Хүүхдийн төлөө үндэс­ний газрын удирдлагууд оны өмнөхөн эмзэг бүл­гийн хүүхдүүд байрлаж, амьдарч байгаа байгуул­лагуу­даар явж тэднийг эргэлээ. Тус газрын дарга И.Нарантуяа тэргүүтэй албаны хүмүүс Зайсан дахь Насанд хүрээгүй­чүү­дийн хорих 411 дүгээр анги, Хүүхэд хамгаалал, хаяг тогтоох төв, Эх хүүх­дийн эрүүл мэндийн үн­дэс­ний төвийн Дутуу нярайн тасаг, Хүүхдийн төв сувилахын хүүхдүүд­тэй уулзаж, тэдний амь­дарч буй орчинтой танил­цаж, саналыг нь сонссон юм.

Мөн энэ үеэр аав, ээжээ­сээ хол байгаа тэ­дэнд шинэ жилийн бэлэг гардууллаа. Хорих 411 дү­гээр ангид 60 гаруй хүүхэд ял эдэлж байгаагийн тал хувь нь орон нутгаас ирсэн аж. Хүүхдийн төлөө үндэсний газрын дарга И.Нарантуяа тэдэнд шинэ оны мэнд хүргэж, хүүх­дийн эрхийг хамгаалах үндэсний байгууллагын бэлгийг дамжуулж буйгаа дурдлаа. Мөн тэрээр хүүх­дүүдэд хандаж “Хүмүүний өнгөрсөн амьдралыг харж, уншиж байхад  алдаа оноо­гоор дүүрэн байдаг юм байна. Гэхдээ сайхан амьдарч, сайн яваа хүмүүс алдсан зүйл дээрээ сурал­цаж, амжилт болгосон нь анзаарагддаг. Та нарыг гэрэлтэй сайхан ирээдүй угтаж байгаа. Итгэл, мө­рөөдлөөр дүүрэн байгаарай. Та нарт нас, цаг хугацаа гэж юугаар ч үнэлэшгүй хамгийн том боломж байна. Та бүхэн амьдарч байгаа орчин, эргэн тойрныхоо талаар санал бодлоо бидэнтэй хуваалцаарай. “Та нарын эрхийг хамгаал” гэж төр Хүүхдийн төлөө үндэсний газрыг байгуулсан. Энэ газрын үүд хүүхэд бүрт байнга нээлттэй гэдгийг энд онцолж хэлье” хэ­мээсэн юм. Энэ үеэр тус ангийн зарим хүүхэдтэй цөөн хором ярилцлаа. 

16 НАСТАЙ Б: ЭНДЭЭС ГАРААД ЭР ХҮН ШИГ АМЬДАРНА

-Миний дүү хаанаас ирсэн юм?

-Хөдөөнөөс ирсэн. Малын хулгайн хэргээр.

-Багш чинь чамайг ном их уншдаг гэж байсан?

-Энд номын сан байдаг юм. Өдөрт 1-3 цаг тэнд сууж ном уншдаг. Хөдөө байхдаа ч гэсэн ном унш­даг байсан.

-Эндэхийн номын сан хэр олон номтой вэ. Со­нирхолтой ном их бий юу?

-Монголын уран зохиолын ховор номууд бий. Монгол зохиолуудыг бараг уншаад дууссан. Харин дэлхийн сонгодог зохиол цөөхөн байдаг.  

-Хүүхдийн төлөө үндэсний газрын ах, эгч нар та нарыг хэрэгтэй зүйл байвал хэлээрэй гэж байсан?

-Миний хувьд номын санд дэлхийн сонгодог зохиолуудыг нэмээсэй гэж хүсч байна. Мөн ин­тер­нэттэй болбол хүүхдүүд нийгэмд юу болж байгаа талаар мэдээлэл сайн авах байх.

 -Чи эндээс гараад юу хийх тухайгаа боддог уу?

