Налайх дүүргийн МАХН-ын гишүүд дэм­жиг­чид өчигдөр Сонгуулийн хорооны хууль бус шийдвэрийг эсэргүү­цэж жагслаа. Орон нут­гийн сонгуулиар МАХН-ынхан Налайх дүүрэгт санал өгсөн нийт сонгогчдын 24.2 хувийн санал авч намын жаг­саал­таар хоёр төлөөлөгчтэй болох болзол хангажээ. Гэтэл тус дүүргийн сон­гуулийн хороо жагсаалтын нэг, хоёрт бичигдсэн Д.Цогоо, Ц.Хатанбаатар нарт түр үнэмлэхийг олгохгүй харин тойрогт нэр дэвшээд ялагдсан Ё.Бям­­батогтох, Ц.Мин­жинхүү нарт түр үнэм­лэхийг гардуулж санаа­тай­гаар хууль зөрчсөн  хэмээн МАХН-ын ги­шүүд үзэж байгаа юм байна. Энэ тухай Налайх дүүргийн МАХН-ын хуу­лийн зөвлөх М.Ган­баатараас тодруулахад “2012 оны арваннэгдүгээр сарын 23-ны өдөр дүүргийн сонгуулийн хо­роо биднээс танай намын нэрийн жагсаалтаар Д.Цогоо, Ц.Хатанбаатар нар орох нь зөв биз дээ гэж утсаар асуусан. Бид үүний хариуд 59 тоот албан бичгийг явуулсан. Албан бичигтээ “Бага хурлын шийдвэрээр жаг­саалтад орсон дарааллаар Д.Цогоо нэгд, Ц.Хатан­баатар хоёрт бичигдсэн. Иймд энэ хоёр нэр дэвшигч төлөөлөгчөөр сонгогдсон нь зүйтэй гэж үзээд түр үнэмлэхийг ол­гохыг хүссэн. Сонгуулийн хороо албан бичгийг хүлээж авсан даруйдаа мөн өдрийн 16:00 цагаас ирж түр үнэмлэхээ аваарай гэсэн. Гэтэл тэд гэнэтхэн түр үнэмлэхийг ирэх даваа гаригт нэгдсэн журмаар олгохоор боллоо гээд хагас сайн өдөр хуралдаад жаг­саалтад нэр нь бичигдээгүй, тойрогт нэр дэвшээд ялагдсан Ц.Минжинхүү, Ё.Бямба­тогтох нарт түр үнэмлэ­х олгох тогтоолыг гаргасан. Сонгуулийн хороо мэдэн будилсан алдаатай шийдвэр гаргасанд бид гайхаж байгаа. Иймээс энэ бүх алдаагаа засахыг шаардаж хэд хэдэн удаа хандсаны зэрэгцээ тус сонгуулийн хороог шүүхэд өгөөд байгаа” гэв. Даш­рамд дурьдахад Налайх дүүргийн МАХН-ын Мян­гатын зөвлөлийн 2012 оны аравдугаар сарын 08-ны өдөр хуралдсан Vы Бага хуралдаанаар дүүр­гийн Иргэдийн Тө­лөө­лөгчдийн Хурлыг сонгох сонгуульд намын жаг­саалтаар найм, тойрогт 17 нийт 25 нэр дэвшигчийг тодруулах­даа “Аймаг, сум, дүүргийн иргэдийн төлөөлөгчдийн хурлын сонгуулийн тухай” хуулийн 54 дүгээр зүйлийн 54.6.5 дахь заалтаар гулсах заалт байгаа ч МАХН-аас нэр дэвшигчид нь V Бага хурал­даанаар гулсаж орохгүй байхаар тогтсон юм байна. Түүнчлэн Ц.Минжинхүү, Ё.Бямбатогтох нарыг намын бодлого шийдвэ­рийг зөрчсөн, дүүргийн МАН-ын удирдлагуудтай үгсэн хуйвалдаж, албан тушаалд шунасан гэж үзэж МАХН-ын ёс зүйн хорооноос гишүүнчлэлээс хасах тогтоол гаргасан аж. Налайх дүүргийн МАХН-ын хороо намын гишүүнчлэлээс хасагдсан хүмүүс намын нэрийн жагсаалтаар ИТХ-д төлөөлөгчөөр сонгогдох хууль эрх зүйн үндэслэлгүй гэж үзэж байгаа юм байна.