Чулуунхүүгийн БЯМБАХАЖИД
Хятад, Монголын хамтарсан багийн сэтгүүлчид энэ сарын 10-18-ныг хүртэлх хугацаанд БНХАУ-ын Тунляо, Улаанхад, Ухань хотод ажилласан юм. Ингэхдээ тухайн хотуудын хөгжил, түүхэн соёлын өв, техник технологи, МАА, ногоон хөгжлийн ахиц дэвшил болон сонирхолтой зүйлстэй танилцсан урт өдрүүдийг өнгөрүүллээ.
Хамтарсан багийн сэтгүүлчдийн ӨМӨЗО-ны Тунляо, Улаанхад, Баарин баруун хошуунд ажилласан өдрүүдийн тухай нийтлэлийг бид энэ сарын 16, 24-ний сонины дугаартаа нийтэлсэн билээ.
Харин өнөөдрийн дугаартаа уншигч та бүхэнд БНХАУ-ын Хүбэй мужийн Ухань хотод ажиллан, агаарын метро, робот хөгжүүлэлтийн парк, автомашины үйлдвэр болон бусад зүйлтэй танилцсан тухай нийтлэлээ хүргэж байна.
Ухань хотод ирсэн хүмүүс агаарын метрогоор аялж, хотын эргэн тойрныг харах боломжтой
Хамтарсан сурвалжилгын хүрээнд Ухань хотод ажилласан хоёр дахь өдрөө тус хотын “Гуангу Гуанзы” нэрэмжит агаарын төмөр замын компаниар зочлон “Дүүжин метро”-ний үйлдвэрлэлтэй танилцсан юм. Метроны дизайныг шийдэхдээ эртний барилгын уламжлалт хийцийг орчин үеийн өнгө төрхтэй хослуулан бүтээжээ. Ухань хотод ирсэн хүмүүс ихэнх тохиолдолд агаарын метрогоор аялж, хотын эргэн тойрныг харах дуртай байдаг байна. Тус дүүжин метрог 2023 оны есдүгээр сараас ашиглалтад оруулжээ. Метроны замыг дээр нь суурилуулсан тул “дүүжин метро” хэмээн нэрлэжээ. Уг метро нь 220 хүний багтаамжтай, 39 суудалтай, зургаан зогсоолтой, 24 метр урттай, 2.25 метрийн өргөнтэй аж. Мөн 60 км цагийн хурдаар 10.5 км замыг жолоочгүй автомат удирдлагын шийдлээр туулдаг байна.
Метрог хотын нийтийн тээврийн хүртээмжийг нэмэгдүүлэх, гадаад, дотоодын аялагчдад хотын өнгө үзэмж, сонин сайхныг харуулах зорилгоор жуулчдын хэрэгцээнд зориулан бүтээсэн бөгөөд энэ нь Хятад улсын хэмжээнд хамгийн анхных гэдгээрээ онцлог юм. Түүнчлэн 270° харах чадвараараа Хүбэй мужийн Үхань хотоор зочилж буй дэлхийн жуулчдын заавал очих газрын нэг болжээ. Агаарын метрогоор зорчих иргэн нэг удаагийн тасалбарыг 30 юань, өдрийн турш зорчих тохиолдолд 40 юань, нэг сарын турш аялахаар бол 120 юаныг төлж зорчих боломжтой аж.
Мөн ахмад настнууд 50 хувийн хямдралтай зорчих бол бага насны хүүхдүүд үнэгүй үйлчлүүлэх юм байна. Цас бороотой үед метро хэвийн горимоор ажиллах бөгөөд салхины хурд ихсэх тусам автомат мэдрэгч ажиллаж метро өөрөө хурдаа багасгаж зогсдог аж. Сонирхуулахад дүүжин метрог 100 жилийн хугацаанд ашиглахаар бүтээсэн байна.
