Энх цагт эгэлгүй гавьяа байгуулсан баат­руу­дыг тодруулах “Энэ ца­гийн эгэл баатар-2012” үргэлжилж байна. Эгэл баатарт нэр дэвшүүлэхээр гал, усны аюулаас хүний амь аварсан зоригтон, өв­чин анагаагч, мод та­ригч гээд олон хүний тухай мэдээллийг албан бай­гуул­лага, иргэнээс ирүү­лэв.

Үүний нэг нь Хан-Уул дүүргийн цагдаагийн хэлт­сийн жолооч-цагдаа, цаг­даа­гийн ахлах ахлагч Гон­чигдагвын Мөнх-Эрдэнэ хэмээх эрхэм. Г.Мөнх-Эрдэнэ өнгөрсөн арав­дугаар сарын 18-нд Хан-Уул дүүргийн нэгдүгээр хороо Энхтайваны гүүрэн дээр шатаж байсан маши­наас хоёр хүний амийг аварсан зоригтон. Тэрээр арын суудал дээр ухаангүй хэвтэх хоёр зорчигчийг гаргахын тулд шатаж улайс­сан машины хаал­гыг хоёр гараа зумлан байн нээж залуусыг гар­га­сан. Харамсалтай нь, жо­лоо­чийг нь аврах бо­ломж ол­доо­гүйд тэр одоо ч харамсч байгаагаа илэр­хийлж байна. Маши­ны урд тал мөргөлдсний ул­маас хаалга нээх боломж­гүй байсан учраас идэр сайхан залуу хорвоогийн мөнх бусыг үзүүлсэн юм. Гэхдээ ту­хайн цаг үед Энхтайваны гүүрэн дээр орилолдон багшрах иргэдээс түүнээс өөр гал руу орох хүн бай­гаагүй. Тэр л ганцаа­раа хэзээ мөдгүй дэлбэрэх машин руу очсон. Тэр л ганцаараа зориг­ло­сон. Хэ­рэв эрхэм жолоочид дүрэлзэх гал руу орох зо­риг зүрх дутсан бол өнөө­дөр Монголын хоёр айлд өнчрөл хагацал, уй гашуу тохиолдох байлаа. Ийм эгэлгүй сайхан сэтгэлтэй мөрдөстэй залууг “Энэ цагийн эгэл баатар”-т нэр дэвшүүллээ.

Г.Мөнх-Эр­дэ­нийн хувьд ажил албан­даа бусдыгаа хойшуучлан түү­чээлж яваа нэгэн юм. 2007 онд “Осолгүй манлай жолооч”, 2010 онд “Онц тээвэрчин”, 2011 онд Хан-Уул дүүргийн цагдаагийн хэлтсийн “Хөдөлмөрийн аварга” болж бусаддаа ажил мэргэжлээрээ үлгэр­лэж байжээ. Түүний бус­дын амь нас аварсан ня­цаш­гүй зоригийг үнэлж Мон­голын залуучуудын холбооноос “Цэргийн ал­дар алтан” медаль, Замын цагдаагийн газраас “Баярын бичиг”-ээр тус тус шагнаад байна.

“Түү­нийг хувь хүн талаас нь тодорхойлооч” гэсэн асуул­тад Хан-Уул дүүр­гийн нэгдүгээр хэлт­сийн дарга, цаг­даагийн дэд ху­рандаа Ц.Амгалан-Энх ха­риуллаа. “Цаг­даа­гийн албан хаагчид төр, түмний төлөө энэ биеэ ч үл хайрлах тангарагтай хү­мүүс. Тангарагтаа үнэнч залуус гэдгээ манай жо­лооч нөхөр баталлаа шүү дээ. Ажил мэргэжлийнх нь хувьд ярих юм байхгүй. Хариуцлагатай, асуудалд нухацтай ханддаг мэргэш­сэн жолооч хүн. Харин хувь хүн талаас гэвэл шу­дарга гэхэд дэндүү шудар­га, ноён нуруутай залуу. Үг дуу цөөтэй боловч хаа нэг хэлэхдээ холыг харсан цар хүрээтэй зүйл ярина. Цаг­даа хүн ард түмний итгэл, шударга үнэний илэрхий­лэл байх үүргээ маш сайн гүйцэтгэж яваа” хэмээн тодорхойллоо.

Даа­рахад гал, анга­хад ус аврал байдаг шиг үүр­дийн амьдралд бусдын төлөөх тангарагтай Г.Мөнх-Эрдэнийн талаар товч­хон өгүүлэхэд ийм байна. Уншигч авхай та түүнийг “Энэ цагийн эгэл баатар” мөн гэж дүгнэсэн бол 155050 тусгай дугаарт мессеж илгээж дэмжээ­рэй.