-МАХН-ыг Засгийн газраас гаргахгүйн төлөө ажиллана-

УИХ-ын гишүүн Д.Ар­вин МАН-ын гишүүнээ­сээ татгалзаж, Ардчилсан намд элсэх өргөдлөө өгчээ. Түүний хүсэлтийг хүлээн авч Ерөнхий сайд Н.Ал­танхуяг Ардчилсан намын даргын хувиар на­мын батлахыг нь өчигдөр гардуулан өглөө. Н.Алтанхуяг “Ардчиллын үйл хэргийн төлөө хамтарч зүтгэе, ард иргэдийнхээ ахуй амьжиргааг дээшлүүлье, шинэчилж өөрчилье, Монгол орноо улам хурдтай хамтарч хөгжүүлье гэж сонголтоо хийсэн Д.Арвин гишүүнд баяр хүргэе” хэмээн амжилт хүслээ. Шинэ сонголт хийх болсон тухайгаа Д.Арвин тайлбар­лахдаа “Олон иргэд маань маш хүнд нөхцөлд амьдарч байна. Хөдөлмөр эрхлэл­тийг дэмжих, иргэдээ ажил­тай, орлоготой болго­хын төлөө шийдвэрлэх олон асуудал байна.  Нийгэмд шинэ­чилж шийдэх асуудал маш олон байна. Миний сэтгэл олон жил зовниж ирсэн. Өмнөх жилүүдэд олон асуудлыг шийдвэрлэе гэж Монгол ардын нам болоод УИХ дахь намын бүлгийн гишүүддээ санал тавьж байсан боловч хүлээж аваа­гүй. Өөрчилье, шинэ­чилье, иргэдийнхээ төлөө ажиллая гэсэн бодол маань Ардчилсан намын бодлоготой нийцэж байгаа учраас ийм сонголт хийсэн” гэлээ. Тэрээр энэ үеэр Ардчилсан намын бодлого, шийдвэрийг дагаж, намын дүрмийг биелүүлж ажиллана гэдгээ илэрхийллээ.

УИХ-ын гишүүн Д.Арвиныг Ерөнхий сайдын өрөөнөөс гарч ирэхэд нь дараа зарим зүйлийг тодруулав.

-Ардчилсан нам, МАН өөр үзэл баримтлалтай. Та Ардчилсан намын гишүүд­тэй хэр зэрэг гар нийлэх бол?

-Нэг нь зүүний, нөгөө нь барууны үзэл баримт­лалтай нам боловч өнгөр­сөн дөрвөн жилд хамтарч ажиллахдаа ямар ч үзэл баримтлалын зөрчил гаргаагүй. Монгол Улсад хэт барууны, хэт зүүний үзэл хэрэггүй гэдгийг амьд­рал харуулсан учраас би энэ сонголтыг  хийсэн. Намын ивээлд багтаж, нам дотор муур, хулгана болж тоглохыг хүсээгүй. Би МАН-ын шинэч­лэлийн төлөө элсний 13-ын нэг болж, шөнө өдөр­гүй тэмцэж ажиллаж бай­сан боловч үр дүн ерөө­сөө гараагүй. Тиймээс намын шинэчлэлийн төлөө ява­хаасаа илүүтэй сургууль, цэцэрлэггүй хүүхдүүд, ядуу амьдарч зовж байгаа иргэдийнхээ төлөө ажил­лах чин хүсэл эрмэл­зэлтэйгээр төрд орж ирж байна. Энэ бол урвалт биш сонголт. Би зогсонги амьдрахыг хүсээгүй. Би нам дотроо зогсонги байхгүйн төлөө өнгөрсөн 12 жил намынхаа бүлэгт үг хэлж, сэтгэгч байлаа. Ми­ний санаачилсан, хэлсэн бүхэн хэрэгжээгүйд би маш их гомдсон. Учир нь би Монголын парламен­тад  гурван удаа сонгог­дохдоо өөрийн санаа­чилсан, хэрэгжүүлэхийн төлөө боловсруулсан төс­лөө ажил болгож чадаагүйд харамсаж явдаг. Би ард түмнээсээ уучлал гуйдаг байлаа. Ардчилсан нам миний сонголтыг дэмжинэ гэсэн үүднээс би энэ сонголтыг хийсэн.

-Таны саналыг Ардын нам хүлээж авсан уу?

-Намын дүрмийн да­гуу  намын анхан шатны үүрт өргөдлөө өгсөн. Ин­гэс­­нээр асуудал шийдвэр­лэгддэг.

-Таныг сонгуульд орол­цоход Ардчилсан нам дэмжсэн гэсэн мэдээлэл үнэн үү?

-Би УИХ-ын дарга З.Энх­­­болдод хүсэлт тавьсан. Би хүнд нөхцөлд сонгуульд орох нь. Нэг намын хоёр хүн өрсөлдөж байна. Манай дүүргийн намын хорооны тэргүү­лэг­чид зөвхөн дүүргийн­хээ даргыг дэмжинэ гэсэн шийдвэр гаргалаа. Иймээс намын анхан шатны ги­шүүд намайг дэмжих боломжгүй боллоо. Иймээс та бүхэн намайг эмэгтэй хүний хувьд дэм­жиж ажиллаач гэж учир байдлаа хэлсэн. УИХ-ын дарга “Энэ пар­ламентад цуг сууж байсан эмэгтэй хүний хувьд шударга зөв явдгийн чинь хувьд өөрийн­хөө гишүүдээр дам­­жуулан  дэмжинэ” гэдгээ хэлсэн.  Ийм хүнд үед, ийм том тойрогт Ард­чилсан нам болон жирийн гишүүд л дэмжсэн. Мөн МАХН-ын гишүүд, С.Ган­баатар на­рын бие дааг­чид, ИЗНН-ын С.Оюун даргыг дэм­жиг­чид нь надад дэмжлэг үзүүлсэн. Иймээс л би энэ сонголтыг хийх нь зүйтэй гэж ялалтынхаа өдөр шийдсэн.

-Танд Ардчилсан нам сайдын суудал амласан гэх юм. Хамтарсан Засгийн газар задарч МАХН гараад явчихвал та сайд болох уу?

-Хамтарсан Засгийн газрыг битгий задраасай, Ардчилсан нам МАХН, МҮАН, ИЗНН энэ Засгийн газраа цаашаа авч яваасай гэж хүсч бай­на. Би МАХН-ыг Засгийн газраас гаргахгүйн төлөө ажиллана. Би гурван удаа сонгогдохдоо нэг ч удаа албан тушаалын төлөө явж байгаагүй.  Тэгэхэд Т.Ган­ди хоёр удаа сайд болж байсан, Д.Туяа гишүүн нэг сонгогдоод сайд болж байсан. Би ча­дах­гүйдээ сайд болоогүй биш, сайд болохыг хүсээ­гүйдээ энэ олон жилийг улс төрд өнгөрүүлсэн. Би сайд болохгүй ээ, харин сайдын дайтай ажиллана. Миний хувьд ядуу зүдүү амьдарч байгаа иргэддээ туслах нь сайдаас илүү албан ту­шаал. Би албан тушаалын төлөө явдаг хүн биш.