Жолоочийн зөрчлийн бүртгэлийн оноог тооцох журам ирэх сарын 1-нээс хэрэгжихээр болжээ. Жолооч нарын зөрчлийн оноог тооцох, эрхээ хэрхэн сэргээлгэх талаар Замын цагдаагийн газрын Урьдчилан сэргийлэх хэлтсийн дарга, цагдаагийн хурандаа Э.Бөхбатаас тодрууллаа.
-Хууль өнгөрсөн оны есдүгээр сараас мөрдөгдөж эхэлсэн болохоор зөрчлийн оноог нөхөж тооцно гэсэн мэдээлэл байгаа. Энэ юу болох вэ?
-Хэдийгээр хууль батлагдсан ч онооны систем одоог хүртэл мөрдөгдөж эхлээгүй байна. Ирэх сарын 1-нээс эхлүүлэхээр төлөвлөж байгаа. Тиймээс зөрчлийн оноог нөхөж тооцохгүй. Энэ хууль, журмын гол зорилго нь зам тээврийн ослыг бууруулах шүү дээ. Зоргоороо дүрэм зөрчиж, бусдынх болон өөрийнхөө амь насыг золионд гаргадаг жолооч нарт зориулсан. Харин замын хөдөлгөөнд соёлтой оролцож байгаа жолооч нарт онооны систем хамаарахгүй. Замын хөдөлгөөний аюулгүй байдлын тухай хууль хэрэгжиж эхэлснээр өнгөрсөн оны хэмжээнд зам тээврийн ослоор нас барагсдын тоо 17 хувиар буурсан.
-Онооны системийг хэрхэн тооцох вэ?
-Жолооч бүр 10 оноотой байна. Зөрчлөөс шалтгаалж 1-5 оноог хасна. Урамшууллын систем ч давхар бий. Сүүлд хасуулаад нэг жилийн дотор зөрчил гаргаагүй бол таван оноог нь нэмж өгнө. Нэг оноотой үлдчихээд хоёр жил дүрэм зөрчихгүй бол автоматаар 10 оноо болж сэргээгдэнэ.
-Ямар төрлийн зөрчилд оноо хасах вэ. Оноо дууссан тохиолдолд яаж сэргээх вэ?
-Зайлшгүй зам тээврийн осолд хүргэдэг 17 төрлийн зөрчилд үйлчилнэ. Оноо дуусч эрхээ хасуулсан жолооч нар Лицензийн төвд хандаж шалгалт өгнө. Согтууруулах ундаа хэрэглэсэн үед эрхээ хасуулсан бол зургаан цагийн сургалтад хамрагдана. Согтууруулахаас бусад төрлийн зөрчлөөр үнэмлэхээ хураалгасан бол хоёр цагийн сургалтад суух ёстой. Үүний дараа шалгалт өгч тэнцвэл эрхээ сэргээлгэж, оноотой болно гэсэн үг. Шалгалтыг цахимаар ч өгч болно.
Эх сурвалж: “Зууны мэдээ” сонин