Мөн манай улс ч дүүжин тээврийн угсралтын нэгдүгээр шугамын бүтээн байгуулалтыг 2026 оны эхний улиралд ашиглалт оруулах төлөвлөгөөтэй байгаа аж. Дүүжин тээвэр ашиглалтад орсноор иргэд Яармагаас хотын төвийн зүүн хэсэг рүү автомашингүй зорчих боломж бүрдэж байгаа нь замын түгжрэлийг бууруулах болон аялал жуулчлалд эерэг нөлөөтэй гэдгээрээ дээрхтэй адил бүтээн байгуулалт болох юм.
Ирээдүйд үйлчилгээний салбарт ажиллах боломжтой хүн төрхтэй роботуудыг хөгжүүлж байна
Үргэлжлүүлэн бид Ухань хотын хүн төрхтэй робот хөгжүүлэх инновацын төвд зочилсон юм.
Эл инновацын төв нь Хятад улсын хамгийн том судалгааны төв төдийгүй бүтээсэн роботын тоогоороо улсдаа тэргүүлдэг. Зах зээлийн хэрэгцээ шаардлагад нийцүүлэн судалгааны ажил явуулж, хүн төрхтэй робот бүтээх, эл роботын үндсэн технологид хэрэглэгдэх чип, бусад олон нэр төрлийн төхөөрөмж үйлдвэрлэн, роботыг үйл хөдлөлд сургах туршилт явуулан ажиллаж байна. Биднийг парктай танилцах зуур роботууд бүжгийн үзүүлбэр үзүүлсэн нь тун сонирхолтой байлаа. Мөн энэ төвд роботоор бараа сонгуулах, кофе чанаж аягалуулах, өндөр настанд туслах, цай зөөх, хувцас эвхэх, гадаа талбайд ажиллах, ХАА-д туслах зэрэг олон ажлыг гүйцэтгүүлэх туршилтыг явуулж буй үйл явцтай танилцсан. Мөн тус төв хүн төрхтэй роботыг таван төрлөөр бүтээж байна. Үүнд,
1.Тэгш бус гадаргуу, өгсүүр уруу газар явдаг
2.Биеийн хүч шаардсан ажил
3.Нарийн мэргэжлийн ажил гүйцэтгэдэг
4.Хил хамгаалах зэрэг цэрэг армийн ажил хийх
5.Хүнд туслах, хэл яриагаар аливааг тайлбарлах гэсэн төрлүүдтэй. Энд үйлдвэрлэгдэж буй роботуудын хөгжүүлэлттэй танилцахад үнэхээр сонирхолтой байсны зэрэгцээ ирээдүйд хүмүүсийн хөдөлмөрийг бүрэн хөнгөвчилөх боломжтой гэдэг нь анзаарагдаж байсан юм.
“Эжөү Хуаху” нисэх буудал нь жилд 3.3 сая тонн ачаа тээвэрлэж байна
Үүний дараа сурвалжилгын баг “Эжөү Хуахү” олон улсын ачаа тээврийн нисэх онгоцны буудалд хүрч, Хятадын төв хэсгийн гадаад худалдааны хил дамнасан тээврийн байдалтай танилцсан юм.
“Эжөү Хуахү” олон улсын ачаа тээврийн нисэх онгоцны буудал нь Хятадын Хүбэй мужийн Эжөү хотын Эчэн дүүрэгт байрладаг. Азийн анхны мэргэжлийн ачаа тээврийн төв болсон нисэх онгоцны терминал гэдгээрээ онцлог юм.
Мөн ачааны нислэгийн тоогоор улсынхаа хэмжээнд гуравдугаарт ордог бөгөөд Хятад улс дотроо 58 хот, гадаадын 42 улсын хотод ачаагаа тээвэрлэн хүргэдэг аж. Түүнчлэн саяхан Уханиас АНУ-ын Нью-Йорк хот хүрэх ачаа тээврийн шууд нислэгийн зам нээсэн байна.
Уг терминалын барилга нь 15 мянган квадрат метр талбайг хамарсан бөгөөд нисэх онгоцонд гарах зургаан гүүртэй. Холын зайн хоёр нисэх замын урт нь 3600 метр, өргөн нь 45 метр байдаг. Жилд 3.3 сая тонн ачааг тээвэрлэх хүчин чадалтай, ачааны нислэгүүдээ шөнийн цагт голдуу явуулдаг байна.
