Венесуэлийн Ерөнхийлөгч Николас  Мадуро өчигдөр найз бүсгүй Силиа Флорестэй гэрлэв. Олон жилийн өмнөөс ханилан амь­дарч байгаа тэдний харил­цааг Каракас хотын дарга Хорхе Родригес хувийн цомхон ёслол хийж баталгаажуулжээ. Н.Мадуро төрийн те­ле­визээр хийсэн мэдэг­дэлдээ “Долдугаар сарын 16-ны өдөр Силиа бид хоёр бүгд найрамдах улсын хуулийн да­гуу харилцаагаа батал­гаажуулж, эхнэр нөхөр боллоо. Бид сэтгэлээрээ, бурхны ивээлээр хамтдаа явж ирсэн. Гэрлэж, харилцаагаа албан ёсны болгох нь хамгийн мэргэн шийдвэр байлаа” хэмээн онцолсон байна.

Мадурогоос (50 нас­тай) арав дүү Флорес 1990 оны эхэн үеийн чавист хувьсгалд идэвхтэй оролцож байсан нэгэн. Тэд дундаасаа хүүхэдгүй ч тус бүрдээ өмнөх гэрлэлтээсээ хүүхэдтэй. Силиа Флорес Үндэсний Ассамблейн ерөнхийлөгч, улсын ерөнхий прокурорын алба хашиж байжээ. Флорес У.Чавесийн байгуулсан улс төрийн бүлэгт нэгдэн тэмцэж байхдаа Н.Мадуротой танилцсан аж. Мөн Чавес 1992 онд төрийн эргэлт хийн бүтэлгүйтэж шоронд ороход Флорес өмгөөлөгчдийн багт орон ажиллаж байсан юм.

Венесуэлийн Болива­риан хувьсгалын лидер гэгддэг Ерөн­хийлөгч Уго Чавес хорт хавдрын улмаас удаан хугацаанд эмчилгээ хийлгэсний эцэст өн­гөрсөн гуравдугаар сард өөд болсон юм. Тэрээр улс орондоо социализмийг жинхэнэ утгаар нь байгуулна хэмээн жи­рийн ард иргэдийг ихээхэн дэмжиж, тэтгэж, гадаадын томоохон ком­паниудыг улсын мэ­дэлд авч байсан билээ. Гэвч Венесуэлийн эдийн засаг хүнд байдалд орж, бараа, үйлчилгээний үнэ тэнгэрт хаджээ. У.Чавесийг нас барсны дараа залгамжлагчаар нь тодрон Ерөнхийлөгчийн сонгуульд сөрөг хүчний нэр дэвшигч Энрике Каприлесийг ялан гарч ирсэн Николас Мадуро эдийн засгаа сэргээх бод­лого явуулж байгаа ч амжилт олохгүй байна. Венесуэль улс сард хэ­дэн зуун мянган тн неф­тийг Кубад бараг үнэгүй шахам нийлүүлж байгааг сөрөг хүчнийхэн ихээхэн шүүмжилдэг. Ажиглагчид Н.Мадурог арай өөр, нээлттэй бодлого барим­тална хэмээн найдаж байсан нь талаар болж байгаа ажээ.