Р.Оюун
“Орос оронтой хамт өнгөрүүлсэн зун-2025” төсөл, хөтөлбөр энэ зун хэрхэн хэрэгжсэн талаар хэвлэлийн хурал зохион байгууллаа. Хэвлэлийн хуралд Россотрудничество агентлагийн Монгол дахь төлөөлөгчийн газрын тэргүүн, Улаанбаатар дахь “Русский Дом”-ын захирал Валерия Кильпякова, “Русский Дом”-ын орлогч захирал Александр Каламин, Анна Кулакова, Олон нийттэй харилцах, соёлын хэлтсийн дарга Батцэцэг, ТББ-уудтай хамтран ажиллах хэлтсийн дарга Владимир Зимирев, Олон нийт, хэвлэл мэдээлэлтэй харилцах зөвлөх Б.Цэрэнлхам нар оролцсон юм.
Энэ үеэр Россотрудничество агентлагийн Монгол дахь төлөөлөгчийн газрын тэргүүн, Улаанбаатар дахь “Русский Дом”-ын захирал Валерия Кильпякова “Энэ танхимд Монголын залуучууд, сэтгүүлчид, ОХУ-д болсон том төслүүдэд оролцсон залуучууд энд ирсэн байна. Владивостокоос Москва хүртэл үргэлжилсэн олон төсөлд оролцсон залуучууд олон жилийн харилцаатай Орос оронтой танилцаж шинэ анд нөхөдтэй болж ирсэн. Энэ жил 20 гаруй төсөл хэрэгжүүлж, 120 оролцогч оролцсон. 2022 онтой харьцуулахад оролцогчийн тоо нэмэгдсэн. Оролцогчид оролцсон төслийнхөө бэлэг тэмдэг болсон дурсгалын зүйлтэй ирэхийг хүссэн” гэв.
Монголын сурагч, оюутан, залуу лидерууд, улстөрчид, сурган хүмүүжүүлэгч багш гэсэн 100 гаруй төлөөлөгч энэ зун Россотрудничество агентлаг, Русский Домын түнш байгууллагуудын хөтөлбөр, төслийн хүрээнд ОХУ-д зочилсон талаар санал бодлоо хуваалцсан юм.
С.Энэрэл: Олон улсын хөтөлбөрт оролцож Монголынхоо соёлыг танилцуулсан
-Олон улсын Россотрудничествогийн “Здравствуй, Россия” хөтөлбөрт оролцсон. Энэ хөтөлбөрийн хүрээнд ард түмнүүдийн соёл гэсэн том арга хэмжээ болсон. Бид энэ арга хэмжээнд оролцож улс орнуудын соёлтой танилцсан. Бид ч мөн Монголынхоо уламжлалт ёс заншлыг танилцуулсан. Мөн Орос орны газар зүйн сэдэвтэй ширээний уралдаан тэмцээнийг өөрсдөө зохион явуулсан. Оросын нэрт эрдэмтдийн лекцийг сонссон. Үүний ачаар Оросын байгаль тэр дундаа Алс Дорнодын байгалийн тухай олон сайхан мэдээтэй ирсэн. Мөн олон орны найзуудтай болсон. Энэ арга хэмжээнд оролцсоноор хүмүүстэй харилцах миний чадвар нэмэгдсэн. Энэ хөтөлбөрт хамрагдсандаа баяртай байна. Бид олон улсын хүүхдүүдтэй оросоор харилцсан гэсэн юм.
Б.Солонго: Санкт-Петербург хотын түүх, дурсгалын газартай танилцсан
-Би тавдугаар сарын 20-24-нд Санкт-Петербург хотод зохион байгуулсан олон улсын экологийн их хуралд оролцсон. Энэ их хурал олон орныг хамарсан, бодлогын түвшинд ажилладаг, залуучуудын төлөөлөл, эрдэмтэн, судлаачдаар багаа бүрдүүлсэн нь бидний хувьд ололттой, нүд нээсэн үйл ажиллагаа болсон. Монголоос дөрвөн хүний бүрэлдэхүүнтэй очсон. Бидэнд орой нь чөлөөт цаг гаргаж өгсөн нь Санкт-Петербург хотын түүх, дурсгалын газруудаар явж танилцсан. Энэ хот маш цэвэрхэн, амьдрахад таатай орчныг бүрдүүлсэн, нийгмийн стресс багатай хот шиг санагдсан. Энэ үйл ажиллагаанд оролцсондоо баяртай байна гэлээ.
Россотрудничество нь тусгаар улсуудын хамтын нөхөрлөл, гадаадад суугаа эх орон нэгтнүүдийн асуудал эрхэлсэн болон олон улсын хүмүүнлэгийн хамтын ажиллагааны холбооны агентлаг юм. Энэ агентлагийг 80 улсад 97 төлөөлөгийн газар төлөөлөн ажиллаж байна. Агентлаг нь улс гүрнүүдийн хоорондын олон услын хүмүүнлэгийн хамтын ажиллагааг хөгжүүлэх, орчин цагийн Орос орны бодитой дүр төрхийг гадаадад бүрдүүлэх ажилд дэмжлэг үзүүлэх, тал бүрийн сэдэвт хүмүүнлэгийн хөтөлбөр, төслүүдийг боловсруулж хэрэгжүүлэхээр ажилладаг аж. Мөн гадаадад орос хэл, Оросын боловсролын систем, Оросын шинжлэх ухааны ололт, амжилтыг дэмжин түгээн дэлгэрүүлж, түнш орнуудын боловсролын байгууллагуудтай хамтарч ажиллана. “Русский дом”-ууд жил бүр Оросын их, дээд сургуулиудад гадаадын оюутнуудыг ОХУ-ын Засгийн газрын тэтгэлгээр үнэ төлбөргүй суралцуулах зорилгоор сонгон шалгаруулалт явуулдаг аж.
Россотрудничество агентлагийн Монгол дахь төлөөлөгчийн газар нь 1976 оноос эхлэн ажиллажээ. Төлөөлөгчийн газрын дэмжлэгээр Монгол Улсын нийслэл, аймгуудад 59 орос хэлний төв ажиллаж, 5000 гаруй монгол сурагч, оюутнууд орос хэл заалгаж, Орос орны соёл, өв уламжлалтай танилцаж байна.
Монголын багш, сурагчид Оросын боловсролын байгууллагуудаас зохион явуулдаг олон улсын ажиллагаа, олимпиад, бага хурал, уралдаанд идэвхтэй оролцдог ажээ. 2014 оноос эхлэн Монголын иргэд, эх орон нэгтнүүдийн дунд Орос улсад суралцуулах зорилгоор сонгон шалгаруулалт явуулах нэгдсэн операторын үүргийг Россотрудничество агентлагийн Монгол дахь төлөөлөгийн газарт шилжүүлжээ.
Эх сурвалж www.zms.mn
