С.УРТНАСАН

Өнөөдөр “Гепатиттай тэмцэх дэлхийн өдөр” тохиож байна. Олон улсын болон үндэсний хэмжээнд гепатитын вирусийн талаарх ойлголт, мэдлэг мэдээллийг дээшлүүлэх зорилгоор Дэлхийн 100 гаруй улс оронд энэхүү тэмдэглэлт өдрийг хүлээн зөвшөөрч тэмдэглэж иржээ. Харин Монгол улс 2011 оноос эхлэн жил бүрийн долоодугаар сарын 28-ны өдрийг гепатит өвчинтэй тэмцэх өдөр болгон тэмдэглэсээр ирсэн бөгөөд өнөөдөр Эрүүл мэндийн төвд "Гепатитын халдварын тархалтыг таслан зогсоож элэгний хавдраас сэргийлье!" уриатай өдөрлөгийн нээлтийг Эрүүл мэндийн төвийн дарга хийв.

Энэхүү өдөрлөгийн тохиолдуулан их эмчийн ЭХО үзлэг, эмчийн зөвлөгөө, лаборатороор элэгний В,С вирусийн шинжилгээ хийх, иргэдэд чиглэсэн "Гепатитын вирусийн халдварын тухай, дамжих зам, эрсдэлт хүчин зүйл, халдвараас хэрхэн сэргийлэх, вакцины ач холбогдлын талаар мэдээлэл, сургалт сурталчилгааг хийж байна. Мөн "Та элэгний хорт хавдраас сэргийлж чадна" гэх нэртэй гарын авлагыг эмнэлгээр үйлчлүүлж буй 20 иргэнд түгээжээ. Үзлэг шинжилгээ үргэлжилсээр байгаа ба Гепатитын вирусийн архаг халдвартай хүмүүсийн олонх нь халдвартай гэдгээ мэддэггүй бөгөөд цаг алдалгүй шинжилгээ хийлгэж эмчлүүлэх ёстой гэдгийг анхаарууллаа. Дэлхий дахинд вируст гепатитаас шалтгаалсан нас баралт нэмэгдэж байгаа бөгөөд 2019-2022 оны хооронд 2 саяар нэмэгдсэн байна. Мөн 2024 онд Монгол улсад 213 хүн шинээр гепатитын вирусийн халдвартай гэж оношлогджээ. Гепатитын В,С вирусийн халдвартай 304 сая хүн амьдарч байгаагаас долоон сая нь гепатит В, 12.5 сая нь гепатит вирусийн эсрэг эмчилгээнд хамрагдсан гэж Эрүүл мэндийн яамнаас мэдээллээ.

Эх сурвалж: zms.mn