М.ХҮСЛЭН
Франц улсад өчигдөр Ерөнхийлөгчийн сонгуулийн эхний шат явагдав. Тус улсын сонгуулийн санал авах байрууд өглөө 08:00 цагаас эхэлж оройн 19:00 цагт хаагдсан байна. Зарим хотуудад сонгуулийг хугацааг нэг цагаар сунгасан аж.
Францын сонгуулийн хуулиар эхний шатанд хамгийн олон санал авсан хоёр нэр дэвшигч дараагийн шатанд өрсөлдөх юм. Шинжээчдийн урьдчилан таамаглаж буйгаар Ерөнхийлөгчийн сонгуулийн эхний шатанд ямар нэр дэвшигч ялалт байгуулах нь тодорхойгүй гэнэ.
“Ipsos Sopra Steria” судалгааны институтын өнгөрсөн долоо хоногт явуулсан санал асуулгад франц иргэдийн 24 хувь нь төвч үзэлтэй Эммануэль Макроныг, 22 хувь нь үндсэрхэг Марин Ле Пенийг дэмжинэ гэдгээ илэрхийлжээ. Түүнчлэн барууны үзэлтэй Франсуа Фийон болон Жан-Люк Меланшон нар тус бүр сонгогчдын 19 хувийн саналыг авахаар байна. Санал асуулгад оролцогчдын гуравны нэг нь одоогоор хэний төлөө саналаа өгөхөө шийдээгүй гэсэн бол, гуравны нэг нь сонгуульд оролцохгүй гэжээ.
Ерөнхийлөгчийн сонгуульд нийт 45.6 сая сонгогч оролцох юм байна. Түүнчлэн Франц улсаас гадна байгаа 1.3 сая иргэн санал өгөх эрхтэй аж. Төрийн тэргүүний сонгуулийн хоёр дахь шат тавдугаар сарын 7-нд болно.
СОНГУУЛИЙН ӨМНӨ ХАЛДЛАГА БОЛОВ
Ерөнхийлөгчийн сонгууль болохоос ердөө гуравхан хоногийн өмнө нийслэл Парис хотын төвд Елисейн талбайн ойролцоо буудалцаан болж, цагдаагийн нэг офицер буудуулан нас барж, бас нэг нь хүнд шархадсан хэрэг гарав. Цагдаа нарт гал нээсэн этгээд буудуулан алагдсан байна. “Исламын улс” бүлэглэл энэ хэргийн хариуцлагыг хүлээж, буудуулан алуулсан этгээдийг ”бидний шилдэг дайчдын нэг байсан” гэсэн мэдэгдэл хийжээ.
Парис хотын прокурор Франсуа Молинг мэдээлснээр гэмт этгээд нь 39 настай Карим Чеурфи гэгч бөгөөд АКМ-47 буугаар гал нээж, цагдаагийн ажилтны толгой тус газарт нь хоёр удаа буудаж амийг нь хөнөөсөн байна.
Цагдаа, аюулгүй албаныхан Елисейн талбай орчмыг бүрэн хяналтандаа авч, хөл хорио тогтоожээ. Аюулгүй байдлыг хангахаар Францын цагдаагийн 50 мянган алба хаагч ажиллаж байна.
