Д.БОЛОР
Үндэсний аюулгүй байдлын зөвлөлд ажиллаж байсан албан тушаалтнууд гадаад, дотоодын компанид албан тушаал эрхлэх, зөвлөхөөр ажиллахыг хориглох боллоо. Ерөнхийлөгч асан Н.Багабанди, П.Очирбат нар гадаадын хөрөнгө оруулалттай компаниудад зөвлөхөөр ажиллаж байгаа нь үндэсний аюулгүй байдалд хортой гэж Г.Уянга гишүүн үзэж байна. Түүний санаачилсан хуулийн төслийг хэлэлцэх асуудлыг өнгөрсөн баасан гаригийн чуулганаар дэмжсэн. Мөн энэ өдрийн чуулганаар МАН-ын гишүүд байнгын хороодод хамаарах асуудлыг шийдсэн бол үдээс хойшхи хуралдаанд Ерөнхийлөгч хаалттай мэдээлэл хийсэн юм. 
Хаалттай мэдээллийн үндсэн санаа нь үндэсний аюулгүй байдалд онцгой анхаарах ёстой. Мэдээлэл задрах, задруулах явдал гарч болзошгүй нь хэмээгээд Монголын язгуур эрх ашигт харшлах зарим баримтыг дурьдаж өгсөн гэнэ. Тэрээр хаалттай хийсэн мэдээллийг гадагшлуулахгүй байхыг гишүүдэд хатуу сануулсан байна. Ингээд үдээс өмнөх чуулганы хуралдааны тоймыг хүргэе.
Г.Уянга:
-Төрийн өндөр албан тушаал хашиж байгаа болон хашиж байсан хүн дотоод, гадаадын компанид зөвлөхөөр ажиллаж байгаа нь төрийн бодлого, мэдээллийг ашиглуулагч болон хувирч болзошгүй. Өнөөдөр Ерөнхийлөгчийн алба хашиж байсан П.Очирбат, Н.Багабанди нар гадаадын компаниудад зөвлөхөөр ажиллах нь хэр зохимжтой вэ. Энэ үүднээс хуулийн төсөл санаачлан боловсруулж, төсөлдөө Монгол Улсын Үндэсний аюулгүй байдлын зөвлөлийн гишүүнээр ажиллаж байсан хүмүүсийг ҮАБЗ-ийн тэргүүний зөвлөхөөр ажиллуулах орон тоо бий болгох, улмаар туршлагатай хүмүүсийг төрийн бодлого боловсруулахад татан оролцуулах өөрчлөлтийг тусгасан. Түүнчлэн зөвлөх нь Засгийн газрын гишүүний тухайн үеийн цалинтай тэнцэх хэмжээний цалин авах, бусад баталгаагаар хангагдах нь зүйтэй.
Б.Гарамгайбаатар:
-Төрийн гурван өндөр алба хашиж байсан хүмүүс хуулийн дагуу бүрэн эрхийн хугацаагаар төрийн тусгай хамгаалалтад бий. Тэгээд ч томоохон аж ахуйн нэгжүүдэд зөвлөгөө өгөх, их, дээд сургуулиудад багшлах зэргээр улс төрд ажилласан туршлагаа ашиглаж ажиллах нь зүйтэй. Энэ төсөл хүний эрхийг хязгаарлаж байгаа учраас дэмжихгүй.
Б.Болор:
-ҮАБЗ-ийн гишүүнээр ажиллаж байсан хүн бизнес эрхлэх, компанид хувь эзэмших эрхийг хязгаарлах, ҮАБЗ-ийн тэргүүний зөвлөхөөр өөрсдийнх нь саналыг харгалзалгүй шууд томилохоор тусгасан нь учир дутагдалтай. Иймд төслийг боловсронгуй болгож байж хэлэлцэх нь зүйтэй юм.
УИХ-ын дарга З.Энхболд:
-Төсөлд ҮАБЗ-ийн гишүүнээр ажиллаж байсан бүх хүмүүст насан туршийн цалин, хангамж олгохоор тусгасан нь боломжгүй. УИХ-ын даргыг энд хамруулах шаардлагагүй. Одоо мөрдөж байгаа хуулийн дагуу тусгай хамгаалалт нь Ерөнхийлөгчөөс бусад албан тушаалтанд заавал байх шаардлагатай эсэхийг дахин авч үзэх ёстой. Ерөнхийлөгч байсан хүн гадаад, дотоодын аж ахуйн нэгжид зөвлөгөө өгч, давуу байдал олгохыг хориглох зэргийг хуульд зохистойгоор тусгах шаардлагатай.
Р.Гончигдорж:
-ҮАБЗ-ийн гишүүнээр ажиллаж байсан хүмүүс олж авсан мэдлэг, мэдээллээ тодорхой нэг сонирхлын бүлэгт ашиглахыг хязгаарлах, энэ хүмүүсийн тодорхой эрх Монгол Улсын нийтлэг эрх ашгаар хязгаарлагдах нь зайлшгүй асуудал бөгөөд үүнийг харгалзан үзэж, хуулийн төсөлд тусгах нь зүйтэй гэсэн санал хэлэв. Харин Д.Эрдэнэбат гишүүн ҮАБЗ-ийн гишүүн байсан хүмүүсээс зөвхөн Ерөнхийлөгчөөр ажиллаж байсан хүнийг насан туршид нь тусгай хамгаалалтад байлгах хэрэгтэй. ҮАБЗ-ийн тэргүүний зөвлөхөөр ажиллуулах, албан үүргээсээ чөлөөлөгдсөний дараа улс төр, бизнест оролцохгүй байх асуудлыг судалж, гэр бүлээр нь төрийн хамгаалалтад авахаар хуульчилж өгөх нь зүйтэй гэлээ. Энэ мэтчилэн дэмжсэн, дэмжээгүй 20 гаруй гишүүн үг хэлсний дараа төслийг дэмжээний байнгын хорооны шийдвэрийг няцааж, дахин Аюулгүй байдал, гадаад бодлогын байнгын хороонд шилжүүлэв.
