Б.Баяр
“ДЦС-4”-ийн удирдлагууд техникийн даалгавраа зарим компанид тааруулан засаж, 3.8 тэрбум төгрөгийн өндөр үнэ санал болгосон компанийг шалгаруулсан уу”, мөн “Хууль бус тендерт Б.Чойжилсүрэн сайд гараа дүрсэн үү” гэх агуулгатай мэдээллүүд арваад хоногийн өмнө зарим мэдээллийн хэрэгслүүдэд нийтлэгдсэн.
Энэ талаар "ДЦС-4" ТӨХК-ийн “Үнсэн сан №3-ын их засвар”-ын тендерийн үнэлгээний хорооноос тайлбар хийлээ. Тэд “…“ДЦС-4” ТӨХК-ийн Үнэлгээний хороо нь “Үнсэн сан №3-ын их засвар”-ын ажлыг 2025 оны төлөвлөгөөнд тусгагдсаны дагуу нээлттэй тендер зарлаж, “ТБОНӨХБАҮХА тухай хууль”-ийн дагуу үнэлж, шалгаруулсан. Энэхүү тендерийн үнэлгээний үйл ажиллагаанд Эрчим хүчний яам болон аливаа гаднын байгууллага, хувь хүн нөлөөлөх боломжгүй бөгөөд зөвхөн Үнэлгээний хороо “ТБОНӨХБАҮХА тухай хууль”, холбогдох журмын хүрээнд бие даан, хараат бус шийдвэр гаргадаг. Гэвч зарим мэдээллийн сайтад “…“ДЦС-4”-ийн удирдлагууд техникийн даалгавраа зарим компанид тааруулан засаж, 3.8 тэрбум төгрөгийн өндөр үнэ санал болгосон компанийг шалгаруулсан уу”, мөн
“Хууль бус тендерт Б.Чойжилсүрэн сайд гараа дүрсэн үү” гэх агуулгатай мэдээллүүд нийтлэгдсэн нь олон нийтэд ташаа ойлголт өгөхөд хүргэсэнд бид гүнээ харамсаж байна.
“ТБОНӨХБАҮХА тухай хууль”-ийн 27.1. “Захиалагч шаардлагад нийцсэн тендерийг энэ хуулийн 11.4-т заасан үнэлгээний үндсэн шалгуурын дагуу үнэлнэ”, 27.5. “Тендерийг энэ хуулийн 11.4.1-д зааснаар үнэлэхэд харьцуулах үнийг, энэ хуулийн 11.4.2-т зааснаар үнэлэхэд санхүү, төсвийн асуудал эрхэлсэн Засгийн газрын гишүүний баталсан аргачлал, зааврын дагуу тооцсон үнийг тус тус өсөх дарааллаар эрэмбэлж, эхэнд эрэмбэлэгдсэн тендерийг хамгийн сайн тендер гэж үзнэ” гэсний дагуу үнэлж, шаардлагад нийцсэн хоёр тендерийн хамгийн бага үнэтэйг шалгаруулсан. Тендер шалгаруулалттай ямар ч хамааралгүй байгууллага, хувь хүмүүсийн нэр хүндэд халдсан ор үндэсгүй, илт худал мэдээлэл түгээж байгаа нь хууль бус үйлдэл бөгөөд бид цаашид холбогдох хууль, шүүхийн байгууллагад хандан шийдвэрлүүлэх болно.
“ДЦС-4” ТӨХК нь аливаа тендерийн үйл ажиллагааг ил тод, шударга зарчимд тулгуурлан хэрэгжүүлж, Монгол Улсын холбогдох хууль тогтоомжийн дагуу ажилладаг болохыг албан ёсоор мэдэгдэж байна” гэлээ. Тодруулбал, тус компанийнхан “…. Бид аливаа тендерийг ил тод, шударга зарчмаар, хуулийн дагуу шалгаруулдаг Энд яригдсан Үнсэн сангийн их засварын тендерийг ч хуулийн дагуу шалгаруулсан. Илт худал, ташаа мэдээлэл түгээсэн асуудлыг шүүхэд хандаж шийдвэрлүүлнэ” гэв.
