Барилга-Асуудал
О.БҮРНЭЭ
“Уучлаарай барилгын ажлаас шалтгаалан та бүхний амгалан тайван байдлыг алдагдуулж буйд хүлцэл өчье” гэсэн самбар өлгөж цэцэрлэгийн хүүхдүүдийн гадаа нарлах эрхийг нь хаасан хоёр барилгын талаар дурдъя. 136 дугаар цэцэрлэг Баянзүрх дүүргийн зургадугаар хорооны нутагт байрладаг. Энэ цэцэрлэгийн хойд, урд талд нь 2-5 метрийн зайд 12 давхар барилга хоёрыг барьж байна. Барилгын ажил ойр хавийнх нь оршин суугчдын амар, тайван байдлыг алдагдуулаад яг хажууханд нь байрлах бяцхан үрсийн амь насанд заналхийлж байгаа юм. Гэтэл барилгынхан “Зохих ёсны зөвшөөрөлтэй учраас барилгаа барьж байна” гээд үл тоосон шинжтэй үйл ажиллагаагаа хэвийн үргэлжлүүлж байна. Цэцэрлэгийн эргэн тойронд өндөр барилга барьж байгаа учир хүүхдүүдийг гадаа гаргаж тоглуулахгүй байгаа талаар тус цэцэрлэгийн нягтлан И.Сонин-Эрдэнэ дуулгав. Тэрээр “Сургууль, цэцэрлэгийн ойр орчимд 50 метрийн зайд барилга барихыг зөвшөөрдөг. Гэтэл 2-5 метрийн зайд 12 давхар барилга хоёрыг барьж байна. Манай цэцэрлэг үйл ажиллагаагаа явуулаад хоёр жил болж байгаа. 100 хүүхдийн хүчин чадалтай ч өнөөдрийн байдлаар 220 хүүхэдтэй ажиллаж байна. Бид хандаж болох бүх байгууллагад албан бичиг өгсөн. Гэтэл одоо ч ажиллаж байгаа. Хүүхдүүд гадаа гарч тоглохгүй байгаа. Барилга дээрээс юм унаж болзошгүй учраас хүүхдүүдийг гадаа гарч тоглохыг нь хорьсон. Уг нь бол өдийд яг гарч тоглож байх ёстой. Цэцэрлэгийн гадна хүүхдүүдэд зориулсан олон янзын гоё тоглоом байгаа ч тоглож чадахгүй байна гэдэг нь харамсалтай юм. Арга ядахдаа бид цэцэрлэг дотроо агааржуулагч авч тавьсан. Түүний хүчинд л хүүхдүүд өдрийг өнгөрөөж байна. Саяхан “Алтан” намар өдөрлөгийн хүрээнд хүүхдүүдийг цэцэрлэгийнхээ ойр орчимтой танилцуулах ёстой байсан ч барилгын ажилтай байгаа учраас аргагүйн эрхэнд музей үзүүлж салхилуулсан. Эцэг, эхчүүд “Хүүхдээ цэцэрлэгт нь хүргэж өгч, авахдаа хүртэл дээрээс юм уначих болов уу гэж айж явдаг” гэдгээ хэлсэн” гэв. Тус цэцэрлэгээс 10 метр зайд шинээр нээгдэж буй хувийн “Арвис” дунд сургууль байрлана. Тухайн сургуульд сурагчид хичээллэж эхлээгүй, удахгүй 150 гаруй сурагч суралцах юм байна. Тус сургуулийн захирал А.Лхагваа “Одоогоор манай сургуульд сурагчид хичээллэж эхлээгүй байгаа. Эдгээр барилгууд албан ёсны зөвшөөрөлтэй гэсэн. Бид энэ барилгынханд ойр орчимд юм унахаас сэргийлж хамгаалалт хийхийг сануулсан. Тэд хамгаалалт хийсэн байна. Нэгэнт бариад эхэлчихсэн барилгыг одоо яалтай билээ. Хүний амь нас хохироочихгүйхэн шиг бол барилгаа хурдан барьж дуусгах хэрэгтэй” гэсэн юм. Цэцэрлэгийн хойд талд барьж буй 12 давхар барилгыг “Герман стандарт” компани захиалан бариулж байгаа юм байна. Тэдэнтэй уулзаж байрь, суурийг нь сонирхох гэсэн боловч дөрвөн метр өндөр төмөр хашаагаар хүрээлүүлсэн барилга дотроос хүн гарч ирсэнгүй. Бид цааш явж цэцэрлэгийн урд талд барьж буй 12 давхар барилга дээр очиход барилгын эзэн гэх Г.Өсөхбаяр аваргын эгч Г.Нарангэрэл байж байв. Түүнээс цэцэрлэгийн урд талд яагаад барилга барих болсон талаар нь тодруулсан юм.
Г.Нарангэрэл: БАРИЛГЫНХНЫ МУУГ ҮЗЭХ ШААРДЛАГА БАЙНА УУ
-Цэцэрлэгтэй ойрхон 12 давхар барилга барьж байгаа нь хууль бус үйлдэл юм биш үү?
-Нийслэлийн мэргэжлийн хяналтынхан ирж шалгаад хамгаалалтынхаа торыг тат гэсэн шаардлага тавьсан. Бид хамгаалалтын тор татсан. Газрын зөвшөөрөл гээд бүх юм хууль ёсны дагуу учраас барилга барьж байгаа. Манайд ямар ч асуудал байхгүй учраас асуудалтай өөр барилгыг олж сурвалжил.
-Хүүхдүүд гадаанаа гарч тоглож чадахгүй байгаа юм билээ?
-Цэцэрлэгийн эрхлэгчтэй яриад тохирчихсон. Зөвшөөрсөн. Тэр нягтлан нь юу мэддэг юм. Бид шалгуулах ёстой газраараа шалгуулчихсан. Та нарт тайлбар өгөх шаардлага ч байхгүй. Манай барилга дээрээс цэцэрлэгийн хашаанд нэг мод унасан юм билээ. Тэр нь жижигхэн мод байсан. Өөр ямар нэгэн асуудал гараагүй.
-Хүүхдүүдийн эцэг, эхчүүд өглөө оройдоо хүүхдээ хүргэж өгөхдөө дээрээс юм уначих вий гэсэн айдастай байгаа гэсэн. Юм унахгүй гэсэн баталгаа байна уу?
-Хувийн хэвшлийнхэн барилга барьж л хотын утааг нь багасгана. Гэр хороололд амьдарч байгаа, байранд орохыг хүсч буй хүмүүсийн эрхийг бодож үзэх хэрэгтэй. Барилгынхны мууг үзэх шаардлага байна уу. Улсаас сайхан орон сууц барьчихаад “Та нар худалдаж аваад ор” гэж байгаа юм байна уу. Улс таван айлын байр ч барихгүй байна. Худал ярьж мөнгө идчихээд л явж байна. Хэдэн айлыг ч гэсэн орон сууцжуулах гээд барилга барихаар хахууль нэхэж дарамтлаад байх юм. Ийм их дарамтан дунд барилгынхан хүмүүсийг орон сууцжуулах гээд явж байна. Хотыг хувийнхан л хөгжүүлж байна.
