Сонгинохайрхан дүүргийн иргэд хамгийн ихээр агааралдаг, алдартай газар болох Элмабаян уулан дээр Бурханы сүмийн ASEZ STAR-сурагч сайн дурынхан цуглан, байгаль орчны асуудал хурцдаж буй өнөө үед “Ногоон ертөнц” төслийн хүрээнд байгаль орчныг цэвэрлэх үйл ажиллагаанд оролцлоо. ASEZ STAR-ын сурагчид, тэдний гэр бүл, найз нөхөд гээд 90 орчим оролцогч 2025.08.28-ны Пүрэв гарагт хог хаягдал ихээр хуримтлагдсан энэ уулыг өглөө 11 цагаас өдөр 1 цаг хүртэл 2 цагийн хугацаанд цэвэрлэхэд хуванцар аяга, соруул, тамхины иш, зуушны уут, хүнсний сав баглаа боодол болон ахуйн хог хаягдал, унасан навч зэрэг хог хаягдал гарч, 230 шуудай болжээ.
“Зуныхаа амралтаар АSEZ STAR-ын найзуудтайгаа хамт эх байгалиа хамгаалах аянд нэгдэж, өнөөдрийн цэвэрлэгээний ажилд оролцож, хүмүүсийн сайн сайхны төлөө сайн үйлс бүтээж байгаадаа баяртай байна. Энэ ууланд хог хаягдал үнэхээр их байсан. Савтай кола, шилтэй архиа ууж дуусгалгүй тэр чигээр нь хаясан байсанд гайхсан. Бас унтахдаа нөмөрдөг хөнжлөө хүртэл хаяад тэр нь бороонд норж, газарт булагдаад татаж гаргахад хүнд байлаа. Бид байгаль орчноо энэ мэтээр хайхрамжгүйгээр хог хаягдлаар бохирлоод байвал ирээдүйд бидний нуруун дээрээ үүрэх ачаа улам л хүнд болно. Иймээс байгаль дэлхийгээ хайрлан, өөрсдийн гэрээ цэвэрлэдэг шиг хүн бүхний гэр болсон эх байгалиа цэвэр байлгаж, амьдрах орчноо хамгаалцгаая гэж уриалмаар байна” хэмээн ASEZ STAR-ын гишүүн сурагч М. Тэмүүлэн сэтгэгдлээ хуваалцлаа.
Өнөөдрийн цэвэрлэгээний ажлыг сайшаан дэмжиж, Сонгинохайрхан дүүргээс шуудай, бээлий хандивлажээ.
“ASEZ STAR-ын хамт олны өрнүүлж байгаа эх дэлхийгээ хамгаалах сайн үйлсийн аянд бид нэгдэж, хамтран өнөөдрийн үйл ажиллагааг явуулж байгаадаа туйлын их баяртай байна. Залуус, өсвөр үеийнхэнд нийгэмд зөв төлөвших зөв дадал суулгахад туслах үүднээс, мөн эх дэлхийгээ хайрлах, хоггүй байлгах зорилгоор өнөөдрийн цэвэрлэгээг хийж байгаа нь цагаа олсон сайхан үйл ажиллагаа боллоо. Ийм үйл ажиллагаа цаашид улам дэлгэрч түгээсэй гэж хүсэж байна. Энэ ажилд иргэд, залуучууд нэгдээсэй гэж уриалж байна” хэмээн Сонгинохайрхан дүүргийн 26-р хорооны засаг дарга Н. Зоригтбаатар ярьсан юм.
ASEZ STAR-ын албаны хүн “Ирээдүй хойч үеийн манлайлагчид болох сурагчид байгаль орчин цэвэрлэх үйл ажиллагаагаар дамжуулан оршин суугчдад таатай орчныг бүрдүүлж, байгаль хамгаалах мэдлэгийг дээшлүүлэхийн тулд өнөөдөр энд нэгдэн оролцлоо” гэв.
ASEZ STAR-ынхан өмнө нь мөн Сонгинохайрхан дүүргийн Драгон хот хоорондын автобусны буудлын терминал орчмоос 700 кг хог түүж, тав тухтай орчин бүрүүлэхэд хувь нэмрээ оруулсан байна.
ASEZ STAR гэдэг нэр нь “Сурагчид эхнээс нь дуустал эх дэлхийгээ хайрлан хамгаалахын төлөө яг одооноос эхэлцгээе” (Save the Earth A to Z, Students Take Action Right now) гэсэн утгатай. “STAR” нь сурагчид од мэт гэрэлтэн, ирээдүйн манлайлагчид болно гэсэн санааг агуулдаг аж (asezstar.org).
