Т.САЙХАН
Засгийн газрын өчигдрийн хуралдаанаар хоёр ч томилгоо хийлээ. МАН-ын Хэвлэл, мэдээлэл, олон нийттэй харилцах хэлтсийн дарга Г.Ганбаярыг БСШУС-ын дэд сайдаар томиллоо. Г.Ганбаяр нь нийслэлийн 84 дүгээр дунд сургуулийг төгссөн. ХБНГУ-ын HUMBOLDT сургуулийн бэлтгэл курс, Санхүү эдийн засгийн дээд сургууль, мөн тус сургуульд магистр хамгаалсан байна.
Өнгөрсөн хугацаанд FМ 107.5 радиод ерөнхий менежер, “Гэрэлтэй цонх” студид редактор, УИХ-ын хэвлэл мэдээллийн албаны мэдээллийн албанд 2001-2002 онд, “ТВ-5” телевизийн ерөнхий менежерээр 2003-2007 онд, “BSP” компанийн гүйцэтгэх захирлаар 2007-2010 онд ажиллажээ. Мөн 2012 оноос одоог хүртэл НИТХ-ын төлөөлөгчөөр сонгогдон ажилласан байдаг.
Мөн “МИАТ” ТӨХК-ийн гүйцэтгэх захирлаар Д.Баттөрийг томилохоор шийдвэрлэлээ. Тус компанийн ТУЗ өмнө нь хуралдаж, шийдвэр гаргасан бөгөөд түүнийгээ Засгийн газарт танилцуулсан юм. Засгийн газар хуралдаанаараа хэлэлцэж шийдвэрлэснээр тэрээр албан ёсоор ажлаа эхэлж байна. Д.Баттөр нь УИХ-ын 2012 оны сонгуулийн дараа, Н.Алтанхуягийн Засгийн газар бүрдэх үеэр өмнөх Засгийн газраас ганцаараа суудалдаа үлдсэн төрийн нарийн бичгийн дарга хэмээн олон нийтэд танигдсан.
Өнгөрсөн хугацаанд Герман улсын Берлин хотод Консулаар сууж байсан, Ерөнхий сайдын зөвлөхөөр ажиллаж байсан юм. Мөн одоогийн ЗТХ-ийн сайн Ж.Бат-Эрдэнэтэй нэлээд дотно найз гэдэг. Ийнхүү тал талын дэмжлэгтэйгээр Д.Баттөр “МИАТ” ТӨХК-ийн гүйцэтгэх захирлаар томилогдлоо.
Эх сурвалж: "Зууны мэдээ" сонин
