УИХ-ын гишүүн Ж.Энхбаяр 2012 оны арав­дугаар сарын 26-29-ний өдрүүдэд Төв аймгийн Мөнгөнморьт сумын нутаг дахь Хан Хэнтийн тусгай хамгаалалттай газарт харьяалагддаг хөвчид хул­гайгаар ан хийсэн тухай бид өмнө нь мэдээлж бай­сан. Ж.Энхбаярын энэ хэргийг Төв аймгийн Цаг­даагийн газрынхан шал­гаж эхэлжээ.

Тэрээр дөрвөн өдрийн турш нисдэг тэргээр ан хийж буйг Хан Хэнтийн Тусгай хамгаалалттай газ­рын байгаль хамгаалагч мэдсэн ч мориноос өөр унаагүй тул алсаас дуран­дан ажигласан аж.

Мөн тухайн үед Мин­жийн рашааныг бараадаж очсон хүмүүс Ж.Энх­баярын 34 удаа буудаж, онгоцоо дөрвөн удаа газардуулсан тухай ярьж байв. Түүнтэй хамт явж байсан Улсын заан Б.Соронзонболд агнасан гахайг нь өргөж байгаад зургаа татуулж байсан. Б.Соронзонболд  уг гэрэл зургийг фейсбүүктээ та­виад удалгүй устгасан ч “олны хүртээл” болоод үлджээ. Цагдаагийнхан ч гэрэл зургийг нотлох ба­римт болгон авсан байна.

 Юутай ч хоёр гахай агнасан, өөр  ямар ан агнасныг нь тогтоохоор холбогдох байгууллагууд ажиллаж байна.Түүнчлэн эрхэм гишүүнтэй хамт Мөнгөнморьтын харьяат эрхэм хамт явж газарчилж өгсөн бөгөөд эрхэм ги­шүүн өдөр нь ан хөөж, шөнө нь Мөнгөнморьтын Хорих ангид хонож бай­жээ. Ж.Энхбаяр гишүүн Батлан хамгаалах яамны онгоцоор ийн зугаацаж явсан гэх мэдээлэл байна.

Харин хэргийг цагдаа­гийн­хан анхааралдаа авч, шалгаж эхэлсний дараа гэрчүүд болон байгаль хам­­гаалагчийн мэдүүлэг бүдгэрч эхэлсэн тухай эх сурвалж  хэлж байна. Тод­руулбал, байгаль хамгаа­лагч нь “Доороо улаан зураастай онгоц хөвч дээ­гүүр эргэлдэхийг л харсан. Ан хийсэн, хэн явсан зэр­гийг мэдээгүй” хэмээн мэ­дүүлж эхэлсэн гэнэ.