Агаарын ачааны терминал нь 23 мянган квадрат метр талбайтай. Нийт 124 ачаа тээвэрлэх зогсоолтой бөгөөд онгоц засварын төв, хяналтын 80 метрийн өндөр цамхаг, ачааны агуулах, оффис зэргээс бүрджээ. Мөн цагт 280 мянган ачаа барааг ялган, тээвэрлэлтэд бэлдэх хүчин чадалтай байна. Удахгүй энэ хүчин чадлаа нэмэгдүүлж цагт нэг сая ачаа барааг ялган тээвэрлэлтэд бэлтгэх зорилго тавин ажиллаж байгаа аж.
Онгоцны буудлын ойр орчимд томоохон ачаа тээврийн компанийн агуулахууд, гааль, татвар, хяналтын байгууллагууд байрладаг.
Түүнчлэн тус онгоцны буудлыг түшиглэн нэг сарын өмнө ашиглалтад оруулсан цахим (live) худалдааны төвөөр дамжуулан агаараар ирсэн экспорт, импортын бүтээгдэхүүнийг захиалагч компаниуд өөр өөрсдийн агуулах руу зөөхгүйгээр нийтэд хандан сурталчилгаа явуулж, худалдан борлуулдаг болжээ. Ингэснээр ачаа бараагаа тээвэрлүүлэгч олон компанийн дэмжлэгийг хүлээгээд байгаа аж.
“Дүнфэн Ланьтү” автомашины үйлдвэр хоёр минутад нэг машин үйлдвэрлэж байна
Хамтарсан сурвалжлагын сүүлийн өдөр “Дүнфэн Ланьтү” 56 жилийн түүхтэй автомашины үйлдвэрээр зочлон, орчин үеийн автомашины үйлдвэрлэлийн салбарын хөгжилтэй танилцсан юм.
Үйлдвэрийн хаалгаар ороход төрөл бүрээр нь угсарч буй машинууд байлаа. Дүнфэн Ланьтүн автомашины үйлдвэр нь цахилгаан эрчим хүчээр ажилладаг, хэрэглэгчийн тохь тухыг хангасан орчин үеийн загвартай, Хятадын уламжлал, соёлыг шингээсэн автомашиныг үйлдвэрлэн зах зээлд нийлүүлж байна.
Автомашины үйлдвэрлэлийн 90 хувь автомат, 10 хувь нь хүний оролцоотой юм. Үйлдвэрлэж буй машинуудаас хамгийн борлуулалт сайтай нь гэр бүлийн зориулалтай машин юм. Энэ машин 320-420 мянган юанийн үнэтэй борлуулагдаж байна.
Автомашинууд нэг удаагийн цэнэглэлтээр 1400 гаруй км явах боломжтой бөгөөд цэнэглэгч баттерейг аюулгүй бат бөх байгаа эсэх эрсдлийг урьдчилан тооцоолж хянаж чаддаг хяналтын системтэй аж.
Тус компани 2022 оноос эхлэн автомашинаа гадаад зах зээлд экспортлож эхэлсэн байна. Одоогоор дэлхийн 30 гаруй улсад автомашинуудаа нийлүүлдэг төдийгүй 200 гаруй хотод 480 салбар дэлгүүрээ нээжээ.
Түүнчлэн дунджаар нэг цагт 29.5 машин үйлдвэрлэдэг буюу хоёр минутад нэг машин үйлдвэрлэж байна.
Тус компанийн ажилчдын 43 хувь нь автомашин судалгааны чиглэлээр ажилладаг аж. Мөн жил бүр загвар, тоног төхөөрөмжийн шинэчлэлийг хийдэг төдийгүй аюулгүй байдлыг дээд зэрэгт ханган ажилладаг байна.
Улмаар 2024 онд 85,700 цахилгаан машиныг тус үйлдвэр 30 гаруй улсад борлуулсан нь өнгөрсөн оны мөн үеэс 70 хувиар өссөн үзүүлэлт болжээ.
