ОХУ-ын  тамирчид өвлийн олимпод хуучны ЗХУ-ын туг, сүлд дууг ашиглан оролцох  боломжтой эсэхийг  Олон улсын олимпийн хорооны тусгай комисс шийднэ гэж тус байгууллагын сонинд нийтэлснийг  “Риа  Новости” агентлаг иш татан мэдээлжээ. Олон улсын олимпийн хороо ОХУ-ыг олимпод оролцохыг хориглосны дараа нийтийн цахим сүлжээний хэрэглэгчид энэ санааг гаргасан байна.    Тус хорооны  ерөнхийлөгч Томас Бах өнгөрсөн сарын 5-нд ОХУ-ын тамирчид олимпод оролцож болохгүй гэж хориглосон. Гэхдээ сэргээшийн  асуудалд орж байгаагүй тамирчид бие даан оролцож болно гэсэн билээ. Харин одоогоор ОХУ-ын тамирчдад “ПёнЧан-2018”-д  олимпийн  хорооны туган дор жагсч оролцохоос өөр боломж алга байгаа юм.  Мөн амжилт үзүүлсэн  тамирчид медалиа авахдаа ОХУ-ын биш олимпийн хорооны сүлд дууг сонсох, хувцсыг нь өмсч оролцох боломжгүй болоод байгаа юм.  Харин ОХУ-ын зарим тамирчин үүнийг доромжлол  хэмээн эсэргүүцсэн бол  нөгөө хэсэг нь нөхцөл байдлыг хүлээн зөвшөөрч оролцохоор шийдвэрлэжээ. ОХУ-ын олимпийн төв хорооны олимпийн ассамблей  ирэх сарын 9-25-нд болох “ПёнЧан-2018”-д тамирчдаа оролцуулах талаар санал хураалт явуулсан байна. Ерөнхийлөгч Владимир Путин тамирчдаа төвийг сахисан туган дор оролцуулахаар дэмжиж байгаа юм.   Эх сурвалж: “Зууны мэдээ” сонин