-Надад сурах зүйл их байна. Бодож төлөвлөсөн зүйл бий. Ямарч байсан эндээс гараад эр хүн шиг амьдарна гэж өөртөө хэлдэг.

-Шинэ жилээр та нарыг эргэж олон хүн ирдэг байх?

-Манай аав, ээж хол болохоор ирж амждаггүй юм. Гэхдээ энд зөндөө олон найз нартай болсон болохоор тэдний гэрийн­хэн намайг цуг эргэдэг. Шинэ жил болоод бидэнд энд тэндээс бэлэг их ирж байгаа. 

БАГА НАСНЫХАН ГЭРЭЭСЭЭ ДАЙЖИХ НЬ ИХЭСЧЭЭ

 Хорих 411 дүгээр ан­гийн хүүхдүүд шинэ оноо угтан цэвэрхэн хувца­саараа гоёжээ. Тэд гадна дотны хүүхдийн байгуул­лагуудаас илгээ­сэн бэл­гэнд дарагдаж баярлан хөөрнө. Хүүхдийн төлөө үндэсний газрынхан тус ангиас Хүүхэд хамгаалал, хаяг тогтоох төвийг зо­рилоо. Энд гудманд даарч хөрөн тэнэж явсан, хойд аав, ээждээ нүд үзүүр­лэгдсэн, PC тоглоомын газраас баривчлагдаж ирсэн гээд янз янзын шалтгаантай балчирууд байна. Тус төвд шинэ оноо 30 гаруй хүүхэд угтлаа. Тэдэн дунд эгч дүүс ч байна. Ах дүү гурав ч энд хуучин оноо үдлээ. Тэд өрөөнийхөө үүдэнд хонги­лоор дүүрэн урт ширээ засчээ. Ширээгээр дүүрэн амттан. Амттан, бэлгэндээ бялуурсан хүүхдүүд хоол­той хоолгүй, галтай галгүй, хүйтэн гэр рүүгээ яарахгүй байгаагаа нуусангүй. Хүүхэд хамгаалах, хаяг тогтоох төвд ирсэн хүүхдүүдийн 95 хувь нь гэртээ буцаж, таван хувь нь хүүхдийн халамжийн байгууллагад очиж байгааг тус төвийн захирал Ч.Аюурзана хэлсэн. Мөн тэрээр тус төвд ирж байгаа хүүхдийн тоо өмнөх жилүүдээс цөөр­­сөн. Гэхдээ ирж бай­гаа хүүхдүүдийн олонхи нь бага насны хүүхэд, охид байгааг онцолж байв. Аав ээж, гэр бүлээсээ хол байгаа тэдэнд шинэ жи­лийн бэлэг тараасан ал­банын­хан дараа нь Хүүхдийн төв сувилалыг зорьсон юм. Энд 0-3 насны 60 гаруй хүүхэд хэвтэн сувилуулж байна. Эмнэлэгт ээж нь хаясан, эндэхийн хашааны гадна орхисон, байрны үүднээс олдсон нярай хүүхдүүд энд асран сувилуулж байна. Тус төвийн хөгжлийн бэрхшээлтэй хүүхдийн тусгай тасагт есөн хүүхэд амьдарч байгаа аж. Энд ирсэн нь мөн л аав ээждээ хаягдсан, асран халамжлах гэр бүлгүй гэх шалтгаантай. Энэ тасгаас гадаадын иргэд хүүхэд үрчилж авчээ. Тэд тус төвийнхөнтэй харилцаа­тай байгааг багш нар нь хэллээ. Мөн Хүүхдийн төв сувилалд дүүргүүдийн эмнэлгээс дутуу төрсөн нярай ирж сувилуулж эмчлүүлдэг байна. Тус төвд сувилуулж байгаа хүүхдийн багагүй хувийг дутуу төрсөн нярай эзэлж байгаа аж. Ээж аав, гэр бүлээсээ хол байгаа эдгээр хүүхдүүдтэй Хүүхдийн төлөө үндэсний газрын удирдлагууд ийнхүү шинэ оны босгон дээр уулзлаа.