УИХ-ын чуулган өчигдөр хуралдах ёстой байсан ч ирц хүрээгүй учраас хойшиллоо. Чуулганы үеэр шинээр таван гишүүн тангараг өргөнө гэсэн мэдээлэл байсан. Харин Ардын намынхан Өвөрхангайн тойрогт АН-аас нэр дэвшсэн Г.Батхүү, Д.Зоригт нарыг тангараг өргөхийг эсэргүүцэж байгаа учир Их хурлын чуулганы хуралдаанд оролцохгүй хэмээн мэдэгдсэн юм. “Шударга ёс” эвслийн бүлгийн дарга Н.Батцэрэг “Манай эвс­лээс нэг гишүүн тангараг өргөх ёстой. Одоогоор эвс­лийн удирдах зөвлөлөөс СЕХ-нд албан тоот хүр­гүүлсэн. Энэ албан тоотын хариу одоохондоо гараа­гүй байгаа. Тиймээс яаравчлан тангараг өргөх нь буруу гэж эвслийн ги­шүүд санал хэлсэн. Сон­гуу­лийн үеэр нэр дэв­шигчдийг хассан СЕХ-ны тогтоолыг хууль зүйн үн­дэслэлгүй гэж олон хуульч тайлбарладаг. Тиймээс хуульчид шүүх, холбогдох байгууллагад хандсан байгаа юм. Заримд нь шүүхийн процесс явагдах бололцоотой гэж  үзсэн. Тиймээс хууль зүйн та­лаас нь энэ асуудлыг эцэс­лэн шийдвэрлэх ёстой гэж үзэж байна” гэсэн юм.

Чуулганы өчигдрийн хуралдаанаар зарим гишүүдийн бүрэн эрхийг хүлээн зөвшөөрөхөөс гадна Авлигын эсрэг олон улсын академийг олон улсын байгууллага болгох тухай хэлэлцээрт нэгдэн орох тухай хуулийн төсөл, Хадгаламжийн даатгалын тухай, Аж ахуйн нэгжийн орлогын албан татварын тухай хуульд нэмэлт оруулах тухай, Даатгалын тухай хуульд нэмэлт, өөрчлөлт оруулах тухай,  Иргэний хуульд нэмэлт оруулах тухай, Банкны тухай хуульд нэмэлт оруулах тухай, Төв банк /Монголбанк/-ны тухай хуульд өөрчлөлт оруулах тухай, Банкин дахь мөн­гөн хадгаламжид баталгаа гаргах тухай хуульд өөрч­лөлт оруулах тухай хуу­лийн болон “Хад­га­лам­жийн даатгалын ту­хай хуулийг хэрэгжүүлэх за­рим арга хэмжээний ту­хай” Улсын их Хурлын тогтоолын төслүүдийг хэлэлцэх байв.