Т.САЙХАН
Ерөнхийлөгч Х.Баттулга хүүхдийн мөнгийг хүүхэд бүрт олгуулах эрх зүйн орчныг бүрдүүлэхийн тулд УИХ-ын тогтоолын төсөл санаачилсан юм.
Энэ тогтоолын төслийг Ерөнхийлөгчийн Тамгын газрын дарга З.Энхболд 2018 оны дөрөвдүгээр сарын 6-нд УИХ-д өргөн барьсан бөгөөд тогтоолын төслийг өчигдөр УИХ-ын Төсвийн байнгын хорооны хуралдаанаар хэлэлцлээ. Хуралдаанд Ерөнхийлөгчийн Тамгын газрын дарга З.Энхболд оролцож, хуулийн төслийн талаар танилцуулга хийж, Төсвийн байнгын хорооны гишүүдийн асуусан асуултад хариулав. Төсвийн байнгын хорооны зарим гишүүн хүүхдийн мөнгийг халамж гэж харж байгаагаас үүдэн хүүхдийн мөнгийг зорилтот бүлэгт өгөх нь зөв, мөн хүүхэд бүрт хүүхдийн мөнгө олгох хэмжээний төсөв мөнгө байхгүй гэсэн байр, суурь илэрхийлж байв.
Сангийн сайд Ч.Хүрэлбаатар:
-Одоо мөрдөгдөж байгаа хуулиар хүүхдийн мөнгийг халамжийн сангаас олгож байгаа. Өмнө нь хүүхдийн мөнгийг Хүний хөгжлийн сангаас олгож байсан. Хүний хөгжлийн сангийн үйлчлэлийг зогсоосон. Халамжийг угаасаа хавтгайруулж өгдөггүй. Хуулиа л дагах ёстой.
УИХ-ын гишүүн З.Нарантуяа:
-Ерөнхийлөгч хүүхдийн мөнгийг хүүхэд бүрт олгох тогтоолын төсөл өргөн барьсан. Зөрүүлээд Засгийн газар 80 хувь нь хүүхдийн мөнгө олгох төсөл өргөн барьсан. Үүний зөрүү 20 хувь нь 208 мянган хүүхдээс л 22 тэрбум төгрөгийг өгөхгүй гэж байгаа юм. Хүүхдийн мөнгийг улс төрийн сонгуулийн амлалт, хэн нэгний улс төр хийх гэсэн зүйл гэхээсээ илүү Монгол Улсын хүн амаа өсгөх үндсэн бодлого гэдэг талаас нь Засгийн газар хандаасай. Тиймээс хүүхдийн мөнгийг 80, 100 хувь олгох тухай хоёр тогтоолыг нэгтгэж хэлэлцүүлэх нь зөв. Монгол Улсын Засгийн газарт хүүхдийн мөнгийг 100 хувь олгох 22 тэрбум төгрөгийг хаа нэгэн газраас хэмнэгдээд олдохгүй байгаа гэдэгт би итгэхгүй байна. 22 тэрбум битгий хэл хэдэн тэрбумаар нь та бүхэн үр ашиггүй зарж байгаа шүү.
УИХ-ын гишүүн Ж.Батзандан:
-Ерөнхийлөгч хүүхдийн мөнгийг Монголын бүх хүүхдэд ялгаваргүй олгох нь Үндсэн хуулийн үзэл санаатай нийцэж байна гэж хэлээд байгаа. Нийгмийн гарал үүслээр нь хүүхдүүдийг ялгаварлан гадуурхаж болохгүй. Та бүхэн “Зарим баян айл хүүхдийн мөнгө авдаггүй бүр мэддэггүй” гэж яриад байх юм. Тэр хүмүүс хүүхдийн хадгаламжийг бий болгож байгаа юм. Хүүхдээ багаасаа нь хадгаламжтай болгож, мөнгөний үнэ цэнийг мэдрүүлж байгаа хэрэг. Гэтэл хүүхдийн хадгаламжид нь байгаа мөнгийг төр нь харчихаад мөнгөө хэрэглэхгүй байна гэж хэлж болохгүй. Хадгаламж гэдэг бол шинэ соёл. Баялаг бүтээх шинэ соёлд хүүхдүүдийг сургаж байна.
Байнгын хорооны дарга, УИХ-ын гишүүн Б.Чойжилсүрэн:
-2018 онд хүнсний талон олгох зорилгоор 40 гаруй тэрбум төгрөг төсөвлөсөн. Гэтэл хүүхдийн мөнгөө олгохын тулд хүнсний талон олгохоос татгалзаж байна гэсэн үг үү. Хоёрдугаарт, Төсвийн тухай хуулийн 6.2.5 дугаарт зааснаар орлого бууруулах, зарлага нэмэгдүүлэх шийдвэр гаргасан бол түүнийг дараагийн жилээс төсөвт тусгадаг байх гэсэн заалт бий. Энэ заалт зөрчигдөөд байна. 2018 оны төсөв батлагдаад 49 хоног өнгөрөөгүй байхад таван хууль өөрчилсөн ч төсөвт ямар ч тодотгол хийгээгүй. Хууль зөрчигдөөд байна шүү.
Ерөнхийлөгчийн Тамгын газрын дарга З.Энхболд
-Ерөнхийлөгч Х.Баттулга зарчим ярьж байгаа. Одоогийн төсөвт 684 мянган хүүхдэд олгох хэмжээний мөнгө тусгасан. Засгийн газраас оруулж ирсэн төслөөр дахиад 288 мянган хүүхдэд мөнгө нэмж олгох гэж байна. 2016 оны жилийн эцсийн тооллогоор Монгол Улсад 0-18 хүртэлх насны хүүхдийн тоо нэг сая 79730 гэж гарсан. Өөрөөр хэлбэл, хүүхдийн мөнгийг 100 хувь олгоход 107730 хүүхдэд л нэмж хүүхдийн мөнгө олгоход болох юм. Энэ нь нэг жилд 25.8 тэрбум төгрөг, тавдугаар сарын 1-нээс эхлэн олгоход 17.2 тэрбум төгрөг болох юм. Олон зуун тэрбум төгрөгийн тухай яриагүй. Өмнөх дөрвөн жилд хүүхдийн мөнгө халамж биш байсан.
Ерөнхийлөгч Х.Баттулгын хууль санаачлах бүрэн эрхийнхээ хүрээнд санаачилсан УИХ-ын тогтоолын төслийг УИХ-ын Төсвийн байнгын хорооны хуралдаанд оролцсон 11 гишүүний зургаа нь дэмжсэнгүй. Байнгын хорооны дээрх санал, дүгнэлтийг УИХ-ын чуулганы нэгдсэн хуралдаанаар хэлэлцэх юм.
Эх сурвалж: "Зууны мэдээ" сонин
