Щвейцарийн Женев хотноо болж байгаа ДЭМБ-ын гүйцэтгэх зөвлөлийн 132 дугаар хуралдаанд оролцож буй Эрүүл мэндийн сайд Н.Удвал ДЭМБ-ын Ерөнхий захирал Доктор Маргарет Чантай албан ёсны уулзалт хийжээ. Уулзалтын үеэр сайд Н.Удвал Др. Чаны удирдлага, манлайлал дор хийгдэж байгаа тус байгууллагын бодлогыг Монгол Улсын зүгээс дэмжиж байгаагаа илэрхийлсэн байна. 2012 оны УИХ-ын сонгуулийн дүнд байгуулагдсан Шинэчлэлийн Засгийн газрын мөрийн хөтөлбөр болон эрүүл мэндийн салбарт хэрэгжүүлэх үйл ажиллагааны төлөвлөгөө зэргийг танилцуулсан байна. Мөн өвчтөний аюулгүй байдал болон эмийн аюулгүй байдлыг хангах, эрсдлийн удирдлагыг нэвтрүүлэх зэрэг чиглэлд онцгой анхаарал хандуулах тухай ярилцаж, эрүүл мэндийн салбарын удирдлагын чадавхийг бэхжүүлэх талаар ДЭМБ-ын зүгээс анхаарч, энэ чиглэлийн тусгай сургалт, хөтөлбөр хэрэгжүүлж өгөхийг Ерөнхий захирлаас хүсчээ. Үүний хариуд Др. Маргарет Чан сайд Н.Удвалын тавьсан хүсэлт, санаачлагыг хүлээн авч, өөрийн зүгээс бүхий л талаар дэмжиж ажиллахаа мэдэгджээ. Газар нутаг том, хүн ам сийрэг суурьшсан танай орны хувьд эрүүл мэндийн тусламж үйлчилгээг жигд хүртээмжтэй, цаг алдалгүй хэрхэн хүргэдэг талаар сонирхож, энэ талаар тодруулж судлах хүсэлтэй байгаагаа илэрхийлэв.
Н.Удвал сайд Др. Маргарет Чаныг 2013 онд багтаж Монгол Улсад айлчлал хийхийг урьсан юм. Харин хатагтай Др. Маргарет Чан урилгыг талархан хүлээж товыг дипломат шугамаар тохиролцохоор боллоо гэж Эрүүл мэндийн яамны хэвлэлийн албанаас мэдээллээ.
