Монголын үндэсний олимпийн хорооны тэр­гүүн дээд шагнал гар­дуу­лах “Бөртэ чоно” ёслол өн­гөр­сөн ням гаригт боллоо. Оны тамирчдын шилдгүү­дийг уламжлал ёсоор спортын сэтгүүлч­дийн дунд санал асуулга явуулж шалга­руулсан юм. Уг санал асуулгад 73 сэт­гүүлч оролц­­сон аж. “Бөртэ чоно-2012” наадмын ёсло­лын хүндтэй суудалд Монгол Улсын Ерөн­хий­лөгч Ц.Элбэг­дорж, Монгол Улсын Хө­дөл­­мөрийн баатар, Зууны манлай бөх, Олимпийн мөн­гөн медальт Х.Баян­мөнх, Улсын Их Хурлын ги­шүүн, Хөдөлмөрийн баа­тар дар­хан аварга Б.Бат-Эрдэнэ, МҮОХ-ны ерөн­хий­лөгч гавьяат эмч Д.Загдсүрэн, дэд ерөн­хийлөгч Ц.Дам­дин, Д.Дор­лигжав, ОУОХ-ны хүндэт гишүүн О.Маг­ван нарын хүндтэй хүмүүс суусан байлаа. Улиран одож буй оныхоо амжилт бүтээлийг дүгнэх энэхүү ёслолд спор­тын үе үеийн төлөө­лөл ирсэн байв. “Бөртэ чоно-2012” наадам нь олимп болсон жилийнх гэдгээрээ онцлог байсан юм. МҮОХ-ны ерөнхий­лөгч Д.Загдсүрэн “Бөртэ чоно” наадмын ажилла­гааг нээж хэлсэн үгэндээ Монголын спортын түүх зузаарсны нэг нь 2012 он байлаа. Манай тамирчид “Лондон-2012” олимпод 35 тамирчны бүрэлдэхүүнтэй оролцож таван медальтай ирсэн. Бээжингийн олим­пийн аварга Хөдөл­мөрийн баатар Н.Түвшин­баяр маань мөнгөн медаль авч олимпийн хос медаль­тан болсон нь бахдам амжилт юм. Бас Дэлхийн аварга С.Батцэцэг олим­пийн медаль авчир­ч Монголын чөлөөт бөхийн­хөн 32 жилийн дараа олим­пийн медаль­тан тө­рүүлсэн нь бас онцгой үйл явдал гэж үзэж байна” гэлээ. Ингээд шилд­гийн шилдэг олим­пийн тан­хим, олимпийн зөвлөл, спорт холбоо, олим­пийн зүтгэл­тэн, шил­дэг дас­гал­жуу­лагч гээд шилдгүүдэд шагнал гар­дуулах ёслол эхэлсэн юм. Уулын спортын тамирчин Л.Баяр­­сайхан, байт харвааны Б.Урантунгалаг, чөлөөт бөхийн Т.Мөнх­туяа, шатрын Б.Гүндаваа үндэсний бөхийн П.Бүрэн­төгс, чөлөөт бө­хийн С.Батцэцэг, жүдоч С.Ням-Очир, боксын У.Мөнх-Эрдэнэ, Н.Төгс­цогт нарын арван тамир­чин шилдэг тамирчин өр­гөмжлөлийн хүртлээ. Монгол Улсын хөдөл­мөрийн баатар, гавьяат тамирчин, олимпийн аварга Н.Түвшинбаяр шилд­гийн шилдгээр шал­гарч “Бөртэ чоно-2012” шагналын эзэн болов.  

“БӨРТЭ ЧОНО-2012” НААДМЫН ШИЛДГҮҮД:

Шилдэг дасгалжуулагч

3 - Одвогийн Балжинням, жүдо        77 оноо

2 - Зэвэгийн Дүвчин, чөлөөт бөх      96 оноо

1 - Дашзэвэгийн Ганзориг, бокс      102 оноо

Шилдэг баг

Азийн элсний спортын наадмын хүрэл медальт Сагсан бөмбөгийн эрэгтэй баг

Шилдэг тамирчин

10 – Л.Баярсайхан, уулын спорт                     76 оноо

9 – Б.Урантунгалаг, байт харваа                        78 оноо

8 – Т.Мөнхтуяа, чөлөөт бөх                                     82 оноо

7 – Б.Гүндаваа, шатар                                         119 оноо

6 – П.Бүрэнтөгс, үндэсний бөх                                    207 оноо

5 – С.Батцэцэг, чөлөөт бөх                            480 оноо

4 – С.Ням-Очир, жүдо                                         496 оноо

3 – У.Мөнх-Эрдэнэ, бокс                                      543 оноо

2 – Н.Төгсцогт, бокс                                                   643 оноо

1 – Н.Түвшинбаяр, жүдо                                            712 оноо

Шилдгийн шилдэг олимпийн танхим: Төв аймгийн Зуунмод сумын Л.Эрдэнэцэцэг захиралтай “Хүмүүн” цогцолборын Олимпийн танхим