ASEZ STAR-аас хэрэгжүүлж буй “Ногоон ертөнц” төсөл нь дэлхий даяарх хот, далайн эрэг, гол мөрний эрэг орчмоос хог цуглуулах, мод тарих, EM шавар бөмбөг шидэх зэрэг үйл ажиллагаагаар байгаль орчноо цэвэрлэн, хамгаалах зорилготой юм.
Энэхүү төсөлд оролцсон ASEZ STAR-ын гишүүд, сурагчид байгаль орчноо хамгаалахын ач холбогдлыг мэдэрч, анхаарал халамж, хамтын ажиллагаа, нийгмийн харилцаанд суралцсан гэдгээ санал нэгтэй илэрхийлэв. Эдгээр тууштай хүчин чармайлт нь тэдэнд зөв зан чанарыг төлөвшүүлж, хариуцлагатай иргэн болж төлөвшихөд нь чухал үндэс суурь болж, олны анхаарлыг татаж байна.
ASEZ STAR бол дэлхийн өнцөг булан бүрд байдаг Бурханы сүмийн сурагчдаас бүрдсэн олон улсын сайн дурынхны баг юм. Тэд сургууль, нийгэмдээ хайраар сайн дурын ажил өрнүүлж, хүрээлэн буй орчноо хамгаалах, зан чанарыг төлөвшүүлэх, хөршөө хайрлах зэргээр эх дэлхий, хүн төрөлхтний төлөөх төрөл бүрийн үйл ажиллагаанд оролцдог юм. Гол төслүүд: ▷ Хүн төрөлхтний аз жаргалын төлөөх үнэт зүйлд суралцаж, сургуулийн хүчирхийллээс урьдчилан сэргийлэх, зан төлөвийн боловсрол олгох, кампанит ажил явуулах зэрэг үйл ажиллагаанд оролцдог Good Student төсөл, ▷ Янз бүрийн нөхцөл байдалд байгаа хүмүүстэй харилцаж, эмзэг бүлгийнхэнд тусламж үзүүлдэг Good Neighbor төсөл, ▷ Сургууль, бүс нутгийн орчныг цэвэрлэдэг Green School төсөл, ▷ Хотод мод тарьж, далайн экосистемийг хамгаалдаг “Green World” гэх мэт төсөл багтдаг байна.
ASEZ STAR нь хуурай газрын болон далайн хог хаягдлыг цуглуулах, мод тарих, “Ачлал & Талархал” аян, “Мөрөөдлийн аян” зэрэг олон төрлийн үйл ажиллагаанд идэвхтэй оролцдог. ASEZ STAR-ийн олон талт нийгмийн хувь нэмрийн хүчин чармайлт нь АНУ-ын Ерөнхийлөгчийн сайн дурын ажлын шагнал, Перугийн Үндэсний Ассамблейн даргын хүндэт өргөмжлөл, БНСУ-ын Үндэсний Ассамблейн гишүүний хүндэт өргөмжлөл, Сөүл хотын ИТХ-ын даргын хүндэт өргөмжлөл зэрэг шагналуудыг хүртсэн юм.
Тус сүм нь дэлхийн 175 орны 7800 гаруй бүс нутагт салбартай глобал сүм юм. 3,92 сая итгэгч гишүүнтэй бөгөөд Библийн үнэнд тулгуурлан Эцэг Эх Бурханд итгэдэг. Итгэгчид “Хөршөө өөрийн бие мэт хайрла” гэсэн Христийн сургаалын дагуу хайр болон үйлчлэлийг хэрэгжүүлдэг. Өнөөг хүртэл цус хандивлах, байгаль орчин цэвэрлэх, эмзэг бүлгийнхэнд туслах, гамшгийн үед тусламж үзүүлэх, урлаг соёлыг дэмжих зэрэг 31,100 гаруй үйл ажиллагаа явуулах замаар дэлхийн хөгжил, эв найрамдалд хувь нэмрээ оруулсаар ирсэн байна.
Чин сэтгэлийн сайн дурын үйл ажиллагаа идэвх зүтгэлтэй явуулсныг нь үнэлэн АНУ-ын гурван үеийн засгийн газраас Ерөнхийлөгчийн сайн дурын ажлын шагнал, Солонгосын гурван үеийн засгийн газраас Ерөнхийлөгчийн шагнал, Английн Хатан хааны сайн дурын ажлын шагнал, Бразилын Үндэсний Ассамблейн дээд шагнал болох Хууль тогтоох гавьяаны одон, Перугийн Конгрессын Хүндэт одон, “Ногоон ертөнц”, “Ногоон алим” (олон улсын байгаль орчны шагнал) зэрэг 5200 гаруй шагнал хүртээжээ.
