Х.ОЮУНБОЛД
ОХУ-ын олимпийн хороо Спортын арбитрын шүүхээс тэмцээнд оролцох эрхийг нь сэргээсэн 15 тамирчныг “Өвлийн олимп 2018”-д урилгаар оролцуулахыг Олон улсын олимпийн хорооноос хүссэн байна. Гэвч сэргээшийн эсрэг байгууллагын тэргүүн, Францын спортын дэд сайд асан Валери Фурнейрны удирддаг олон улсын шинжилгээний байгууллагаас “ Спортын арбитрын шүүхээс гаргасан шийдвэр нь тэднийг сэргээш хэрэглээгүй гэсэн сэжгийг арилгаж, итгэлийг нь төрүүлэхгүй байгаа учраас сэргээшийн хүчин нөлөө бүрэн арилсан гэж үзэж чадахгүй” гэжээ. Харин хоёр дасгалжуулагчийн тухайд Освальдын комиссын өгсөн мэдээлэл болон байгууллагын нэмэлт мэдээлэлд тулгуурлаж эрхийг нь сэргээхээс татгалзсан байна. Олон улсын олимпийн хороо “Сочи 2014” оны олимпийн сэргээшийн эсрэг дүрэм журмыг зөрчсөн ОХУ-ын 28 тамирчны тэмцээнд оролцох эрхийг нь бүрмөсөн хасаад байсан юм. Харин Спортын арбитрын шүүх сэргээш хэрэглэснийг нь нотлох хангалттай нотолгоо байхгүй учраас энэ шийдвэрийг нь цуцалжээ. Олон улсын олимпийн хороо түүний гүйцэтгэх комиссоос гаргасан шийдвэр нь хүчинтэй гэж мэдэгдсэн. ОХУ-ын тамирчдыг өвлийн олимп “ПёнЧан-2018”-д Спортын арбитрын шүүхийн гаргасан алдааны улмаас улсынхаа туган дор жагсч оролцохыг хоригложээ. Олон улсын олимпийн хорооны ерөнхийлөгч Бах “Спортын арбитрын шүүхээс гаргасан шийдвэр нь бидний гайхлыг төрүүллээ. Мөн тэд бидэнд шийдвэрийг бүтэн өгөөгүй. Энэ сарын сүүлээр бидэнд өгнө гэж хэлсэн нь урам хугалж байна. Түүнчлэн “Олон улсын олимпийн хороо” Спортын арбитрын шүүхийн гаргасан шийдвэрт сэтгэл дундуур байна. Энэ нь тус байгууллагыг шинэчлэх ялангуяа түүний үйл ажиллагааны системийг шинэчлэх шаардлагатай байна” гэж хэвлэлийн хурлын үеэр мэдэгджээ. Харин сэргээш илрээгүй ОХУ-ын тамирчид өвлийн олимпод оролцож болох бөгөөд тус улсын тамирчид олимпийн хорооны туган дор жагсч оролцож болох ажээ.
Эх сурвалж: "Зууны мэдээ" сонин
