Эрүүл мэндийн дэд сайд Ж.Амарсанаа яарал­тай тусламжийг түргэсгэх болон зам тээврийн ослыг бууруулах арга замын талаар Замын цагдаагийн газрын дарга Ж.Буянбат, ЯТТТ-ийн дарга Ц.Пү­рэв­даш нарыг өнгөрсөн баасан гаригт хүлээн авч уулзлаа. Уузалтаар цааш­дын хамтын ажиллагааны талаар санал солилцож яаралтай тусламжийн өнөөгийн байдал болон осол гэмтлээс улбаатай нас баралт энэ оны эхний 10 сарын байдлаар 418 хүн зам тээврийн ослоор амь насаа алдсантай холбог­дуулан яаралтай түргэн тусламжийг түргэсгэх ямар боломж байгаа талаар Замын цагдаагийн газрын дарга Ж.Буянбатаас тод­руу­лав. Жил бүр машины тоо улам нэмэгдэж байгаа­тай холбоотой замын осол гэмтлээр нас барагсдын тоо буурахгүй байх ханд­лагатай байна. Түргэний машиныг хурдан явуулах боломжтой. Түргэний ма­шин дуут дохиогоо ажил­луулан замын хөдөлгөөнд оролцож байгаа тохиол­долд зам тавьж өгөхгүй эсвэл замд нь санаатай саад болж байгаа жолооч нарын эрхийг хасахаар болсон байна. Мөн хотын замын аль хэсэгт түргэ­ний тэрэг явахад хүндрэл­тэй, түгжрэл ихтэй байдаг замуудын байршлыг зааж өгвөл тэр газруудаар хур­дан явуулах арга хэмжээг авч өгөх боломжтойг Замын цагдаагийн газрын дарга Ж.Буянбат дуулгав. Тэрбээр нийт зам тээв­рийн ослын гуравны хоёр нь хөдөө, гуравны нэг нь хотын зам дээр гардаг. Зам тээврийн ослоор хотын зам дээр явган зорчигчид, хөдөөний зам дээр машин доторх зорчигчид нас барах нь илүү байгааг дуулгаад, замын цагдаа нарт яаралтай тусламжийн талаар сургалт явагддаггүй тул осол гарсан үед түргэн тусламж хүлээж цаг алдах явдал их тохиолддог. Тийм учраас цаашид замын цагдаа нарыг яаралтай тусламжийн сургалтад хамруулах шаардлагатай байгаа хэмээн хэлэв. Дэд сайд замын цагдаагийн газрын даргын хүсэлтийг хүлээн авч эрүүл мэндийн яам, замын цагдаагийн газар хамтран 2013 онд багтаан нийт замын цаг­даагийн ажилчдын гурав­ны нэгийг яаралтай тус­лам­жийн сургалтад хам­руу­лахаар болсон байна. Яаралтай түргэн туслам­жийн дарга Ц.Пүрэвдаш түгжрэлийн эсрэг авсан арга хэмжээний үр дүнд түргэн тусламж очих хур­дыг 10 хувиар нэмэгдүүлс­нийг дуулгаад нийт яарал­тай тусламжийн дуудла­гын 69% нь 20 минутад багтаж очдог болсон гэж хэлэв. Дэд сайд Ж.Амар­санаа цаашид түргэн тусламжийг 20 минутад биш 10 минутад очдог болгох зорилтыг дэвшүү­лэн ажиллах хэрэгтэйг онцлон яамны зүгээс хамтран ажиллана гэдгийг илэрхийлэв.