“Эрдэнэс Тавантолгой” компанийн “Эв санааны нэгдэл” үйлдвэрчний эвлэлийн дарга С.Эрдэнийн өөрийгөө шатаасан хэрэгт эрүүгийн хэрэг үүсгэн, түүнийг буруутгаж байгаа мэдээлэл цацагдах болов. Цагдаагийн байгууллагаас уг мэдээллийг няцааж байна. Энэ талаар ЦЕГ-ын Хэвлэл мэдээллийн төвийн ахлах байцаагч, цагдаагийн ахмад Ё.Лхагвасүрэнгээс тодрууллаа.

-“Эрдэнэс Тавантолгой” компанийн “Эв санааны нэгдэл” үйлдвэрчний эвлэлийн дарга С.Эрдэнэд эрүүгийн хэрэг үүсгэсэн гэж үнэн үү?

-Уг хэрэгт Сүхбаатар дүүргийн цагдаагийн I хэлтсээс С.Эрдэнийг хохирогчоор татан эрүүгийн хэрэг үүсгэн шалгаж эхэлсэн. Тодруулбал, Эрүүгийн хуулийн 95.1 буюу бусдыг амиа хорлоход хүргэсэн гэсэн үндэслэлээр шалгаж байна.

-Хэн нэгнийг сэжигтнээр татсан уу?

-Одоогоор шалгалтын ажил эхэлж байгаа учир хэн нэгнийг буруутгах үндэслэлгүй. Иргэн С.Эрдэнэ өөрийгөө шатаахад хүргэсэн нь хамт явсан нөхөд нь үү, эсвэл “Эрдэнэс Тавантолгой” компани эсэхийг шалгалтын явцад тогтооно.

Эх сурвалж: “Зууны мэдээ” сонин