Америкт сурах нь бид бүгдийн ирээдүйн мэргэжил боловсролд илүү боломжийг нээж өгдөг. Дэлхийн шилдэг сургуулиуд тэнд бий. Тиймээс тэнд очиж сурах хүсэл оюутан залууст их байдаг. Хэрэв та АНУ-д суралцахаар төлөвлөж байгаа бол зайлшгүй мэдэж байх найман зарчмыг хүргэж байна.
1.Хэрэв таны сурлагын голч дүн болон англи хэлний мэдлэг өндөр бол АНУ-д сурах ерөнхий шаардлагыг хангаж байна гэсэн үг. Харин элсэлтийн ерөнхий шалгалтыг хангахын тулд TOFEL IBT, SAT, GRE, GMAT зэрэг шалгалт өгөх хэрэгтэй. Бакалаврын зэргээр сурах бол бүрэн дунд сургуулиа төгссөн байх ёстой. Магистрт сурах хүн бакалавр, докторт сурах хүн магистрын зэрэгтэй байх шаардлагатай.
2.Хоёр жилийн “Community” коллежид сурсанаар Associate зэрэг авах ба их, дээд сургуульд шилжин гуравдугаар курсээсээ суралцах боломжтой.
Хоёр жилийн коллежийн сургалтын төлбөр болон элсэлтэд тавих шаардлага нь их, дээд сургуулиас харьцангуй бага байдаг.
3.TOFEL IBT шалгалтад бүртгүүлэхдээ ETS байгууллагын албан ёсны сайтаар ороорой. Монголд TOFEL IBT шалгалтыг зохион байгуулдаг албан ёсны төвүүд нь Улаанбаатар, Орхон, Дархан-Уул аймагт байдаг.
4.Тэтгэлэгт хамрагдахыг хүсвэл бусад өргөдөл гаргагчдаас өөрийнхөө давуу талыг гаргаж ирэх хэрэгтэй. Тухайн хөтөлбөрт хамрагдсанаар танд ямар өөрчлөлт орох, ирээдүйн зорилгоо тодорхой бичсэн байх нь чухал.
5.АНУ-д сурахад дараах материалуудыг бүрдүүлсэн байх шаардлагатай. Үүнд
Өргөдлийн маягт, диплом болон дүнгийн хуулбар англи орчуулгын хамт, элсэлтийн шалгалтын оноо, тодорхойлох захидал, зорилгоо тодорхойлсон эссэ, санхүүгийн баталгаа, өргөдөл маягтын төлбөр төлсөн баримт зэрэг шаардагдах аж.
6.Америкийн ихэнх сургуулиуд гадаад оюутнуудыг TOFEL IBT өгсөн байхыг шаарддаг. Харин зарим сургуульд IELTS шалгалтын оноог хүлээн зөвшөөрдөг байна. Цөөн тохиолдолд Conditional admission буюу ямар нэг нөхцөлтэйгөөр элсэх боломж олгодог аж. Энэ нь TOFEL IBT шалгалтын оноонд хүрээгүй боловч тухайн сургуулийн англи хэлний эрчимжүүлсэн сургалтад суралцсаны дараагаар TOFEL IBT-г дахин өгөх нөхцөлтэй сургуульд элсэж болдог байна.
7.АНУ-д богино хугацааны сургалтад суухад гурван сарын хэлний сургалт 2-3,5 мянган ам.доллар байдаг аж. Харин хоёр жилийн коллеж нь 3-10 мянган ам.долларын үнэтэй. Бакалаврын сургалт 15-45 мянган ам.доллар, магистр, докторын нэг жилийн сургалт нь 18-45 мянган ам.доллар байдаг.
8.АНУ-д бакалаврын зэрэг олгодог 3500, магистр, докторын зэрэг олгодог 1600 гаруй сургууль нь тодорхой хэмжээний санхүүгийн дэмжлэг үзүүлэх сантай байдаг. Тиймээс дараах гурван аргаар хайх боломжтой. Үүнд өөрийн сонирхож буй сургуулийнхаа цахим хуудас, АНУ-ын их, дээд сургуулиудын каталоги болон Education USA цахим хуудас зэргээс сургуулиа сонгон мэдээлэл авах боломжтой.