Дашрамд дурдахад, үйлдвэрлэлд 30 хувийн урьдчилгаа төлөхөд долоо хоногийн дотор автомашиныг үйлдвэрлэн хэрэглэгчдэд хүргэдэг байна.
Ухань боомт Хөх мөрний тээврийн төвийн бүтээн байгуулалтад дээд амжилтыг тогтоожээ
Үүний дараа бид эцсийн өртөө “Ухань” боомтод хүрч очсон юм. Ингэснээр Хятадын эх газрын боомтуудын бүтээн байгуулалт, “Бүс ба зам”-ын өрцөнд байрлах боомтын үйл ажиллагаатай танилцсан юм.
Хөх мөрний дунд хэсэгт байрлах Ухань боомт нь Зам тээврийн яамнаас тогтоосон усан зам, төмөр замын тээврийн чухал боомт юм. Түүнчлэн үндэсний дунд хэсгийн хөгжлийн стратеги, Хөх мөрний усан зам, Уханий усан тээврийн төвийн бүтээн байгуулалтад чухал үүргийг гүйцэтгэжээ. Тус боомт дээд талдаа 12 мянган тоннын даац бүхий хөлөг онгоцны зогсоолтой. Мөн 700 мянган тонн хүчин чадлын даацтай, 50 тонн өргөх хүчин чадалтай төдийгүй 500 мянган стандарт чингэлэг хүлээн авч, 30 сая тонн ачаа тээвэрлэх хүчин чадалтай юм.
Улмаар 2019 онд Үхань боомтын чингэлэг нэвтрүүлэх хүчин чадал 1.69 саяд хүрсэн нь өнгөрсөн оны мөн үеийнхээс 8.1 хувиар нэмэгдэж, түүхэн дээд амжилт тогтоосон байна. Түүнчлэн 2019 оны арванхоёрдугаар сард 180 мянган стандарт чингэлгийг ачаалсан нь нэг сарын хугацаанд гарсан дээд амжилт болж, Үхань боомт Хөх мөрний тээврийн төвийн бүтээн байгуулалтад бас нэгэн амжилтыг бүтээжээ.
2025 оны нэгдүгээр сард Ухань боомтын дөрвөн зогсоолоор олон улсын хөлөг онгоцыг түр хугацаагаар нэвтрүүлэхийг зөвшөөрч, Хөх мөрний усан замын чухал боомтыг байгуулж байна.
Ухань боомт нь зөвхөн нэг боомт төдийгүй Янлүө, Жинкай, Байхүшань, Жяншя, Жүчэн, Чиншань, Линсыфан, Кайдянь, Дуншихү зэрэг есөн боомтын бүстэй.
2.44 сая арилжааны тээврийн хэрэгсэл, 10 сая стандарт чингэлгийг тээвэрлэх системтэй болсноор Хөх мөрний дунд болон дээд хэсэгт байрлах “Боомтын хөлгийн анги” нь шинэ аяллын шугамыг тогтоожээ. Ингэснээр 2035 он гэхэд Ухань боомтыг олон улсын хэмжээнд хүргэж, цар хүрээг нь тэлж шинэчилэх юм. Тодруулбал, тээврийн зангилаанаас логистикийн нийлүүлэлтийн сүлжээний зангилаа болж өргөжин, үндэсний логистикийн чухал төв болгох аж.
Хөх мөрний эдийн засгийн бүс болон “Бүс ба зам” санаачилга энд огтлолцож, Хятадын нээлттэй байдлыг дэлхий дахинд ойлгуулан таниулж байна.
Ийнхүү 10 хоногийн хугацаанд хоёр орны сэтгүүлчид харилцан туршлага хуримтлуулж, урд хөршөөс улс эх орондоо авч хэрэгжүүлж болохуйц шинэлэг санаа, дэвшилтэт технологийн талаар үзэж харсан арвин баялаг томилолт байлаа.
Эх сурвалж: “Зууны мэдээ” сонин
2025 ОНЫ ЗУРГААДУГААР САРЫН 25. ЛХАГВА ГАРАГ. № 118 (7615)
