Б.ОНОН
Засаг солигдож, АН бүхий л албан тушаалыг өөрийн мэдэлд авч буй. Харин энэ дайрлагад өртөөгүй үлдсэн цорын ганц хүн бол Хотын ерөнхий менежер Ч.Бат. Түүнийг ганцхан жилийн дараа тэтгэвэртээ гарах гэж байгаагаа Э.Бат-Үүлд учирласаар суудалдаа үлдэж чадсан тухай сураг яриа чих дэлсч байв. Юутай ч МАН-ын засаглалын үеийн Ч.Бат АН-ын засагт ч албаа хашсаар байгаа.
Эндээс үзвэл Хотын дарга Э.Бат-Үүл ерөнхий менежер Ч.Бат нар ирэх дөрвөн жил, эсхүл Ч.Батыг тэтгэвэрт гартал нь гар нийлж ажиллахаар тохиролцсон мэт. Гэтэл үгүй ажээ.
Хүний хүүхэд хүрэн бөөртэй гэдэг. Түүн лүгээ Ч.Бат ажилдаа үлдсэн хэдэн сарын турш Хотын дарга Э.Бат-Үүлийн эсрэг ажилласаар ирсэн бололтой. Ингэж хэлж болохуйц зарим баримт саяхнаас ил болов.
2012 оны аравдугаар сарын 2-ны өдөр Э.Бат-Үүл Улаанбаатарын томоохон баар, кафе, шөнийн цэнгээний газрын эзэдтэй уулзжээ. Энэ үеэрээ “Улаанбаатарыг дэлхийн өндөр хөгжилтэй хотуудын адил шөнийн хот болгоно. Ингэхийн тулд та бүхнийг дэмжиж ажиллана” гэж ярилцсан байна.
Харин яг тэр мөчид нь Ерөнхий менежер Ч.Бат хотын томоохон 28 шөнийн клубын тусгай зөвшөөрлийг нь цуцлах тушаал үйлдэн гарын үсэг зурж байжээ. Уг тушаалыг аравдугаар сарын 5-ны даваа гаригт нэр бүхий 28 аж ахуйн нэгжид танилцуулан, хяналт тавьж ажиллахыг Хөдөлгөөнт эргүүлийн газарт үүрэг болгосон байх юм.
Ч.Батын тушаалын шалтгаан нь энэ шөнийн цэнгээний газрууд цаг хэтрүүлэн ажилладаг гэжээ. НИТХ-ын 91 дүгээр тогтоолд шөнийн цэнгээний газрууд 00 цагт хааж байхаар журамласан байдаг. Тогтоол гараад найман жил гаруй хугацаа өнгөрчээ.
Нэг явдал санаанд оров. Хэдхэн сарын өмнө Европын аварга шалгаруулах хөлбөмбөгийн тэмцээн болсон доо. Тэр үеэр Ерөнхий сайд С.Батболд, БОАЖ-ын сайд Д.Цогтбаатар нар тухайн үеийн хотын удирдлагуудтай ярилцан баар, цэнгээний газруудын ажиллах цагийг сунгаж байлаа. Тэр нь С.Батболдын хувьд хөөрхөн шоу болж байсныг санаж байгаа хүн олон л байгаа.
Харин одоо Ч.Бат “Цаг хэтрүүлнэ гэдэг байж болшгүй асуудал. Хууль, тогтоолд ингээд заачихсан. Хуулиа л өөрчлөхгүй бол ямар ч арга байхгүй” хэмээн Э.Бат-Үүл даргад тайлбарлаад, тушаалаа хамгаалаад сууж буй ажээ.
Уг нь Хотын дарга Улаанбаатарыг аятайхан болгочих санаатай “Мөрөөдөл ярьдаг”, “Бүтэшгүй зүйл мөрөөддөг” мэтээрээ дуудуулан ажилласаар байгаа. Харин хамтран зүтгэгч нь нэг иймэрхүү байдлаар “мөрийг нь баллаж” явах аж.
Нөгөө талаар ардчилсан Монголд байтугай, коммунист Куба, Хятадад шөнийн клубууд нь 00 цагт хаах биш нээгддэг жишиг бий. За тэгээд, бидний даган дуурайх дуртай Америк, Япон, Солонгосын талаар ярих ч юм биш.
