М.ГАН
УИХ-ын Төрийн байгуулалтын байнгын хорооны өчигдрийн хуралдаанаар Монгол Улсын Их Хурлын сонгуулийн тухай хуульд өөрчлөлт оруулах тухай хуулийн төслийн анхны хэлэлцүүлгийг хийж гишүүд дэмжлээ. Мөн ”Чингис хаан” одон бий болгох тухай Улсын Их Хурлын 2002 оны 21 дүгээр тогтоолд нэмэлт, өөрчлөлт оруулах тухай” Улсын Их Хурлын тогтоолын төслийн анхны хэлэлцүүлгийг хийж дэмжсэн юм.
Төрийн байгуулалтын байнгын хорооны хуралдаанаар хэлэлцсэн бас нэг асуудал нь Нийтээр тэмдэглэх баярын болон тэмдэглэлт өдрүүдийн тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлэг байв. Энэ хуулийн төслийн агуулга нь зарчмын шинжтэй дараах зүйлээр илэрч байгаа юм. Тухайлбал, нийтээр тэмдэглэх баярын өдөрт Монгол бахархлын өдрийг арваннэгдүгээр сарын 14-ний өдөр байхаар нэмж, энэ өдөр бүх нийтээр амардаг байх, Улс тунхагласны баярын өдөр буюу арваннэгдүгээр сарын 26-ны өдрийг нийтээр тэмдэглэх баярын өдөр байсныг нийтээр тэмдэглэх тэмдэглэлт өдөр болгох тухай байсан. Гэвч хэлэлцүүлгийн явцад гишүүд, арваннэгдүгээр сарын 26 буюу Улс тунхагласны баярын өдрөөр амардаг байсан нь хэвээр байх, түүнчлэн арваннэгдүгээр сарын 14-нд Чингис хааны мэндэлсэн өдөр буюу Монгол бахархлын өдрөөр нийтээр амардаг болох тухай хэлэлцээд дэмжсэн. Энэ тухай чуулганы нэгдсэн хуралдаанаар хэлэлцэн эцсийн шийдвэрийг гаргах юм. Гишүүдийн олонхи дэмжвэл жил бүрийн арваннэгдүгээр сард бүх нийтээр хоёр удаа амардаг болох нь.
