Б.Нандин
Дэлхийн агаарын хөлөг үйлдвэрлэгч томоохон компани Airbus дэлхий даяарх 6000 гаруй А320 загварын онгоцонд яаралтай засвар хийхээр эргүүлэн татахаа мэдэгдсэн. Тэгвэл энэхүү эргүүлэн татаж, засварлах ажиллагаа олон улсын нислэгүүд цуцлагдах, хойшлох гол шалтгаан болоод байна.
Airbus A320 загварын онгоцыг ашиглаж байгаа дэлхийн агаарын тээврийн бүхий л компаниуд програм хангамжийн алдааг засахаар ажиллаж эхэлсэн юм.
Хэдхэн долоо хоногийн өмнө Airbus A320 загвар нь Boeing-ийн хамгийн их нийлүүлэгдсэн загвар болох Boeing 737 онгоцыг гүйцэж түрүүлсэн амжилттай байсан ч эргүүлэн татах ажиллагаа эхэлснээр Airbus онгоц үйлдвэрлэгчдэд 55 жилийн дараах хүнд цохилт болж байна. Өнгөрсөн аравдугаар сарын Мексикийн Канкун хотоос Нью Жерси мужийг чиглэн явсан JetBlue онгоц нислэгийн үеэр өндрөө алдаж, хэд хэдэн зорчигч гэмтсэн нь Airbus-ыг эргүүлэн татахад хүргэсэн тухай эх сурвалж дурдсаныг “Ройтерс” агентлаг онцолжээ.
Бямба гарагийн эхээр Ази, Европт нислэгийн саатлыг зохицуулах тодорхой аилууд үр дүнгээ өгч эхэлсэн ч АНУ-ын хамгийн том баяр болох Талархлын баярын амралтын үеэр нислэг цуцалсан нь багагүй сорилтыг бий болгожээ. American Airlines компани 480 A320 онгоцны 209-д нь засвар хийх шаардлагатай гэжээ. АНУ-ын JetBlue агаарын тээврийн компани ням гарагт төлөвлөгдсөн 70 орчим нислэгээ цуцалсан бол United Airlines компани бямба гарагт бүх онгоцоо шинэчилсэн гэжээ.
Европын Wizz Air компани бямба гарагийн өглөө A320 онгоцондоо програм хангамжийн шинэчлэлтийг нэг шөнийн дотор хийснээр нислэг хойшлуулалгүй зохицуулжээ. Харин AirAsia 48 цагийн дотор засварыг дуусгана гэж мэдэгдсэн бол Энэтхэгийн хамгийн том агаарын тээврийн компани болох IndiGo 200 онгоцноос 160-д нь шинэчлэлт хийсэн гэжээ.
Японы хамгийн том агаарын тээврийн компани болох ANA Holdings Бямба гарагт 95 нислэгээ цуцалсан нь 13,500 зорчигчдод нөлөөлсөн гэжээ. Японы ANA болон түүний Peach Aviation зэрэг салбар компаниуд Японд Airbus A320 онгоцыг хамгийн их ашигладаг аж.
Өмнөд Солонгосын Asiana Airlines компани нислэгийн хуваарьт ямар нэгэн томоохон саад учрахгүй гэж мэдэгдэв. Өмнөд Солонгосын Тээврийн яам ням гарагийн өглөө гэхэд 42 онгоцонд шинэчлэлт хийхээр төлөвлөж байгаагаа мэдэгдэв.
Эх сурвалж: zms.mn
