хоногт шийдвэр гаргагч байгууллагуудад хүргүүлсэн захидалдаа “Миний бие өнгөрсөн жилийн өлсгөлөнгөөс хойш сул дорой хэвээр байгаа бөгөөд мэргэжлийн эмч нарын комиссын зүгээс ял эдлэх боломжгүй гэсэн дүгнэлт гарсан. Энэ бүхнийг харгалзан үзэж намайг эрүүл мэндийн шалтгаанаар хуулийн дагуу чөлөөлөх асуудлыг яаралтай шийдэж өгөх хүсэлтийг тавьж байна. Мөн миний биеийг мэргэжлийн эмч нар гадаадад яаралтай явж эмчлүүлэх шаардлагатай гэсэн дүгнэлтийг гаргасныг харгалзан үзэхийг хүсч байна” гэсэн юм.
