Б.ЭНХЗАЯА
Хичээлийн шинэ жилийн эхний өдөр 10 гаруйхан настай охин ээжийнхээ нүдэн дээр аймшигт ослоор амиа алдлаа гэх мэдээ олон нийтийг цочроосон билээ. “Радуга” сургуулийн 8-Б ангийн сурагч Б.Есүгэн “Хүн болох багаасаа” гэх Ерөнхийлөгчийн заасан теле хичээлийг үзчихээд өөрийн бяцхан оюундаа тунгаан бичсэн тэмдэглэлээ цүнхлээд сургуулиасаа гарсан. Гэвч хэдхэн хормын дараа өөрийг нь тосч зогссон ээж, дүүтэйгээ хөтлөлцөөд явган хүний гарцаар гарч явахдаа барилгын краны зуурмаг шахагч хоолойд даруулан амиа алдсан юм. Хохирогч охины аав өмгөөлөгчийн хамт өчигдөр мэдээлэл хийлээ. Тэрээр “Монгол ёс юм, 49 хоногийг нь гүйцээгээд та бүхэнд хандаж байна” хэмээн учирлав.
“ҮҮНИЙГ МАГАДЛАЯ, ТА БҮХЭН ТАЙВАН АМГАЛАН БАЙЦГАА”
Хохирогч охины аав Б.Батсайхан Ерөнхийлөгч Ц.Элбэгдорж, Ерөнхий сайд Н.Алтанхуяг болон холбогдох хүмүүст захидал хүргүүлэхээр зэхжээ. Гэр бүлийн тэргүүн үр хүүхэддээ харам байдаг шиг төрийн тэргүүн ард түмэндээ хайртай байх учиртай гэх горьдлого тээн, эцэг хүний хувиар захидлаа бичиж. Ингэхдээ охиныгоо зуурмагийн машины хоолойд бус төрд үүрлэсэн хүнд суртал, авлигаас үүдэлтэй ёс суртахуун, үзэл бодлын доройтлын хоолойд даруулсан хэмээн онцолжээ. Түүний захидлаас иш татвал “...Миний охин орчин тойрон, эх хотоо цэвэр цэмцгэр байлгах чинхүү сэтгэлтэй, нялх эх оронч нэгэн байсан. Тэр өнөөгийн нийгэмд бугшсан булхай бүхнийг илчилж, засч залруулах цаг болсныг алтан амиараа сануулан, Монголын мянга мянган хүүхдийн сайн сайхны төлөө амь насаа зориулсан юм. Та “Ардын элч” кинон дээр гардаг хошуу ноён шиг “Үүнийг магадлая, та бүхэн тайван амгалан байцгаа” гэж хандахгүй гэдэгт найдаж байна. Монгол төрийн тэргүүн, Монгол хэмээх өрх гэрийн аав Танд Улаанбаатар хотын чинь жирийн иргэн аав би, өөрийн гэр бүлд учирсан тэр хар өдрийнх шиг зүрх зүсэгдэж, элэг эмтэрч, сэтгэл урагдам аймшигт мэдээ, дүр зургийг дахин хэн нэгэн өрх бүлд, аав ээжид, тэдний бяцхан хүү, охинд бүү давтагдаасай. Ерөнхийлөгч, Үндэсний аюулгүй байдлын зөвлөлийн тэргүүн Та миний охин амь насаа “зүгээр нэг зориулаагүй юм” гэдгийг бодит үйлдлээр харуулж, “Монгол хүний амь нас үнэ цэнэтэй байхыг хуульчлан баталгаажуулахыг бид хүсч, хариулт нэхэж байна...” хэмээх ил захидлыг охиныхоо бичсэн шүлэг, хичээлийн дэвтрийн хамтаар хавсаргажээ. Тэрээр уг хэргийн буруутанг төр засаг хэмээн үзэж буй аж.
“ЗУУРМАГ ШАХАГЧИЙГ АЖИЛЛУУЛАХ ЖУРАМ ӨДИЙ ХҮРТЭЛ БАЙДАГГҮЙ”
Хэргийн мөрөөр шалгасан мэргэжлийн байгууллагынхны гаргасан аюулгүй байдлын дүрэм журмыг хангаж ажиллаагүй хэмээх дүгнэлтийг хохирогчийн аав эсэргүүцэж буйгаа хэлсэн юм. Тэрээр хариуцлагагүй бизнес, авлига нь хүмүүнлэг ардчилсан нийгэмд орчин цагийн хэлмэгдүүлэлтийг бий болгодог хэмээн үзэж байгаагаа хэллээ. Барилгын компаниуд аюулгүй байдлаа хангахад анхаарах цагийг зөвшөөрөл авахад зарцуулдаг болсон нь нууц биш. Барилгын зөвшөөрлийг авахын тулд төрийн байгууллагын шат дамжлагыг дамжин, олон арван гэрээ, гарын үсэг зуруулдаг хүнд суртал ийм байдалд хүргэж буйг олон жишээ харуулна. Осол гаргасан бетон зуурмагч машин нь манай барилгын салбарт нэвтрээд 10 гаруй жил болжээ. Гэвч ажиллуулах тухай заалт заавар өдий хүртэл байдаггүй аж. Барилгын тухай хууль 2008 онд батлагдаад барилгын ажил эхлүүлэх, үргэлжлүүлэх зөвшөөрлийг Барилгын асуудал эрхэлсэн хууль сахиулах хорооны байгууллага хариуцна гэж заасан байдаг аж. Гэвч уг тогтоолыг өнөөг хүртэл МХЕГ-ынхан хууль бусаар уг шийдвэрийг хэрэгжүүлж байгааг уг хэргийн өмгөөлөгч В.Энхтамир хэллээ. Зөвшөөрөл өгдөг хэрнээ хариуцлага хүлээх болохоор хүн хүч хүрэлцдэггүй хэмээн тайлбарлах Нийслэлийн мэргэжлийн хяналтын газрынханд гомдолтой байгаа аж. Талийгаач охины аав төрийн тэргүүнд хандсан захидлаа Ерөнхий сайд, Хуульзүйн сайд зэрэг холбогдох хүмүүст явуулахаар болжээ.
Охиныхоо зураг, зул хоёроор амь зогоож буй энэ гэр бүлийнхэн төрийн тэргүүндээ ийнхүү хандаж байна. Тэд төрийн тэргүүнээс хариулт авах гэж хугацаа шаардсангүй. Гагцхүү Ерөнхийлөгчийн заасан хичээлээр “Онц сурдаг ажилсаг хүүхдийг аз жаргалтай ирээдүй хүлээж байдаг... Ангийнхнаасаа хамгийн их хүсэх зүйл бол хичээл хөдөлмөр ба онц сурах. Эцэг эхийнхээ ачийг хариулахын тулд бидний одоо хийх зүйл бол онц сурах юм...” хэмээн хичээлийн жилийн анхны өдөр бичсэн бяцхан үрийнхээ тэмдэглэл гэрийнхээ хойморт зураг, зул хоёртойгоо гансран хэвтэхийг хараад аав хүний хувиар тайлбар хийхийг хүлээсэн биз.