Ардчиллын онолоор иргэд эрх чөлөөг эдлэх учиртай. Иргэндээ итгэдэг ардчилсан төр албадлагын хууль тогтоомждоо хязгаартай ханддаг. Харин иргэндээ итгэдэггүй засаглал эрх чөлөөг нь хязгаарладаг. Нас биед хүрсэн иргэдээ шөнийн 00 цагт унт гэдэг нь ардчилсан байтугай коммунист дэглэмтэй улс орнуудад ч байхгүй дэглэм.
Нөгөө талаар Ч.Бат ийм байдлаар дээрх аж ахуйн нэгжүүдийн үйл ажиллагааг дарангуйллын аргаар зогсоолоо гэвэл буруудахгүй.
Зүй нь шөнийн цэнгээний газруудыг зөв хуульчлаад, үйл ажиллагааг нь улам сайжруулаад явбал үр нөлөө нь зөв л гарна. Ерөөс шөнийн цэнгээний газар гэж архиддаг орчин гэж боддог Ч.Бат нарын албан тушаалтнууд цаг үеэ мэдэрч, хөл нийлүүлэх шаардлага ирснийг энэ байдал харуулав. Залуус тэнд бүжиглэж, хамт олноороо цуглаж цагийг өнгөрөөдөг газар шүү дээ, уг нь.
Үүнийг Э.Бат-Үүл дарга уг нь мэдрээд байгаа юм. Гэвч итгэж үлдээсэн албат нь энэ мэтээр дур мэдэж, хийх гэж байгаа ажлыг нь мөрөөдөл болгон цаасан дээр үлдээх замыг нь засч эхлэв.
Хэрэв хөгжингүй орнуудын жишгээр шөнийн хотыг бий болгох гэж байгаа л бол ийм газруудыг зэрэглэл тогтоогоод зохих стандартын дагуу байлгах нь цаг үеийн шаардлага. Ч.Батад шөнийн цэнгээний газар хэрэггүй байж болно. Харин залуусын улс гэдэг Монголд бол хэрэгтэй.
Эндээс бас нэг зүйл ажиглагдаад байгаа юм. Ардын намынхан хүсвэл цагийг нь сунгаж болдог. Ардчилсан намынхан хүсэхээр чөдөрлөж тушдаг Ч.Батын хоёр нүүрийг улстөржилт гэж үзэхээс аргагүй. Ардын намын дарга, Ерөнхий сайд С.Батболд сонгуулийн өмнөх PR болгон, хөлбөмбөг үзэхийн тулд хүссэнээрээ сунгаж ажиллуулдаг. Харин хотын өнгө төрхийг өөрчлөхөөр зорьсон шинэ мээрийг ийм үйл ажиллагаа эрхэлдэг аж ахуйн нэгжийнхэнтэй уулзаж эхлүүт яаран сандран тушаал үйлдсэн нь Ч.Бат дарга хэний эрх ашгийн төлөө ажиллаж байна вэ гэдгийг нотлох мэт. Нөгөө талаар хотын менежер Ч.Батын гаргасан шийдвэрийн талаар цаг хэтрүүлэн ажилладаг гэх үндэслэлээр тусгай зөвшөөрлөө цуцлуулсан аж ахуй нэгжийн ажилтнууд хотын удирдлагад хандаж шаардлага хүргүүлсэн байна. Тэд “НИТХ-ын 91 дүгээр тогтоолыг хүчингүй болгож, тусгай зөвшөөрлийг нь цуцалсан аж ахуй нэгжүүдийн тусгай зөвшөөрлийг эргэж сэргээх, Хууль зүйн яамнаас тавьж буй аюулгүй байдлын стандарт шаардлага хангаж, хяналтын камерийн системийг суурилуулсан томоохон шөнийн клубүүдийг 04.00 цаг хүртэл ажиллах нөхцөлөөр хангахыг” шаарджээ. Шаардлага хүргүүлж байгаа аж ахуй нэгжүүдийн ард нийт 500 орчин ажилтан албан хаагчдын амьжиргааны асуудал давхар яригдаж байгаа гэдгийг ч тэд мөн онцолсон байна. Тун удахгүй НИТХ-аар эл асуудлыг авч хэлэлцэн шийдвэр гаргана гэдэгт ч тэд итгэж байгаагаа мөн дурдсан байна билээ. Хотын Ерөнхий менежерийн гаргасан шийдвэрээс улбаатай шаардлагад хотын дарга Э.Бат-Үүл ямар хариу өгөх бол.
