О.БҮРНЭЭ
Хан-Уул дүүргийн нэгдүгээр хороо, 120 мянгатын 14, 15 дугаар байрны өмнө “Адоре пропертийз” компанийн барьсан 13 давхар зочид буудлын барилгыг оршин суугчдын эрх ашгийг хохироосон хэмээн үзэж хотын дарга Э.Бат-Үүл нураах шийдвэр гаргахаа өнгөрсөн долоо хоногт мэдэгдсэн. Тиймээс Нийслэлийн барилга, хот байгуулалт, төлөвлөлтийн газрын дарга Э.Хүрэлбаатарт барилгыг нураахад хэчнээн төгрөг шаардлагатайг долоо хоногийн дотор тооцож гарга гэсэн үүрэг өгсөн юм. Түүнээс зарим зүйлийг тодрууллаа.
-Хотын дарга 13 давхар зочид буудлыг нураахад шаардагдах мөнгийг тооцолж гаргах үүргийг танд өгч байсан. Буулгахад ямар хэмжээний мөнгө шаардлагатай байгаа вэ?
-Энэ асуудлыг нэлээд нухацтай шийдэхгүй бол болохгүй. Нураахаар болсон 13 давхар барилгыг НМХГ-аас шалгаж байгаа.
-Та бүхэн “Адоре пропертийз” компанийнхантай уулзаж барилгыг нь буулгахаар төлөвлөж байгаа талаар хэлсэн үү?
-Уулзаагүй.
-Хотын дарга оршин суугчдад барилгыг нураана гэж амласан. Бүр хүйтрэхээс өмнө буулгана гэж байсан. Шийдвэр өөрчлөгдөхгүй биз дээ?
-Хотын дарга худал амлаагүй. Энэ барилгыг буулгах боломжтой. Хамгийн гол асуудал амар шийдэгдэхгүй. Тиймээс НМХГ-аас тухайн барилгад шалгалт хийж байгаа.
Харин “Адоре пропертийз” компанийн ажилтантай утсаар холбогдоход “Энэ асуудлаар тайлбар өгөх дарга нар байхгүй” хэмээсэн юм.
