О.ЧУЛУУТ
Үүл баатрын гаргасан шийдвэр албатуудынх нь ажлын үүднээс эхлэн үл хэрэгжиж байвал яах вэ. “Хангарьд” хэмээх ордны гадна зогсоолд үнэтэй, олон сайхан тэрэг эзнээ хүлээн өдөржин үүрэглэнэ. Ийм дүр зураг бүр хуучирчээ. Ажлаар очсон хүний унааны зогсоолыг цүдгэр гэдэстэй хурган дарга нар булаачихаад гэм, зэмгүй царайлах юм. Балдангийн машин зогсох зайгүй тул хойдох машиндаа туугдсаар 500 төгрөг хураалган замын санг тань арвижуулан гарч одлоо. Ажлаа ч амжуулсан юмгүй, хий 500 төгрөг төлөөд буцахаар уур хүрсэн гэж жигтэйхэн. Ингээд л таны гаргасан шийдвэр ажлын чинь үүднээс эхлэн замхарч буйг үзээд албатуудын чинь хориотой үйлдлийг сануулахдаа тулав.
Мээрийн гаргасан захирамж нэг их хол явдаггүй бололтой. Нийслэлийн нутгийн захиргааны ордны үүдэнд л үнэ, цэнээ алдаж байхад юу хэлэх вэ. Уг нь хотын фракц хоёрхон сарын дотор үндсээрээ шинэчлэгдэж АН-ын угшилтай болсон билээ. Нэг баг үзвэл тэд энэ ажлыг дэмжих учиртайг сэмхэн сөрчихөж. Таны шийдвэрийг таалж автобусаар зорчдог дарга нарын судалгааг сэм хийж үзээрэй. “Замын түгжрэлийг бууруулахад манай албатууд хувь нэмрээ оруулан нийтийн тээврээр үйлчлүүлж байгаа” гэсэн телевизээр хэлдэг жижүүрийн үгээ засахтун. Эс бөгөөс шийдвэрийг тань үл тоодог шил нь татсан юм шиг дарга нар улам олшрох магадлалтай болжээ.