Шилдгийн шилдэг олимпийн зөвлөл: Өмнөговь аймгийн”Афин” олимпийн зөвлөл

Шилдэг спорт холбоод: Монголын уулын спортын холбоо,Монголын гимнастикийн холбоо

Шилдгийн шилдэг спорт холбоод: Монголын олимпийн боксын холбоо, Монголын чөлөөт бөхийн холбоо, Монголын жүдо бөхийн холбоо

 Шилдэг олимпийн зүтгэлтэн: “ХасуМегаватт” компанийн захирал Ж.Түмэн-Аюуш Шилдэгшүүгч: МЧБХ-ны шүүгч, олон улсын шүүгч Ц.Сэрээтэр

Шилдэгдасгалжуулагч: О.Балжинням/жүдо/, З.Дүвчин /чөлөөтбөх/

Шилдгийн шилдэг дасгалжуулагч: Д.Ганзориг/бокс/

“Бөртэ чоно” наадмын шилдгийн шилдэг дасгалжуулагч Д.Ганзориг:

-Манай боксын хамт олон зорилго сэтгэлээрээ нэгдэн 2012 оны олимпийн рингнээс мөнгө, хүрэл медаль авч чадсан. Мөн өнгөрсөн тавдугаар сард эмэгтэйчүүдийн Азийн аварга шалгаруулах тэмцээнийг Улаанбаатар хотноо зохион байгуулав. Энэ тэмцээнээс анхны тивийн аварга төрж  Монголын боксын түүхийн хуудаснаа алтан үсгээр бичигдэх гавьяа байгуулсан. Ирэх онд гаргасан амжилтаа давтаж тив дэлхийн тэмцээнээс медалийн арвин ургац хураах болно. Монголын тамирчиддаа болон нийт ширэн бээлийтнүүддээ амжилт хүсч Рио де Жанейрод олуулаа уулзахын ерөөлийг дэвшүүлье.

Уулын спортын мастер “Бөртэ чоно-2012” наадмын шилдэг тамирчин Л.Баярсайхан:

-2012 онд дэлхийн дээвэр Эверестийн оройд Монголын “Хөх тэнгэр” баг хамгийн олон хүний бүрэлдэхүүнтэй гарсан. Мөн дэлхийн алдартай 11 ууланд нэг жилийн дотор амжилттай авирсныг үнэлэн манай холбоог шилдгийн шилдэг спорт холбоогоор шагнасанд баяртай байна. Энэхүү  шагналын цаана их амжилтын гараа бий. Тиймээс хурднаас хурдан, хүчтэйгээс хүчтэй, өндрөөс өндөрт тэмүүлэх болно.

“Бөртэ чоно-2012” наадмын шилдэг тамирчин, гавьяат тамирчин С.Батцэцэг:

-“Бөртэ чоно” наадмын шилдэг тамирчны шагналыг хоёр дахь удаагаа авч байна. Ирж буй 2013 онд олон тэмцээн биднийг хүлээж байгаа. Жишээлбэл, нэгдүгээр сард чөлөөт бөхийн насанд хүрэгчдийн улсын аварга, мөн ОХУ-д Иван Яригины нэрэмжит “А” зэрэглэлийн тэмцээн болно. Энэ тэмцээнээс их зүйл шалтгаалах учир эртнээс бэлдэж байна. 2012 он миний спортоор хичээллэсэн он жилүүдээс хамгийн оргил нь байлаа. Ирж буй 2013 онд манай тамирчид үүнээс дутахааргүй амжилт гаргаж Монголын тамирчдыг тив дэлхийн дэвжээ ивээх болтугай гэж ерөөе.

“Бөртэ чоно” наадмын шилдгийн шилдэг шагналын эзэн, Хөдөлмөрийн баатар, гавьяат тамирчин Н.Түвшинбаяр:

-2012 он олимпийн гэдэг утгаараа хариуцлагатай жил байсан. Бээжингийн олимпод гаргасан амжилтаа бататгахын тулд өнгөрсөн дөрвөн жилд их хичээсэн. Лондоны дэвжээнд аз хийморь ивээж олимпийн мөнгөн медаль хүртсэндээ баяртай байна. Энэ мөнгөн медаль олон хүний сэтгэлийн хүчээр надад ирсэн. Намайг “Бөртэ чоно” наадмын шилдгийн шилдэг тамирчнаар өргөмжилсөнд спортын сэтгүүлчиддээ баярлаж байна. Энэ дашрамд Монголын нийт ард түмэндээ шинэ оны мэндийг хүргэж ажил амьдралд нь сайн сайхан бүхнийг хүсэн ерөөе.