Ч.БЯМБАХАЖИД

Хангай нутгийн байгалийн үзэсгэлэнг тодотгох Өгийнуур сум нь Архангай аймгийн зүүн зүгт оршдог. 1618 км.кв газар нутагтай, далайн түвшнээс дээш 1327-1665 метр өндөрт өргөгдсөн, хуурай дулаан уур амьсгалтай, тал хээрийн бүсэд багтдаг. Сумын төв нь аймгийн төв Цэцэрлэг хотоос 100 км, Улаанбаатар хотоос 360 км зайд оршино. Тамирын гол ба Орхон голын уулзвар орчимд байрлах тус сум нь Өгий нуурын нэрээр нэрлэгджээ. Өгий нуур нь  сумаас зүүн хойд зүгт оршдог. Архангай аймгийн ЗДТГ болон холбогдох байгууллагууд өв соёлд түшиглэсэн хангайн бүсийн өвлийн аялал жуучлалыг хөгжүүлэх зорилгоор “Ugii winterland-2026” мөсний баярыг Өгийнуур сумын зүүн урд эрэгт нэгдүгээр сарын 31, хоёрдугаар сарын 1-ний өдрүүдэд зохион байгуулах гэж байна.

Цэцэрлэг хотыг аялал жуулчлалын хот болгон хөгжлүүлж, аймгийн аялал жуучлалыг хөгжүүлэхэд онцгойлон анхаарахаа Архангай аймгийн Засаг дарга Б.Цэрэннадмид хэлж байсан.            

Тэгвэл “Ugii winterland-2026” мөсний баярыг зохион байгуулснаар гадаад дотоодын  жуучдыг татах, аймгийн түүхэн дурсгал, өв соёлыг олон нийтэд таниулах зэрэг өвлийн аялал жуучлалыг хөгжүүлэхэд чухал нөлөөтэйг зохион байгуулагчид хэлж байлаа. Өгий нуурын өвлийн үзэсгэлэн, морьтны соёлыг гайхуулах “Ugii winterland-2026” мөсний баярыг зорих дөрвөн шалтгааныг уншигч танд хүргэе.  

Нэгдүгээрт, Өгий нуурын байгалийн үзэсгэлэнг тольдох.

Хоёрдугаарт, Мөсөн шагай, сурын тэмцээнийг үзэж сонирхох.

Гуравдугаарт, Нүүдэлчин ахуй, үндэсний өв соёлын гайхамшгийг мэдрэх.

Дөрөвдүгээрт, Мөсөн дээрх цэнгээнт бүжиг, хоккейн үзүүлэх тоглолтыг үзэж шинэлэг, содон, сонирхолтой бүхнийг харж, хайртай дотнын хүмүүстэйгээ дурсамжийн хуудсаа нэмэх боломжтой юм.

Мөсний баярын эхний өдөр хамгийн гоё үндэсний хувцастай хос болон хүүхдийг шалгаруулах, мөсөн дээрх цэнгээнт бүжгийн тэмцээн, хоккейн үзүүлэх тэмцээн, тэшүүрчдийн тэмцээн, эмэгтэйчүүдийн богино зайн морины уралдаан, DJ шоу зэрэг олон сонирхолтой зүйлсийг үзэж, өдрийг уйдах завгүй өнгөрүүлэх нь.

Харин хоёр дахь өдөр нь адуучин, мөсөн сур, шагайн тэмцээн, мөсөн дээрх модон барилдаан, морьтой монголжин буухиа тэмцээн болох юм байна.

Эх сурвалж: “Зууны мэдээ” сонин

2026 ОНЫ НЭГДҮГЭЭР САРЫН 21. ЛХАГВА ГАРАГ. № 13 (7755)

 

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn