Ирээдүйн хөгжлийг тодорхойлох авьяаслаг, шилдэг хүүхэд багачууд манай орны өнцөг булан бүрт бий. Улиран буй жил­дээ сурлага, урлаг, спор­тоор тэргүүлсэн шилдэг хүүхдүүдийг Хүүх­дийн төлөө үндэсний газраас нэрлэлээ. 1991 оноос жил бүр уламжлал болгон зо­хиож ирсэн “Оны шилдэг хүүхэд”-ээр 300 гаруй хүү­хэд тодорчээ.

Харин энэ онд 200 гаруй хүүхэд өр­сөлдөж, сурлага, урлаг, танин мэдэхүй, спорт, хүүхдийн оролцоо, техник чөлөөт сэтгэхүй, хүмүүн­лэг энэрэнгүй үйлс гэсэн зургаан номинацийн 21 эзнийг тодруулжээ. Тэ­дэнд Хүүхдийн төлөө үн­дэсний газрын дарга И.На­рантуяа өчигдөр ме­даль гардуулан, хүндэтгэ­лийн зоогонд урьсан юм. Шалгаруулалтад тив дэл­хийн аварга, авьяаслаг шилдэг сурагчид энэ тэн­цүүхэн өрсөлдсөнийг зо­хион байгуулагчид хэлж байна. Хүүхдийн зөв тө­лөв­шил, амжилтын эхлэл нь гэр бүл байдгийг Хүүх­дийн төлөө газрын дарга И.Нарантуяа онцлов. Тэ­рээр  “Шилдэг хүүхэд эцэг, эхийн хөдөлмөрийн үр ачаар бий болдог. Мон­голын олон зуун мянган хүүхдийн хөгжлийн түүчээ бол эдгээр 21 хүүхэд юм. Шинэчлэлийн Засгийн газрынхан “Зөв хүүхэд” хөтөлбөр хэрэгжүүлж, хүү­хэд хамгааллын чуул­ган зохион байгуулсан. Хүүхдийн хөгжлийн төлөө бид гэр бүлтэй нь тулж ажиллах ёстой гэсэн нэгд­сэн саналд хүрсэн” гэв.

“ХОЁР ХҮҮХДИЙГ УСНААС АВАРСАН ХЭНТИЙН БААТАР ХҮҮ”

 Аймаг, нийслэлийн шилдэг сурагчдын спорт, биеийн тамирын төрөлд олон улсын спортын наа­дамд амжилттай оролцож, эх орныхоо нэрийг дуурс­гасан найман хүүхэд шал­гарчээ. Сүүлийн үед хүү­хэд багачууд олон улсын спортын тэмцээн урал­даанд амжилттай орол­цож, эх орныхоо нэрийг дуурсгах болсон нь энэ төрлийн номинаци өрсөл­дөөнтэй байсныг илтгэнэ. Тухайлбал, Орчлон сур­гуулийн 4-Б ангийн сурагч Э.Баасансүрэн Румын ул­сад зохиогдсон дэлхийн сурагчдын аварга шалга­руулах шатрын тэмцээний алт, Вьетнам улсад болсон зүүн Азийн өсвөрийн шат­рын аварга шалгаруулах тэмцээний хүрэл медаль хүртэж байжээ. Мөн Хэн­тий аймгийн 13 настай Э.Цэндцэсэм Ардын хувьс­галын 90, 91 жилийн ойн баяр наадмын их су­рын харваанд дараалан түрүүлж байж. Тэрээр Мон­гол Улсын өсөх идэр хошой мэргэн цол хүртсэн аж. Харин хүмүүнлэг сайн үйлстэнээр голоос хоёр хүүхэд аварсан  Хэнтий аймгийн Т.Ишжамц гэх хүү тодорчээ. Т.Ишжамц хүү Хэрлэн голын эрэг дээр тоглож байгаад усанд живж буй тав, зургаан насны хоёр хүүхдийг зориг гарган аварсан аж. Тэрээр уг үйлсээ эх орныхоо тө­лөө хийх иргэн хүний үү­рэг хэмээн тайлбарлаж байна. Хүүхдийн оролцоо, өөрөө удирдлагын бай­гууллагын номинациас онцлоход өөрийн нутагтаа олон мянган хүүхдийн дуу хоолойг нэгтгэн шийдвэр гаргагч хүмүүст хүргэж чадсанаар хүүхдийн ордон барих шийдвэрийг гар­гуулж чадсан Увс аймгийн Улаангом сумын хоёр­дугаар цогцолбор сургуу­лийн сурагч Б.Буянхүү шилдэг хүүхдээр шалгар­чээ. Энэ оны шилдэг 21 хүүхэд Хүүхдийн төлөө үндэсний газрын дарга И.Нарантуяатай зоог барьс­ны дараа Ерөнхий сайдаас батламжаа гард­сан юм.

ЕРӨНХИЙ САЙД ШИЛДЭГ ХҮҮХДҮҮДТЭЙ УУЛЗАВ

Оны шилдэг хүүхдүүд батламжаа Төрийн ор­донд, Есөн хөлт цагаан тугийн өмнө  Ерөнхий сайдаас хүндэтгэлтэйгээр гардан авлаа.

Шилдэг хүүхдүүдэд батламж гардуулан баяр хүргэсний дараа Ерөнхий сайд, Хүүхдийн төлөө үн­дэсний зөвлөлийн тэргүүн Н.Алтанхуяг “Цог золбоо, хүсэл мөрөөдлөөрөө жи­гүүр­лэсэн хүүхэд насан­даа авъяас билэг, оюун ухаан, хичээл зүтгэлээрээ үеийнхнээ манлайлсан та бүхнээрээ бахархаж бай­на. Бидний маргааш бол­сон өсвөр залуу үеийнхэн маань ямар олон сайхан үйлс бүтээснийг харж, чаддаг зүйлээрээ Монгол­доо төдийгүй дэлхийд ман­лайлж чадсанд нь баярлаж байна. Мөн хү­мүүнлэг, энэрэнгүй үйл­сээ­рээ үлгэр жишээ үзүүл­сэн гурван ч хүүхэд энэ жил шилдэгт шалгаран орсон нь зөв монгол хүүх­дүүд өсөн гарч ирж байгааг харуулж байна. Үүнд маш баяртай байна” гэлээ.

Шилдгээр шалгаран холоос зорьж ирсэн Увс аймгийн Улаангом сумын сурагч Б.Буянхүү шагнал гардсан үе тэнгийн хүүх­дүүдээ төлөөлөн “Өсвөр залуу үеийнхэн биднийг байнга дэмжиж, халамж­лан анхаарч ирсэн Зас­гийн газартаа, Монголын­хоо 1,1 сая хүүхдийг тө­лөө­лөн баярлалаа гэж хэлье” гэсэн бол шилд­гүүдийн хамгийн бяцхан нь болох найман настай Ц.Мөнхжин хүү Засгийн газрын тэргүүнд зурсан зургаа дурсгал болгон бэ­лэг­лэлээ. Түүний бэлэг­лэсэн “Өвөөгийн гадаа” хэмээх зураг нь олон ул­сын үзэсгэлэнгээс шагнал хүр­тэж байжээ. Мөн бие даа­сан тоглолтоо нийтэд толи­луулж амжсан авъяас­лаг охин П.Индра хийл хөгж­мийн тоглолтоо­роо мэнд­чилгээ дэвшүүл­сэн юм.  Эдгээр шилдэг хүүх­дүү­дийн хүсэл бүхэн биелж, эх орныхоо нэрийг өндөрт өргөж явахыг  Ерөн­хий сайд Н.Алтан­хуяг ерөөв.